ئەنجوومەنی وەزیران بڕیاری لابردنی پاڵاوگە نایاساییەكانی دەركرد
سەرۆكی لیژنەی باڵای داخستنی پاڵاوگە نایاساییەكان لە ھەرێمی كوردستان گوتی، ئەنجوومەنی وەزیران بڕیاری لابردنی پاڵاوگە نایاساییەكانی دەركردووە، بۆ ئەم مەبەستەش ھێزێك پێك هێندراوە و بە زووترین كات دەست بە لابردنیان دەكرێت.
د. سامی جەلال، بە ماڵپەڕی فەرمیی پارتی ڕاگەیاندووه: “دوای تەواوبوونی مۆڵەتی داخستنی پاڵاوگە نایاساییەكان، ئەنجوومەنی وەزیران فەرمانی داوە دەست بە داخستنی پاڵاوگەكان بكرێت و نووسراویشی بۆ وەزارەتی دارایی كردووە، بۆ ئەوەی بودجەیان بۆ دابین بكەن و پێداویستیی پێ بكڕن بۆ داخستن و ھەڵگرتنی پاڵاوگەكان و ئێستاش چاوەڕێی دابینكردنی پارەكە دەكەین”.
سەرۆكی لیژنەی باڵای داخستنی پاڵاوگە نایاساییەكان گوتیشی: “ئێمە ھێزێكمان دروست كردووە بۆ ھەڵگرتنی ئەو پاڵاوگانە و شارەوانییش سێ پارچە زەویی بۆ دابین كردووین، بۆ ئەوەی كەلوپەلەكانی لێ كۆ بكەینەوە و بە زووترین كات دەست بە ھەڵگرتنیان دەكەین، چونكە ئەوە بڕیاری ئەنجوومەنی وەزیرانە”.
جەلال باسی لەوەش كرد، تەنیا داخستنی پاڵاوگە نایاساییەكان بەس نییە، بەڵكوو پێویستە لاببرێن، كە ژمارەیان ١٦٩ پاڵاوگەیە.
