پارتی و یه‌كێتی رێككەوتنی كۆتایی راده‌گه‌یه‌نن
مه‌حموود محه‌مه‌د، گوتەبێژی پارتی دیموكراتی كوردستان، به میدیای فه‌رمی پارتی راگه‌یاندووه، كه بڕیاره هه‌فته‌ی داهاتوو پارتی و یەكێتی كۆده‌بنه‌وه و رێككەوتنی كۆتایی رادەگەیەندرێت. گوتەبێژی پارتی، دەشڵێت، پێشتر لەگەڵ یەكێتی رێككەوتنی سیاسییان كردووە، ئەو رێككەوتنەی ئێستاش دەكرێت، رێككەوتنە لەسەر پۆستەكان.
مەحموود محەمەد، تیشكی خستە سەر رێككەوتنەكەیان لەگەڵ بزووتنەوەی گۆڕان كە لەسەر جێگری سەرۆكی هەرێم رێككەوتبوون. كە ئەو پۆستە بۆ بزووتنەوەی گۆڕان بێت، لە دواییدا یەكێتیی نیشتیمانیی كوردستان داوای ئەو پۆستەی كرد، كە بكرێت بە دوو جێگر، بەڵام بزووتنەوەی گۆڕان رازی نەبوو كە داوای یەك جێگری دەكرد بۆ سەرۆكی هەرێم.
مه‌حموود محه‌مه‌د ئەوەشی خستووەتەڕوو “ئەو گرفتەی هاتە بەردەم كۆبوونەوەكان، ئێمە ویستمان بە رازی بوون و بە پێكەوەبوون كار بكرێت، نەك لە ژێر گوشاردا بێت، بۆ ئەم مەبەستە زەمەنێكی زیاتر لە پێویستمان دایە گفتوگۆكان، هەروەها بۆ ئەوەی لێكتێگەیشتن لە نێوان هەموو لایەنەكان دروست ببێت، هەروەها ئەو لێكتێگەیشتنە لە هەفتەی داهاتوودا كۆتایی پێ دێت، بە شێوازێك هەرسێ لایەن رێكدەكەوین”.
