نێچیرڤان بارزانی و شاندێكی به‌ریتانی دۆخی ناوچه‌كه تاوتوێ ده‌كه‌ن
نێچیرڤان بارزانی سه‌رۆك وه‌زیرانی هه‌رێمی كوردستان له كۆبوونه‌وه‌یه‌كدا له‌گه‌ڵ سیر سیمۆن ماكدۆناڵد بریكاری وه‌زیر و سه‌رۆكی فه‌رمانگه‌ی دیپلۆماسی له وه‌زاره‌تی ده‌ره‌وه‌ی به‌ریتانیا، پوخته‌یه‌كی له‌سه‌ر قۆناغی شه‌ڕی داعش و قۆناغی دوای ئه‌و شه‌ڕه و دۆخی ئاواره و په‌نابه‌ران له هه‌رێمی كوردستان و گه‌ڕانه‌وه‌ی ئاواره‌كان بۆ زێدی خۆیان و ئاوه‌دانكردنه‌وه‌ی ناوچه‌كانیان، پێشكه‌ش كرد.
هه‌ر له كۆبوونه‌وه‌كه‌دا كه سه‌رله‌به‌یانی ڕۆژی شه‌ممه 4/5/2018 له هه‌ولێر به‌ڕێوه‌چوو و مارتن وار كونسولی گشتیی به‌ریتانیا له هه‌رێمی كوردستان و شاندێكی به‌ریتانی ئاماده‌ی بوون، په‌یوه‌ندییه‌كانی به‌ریتانیا له‌گه‌ڵ عێراق و هه‌رێمی كوردستان، ڕه‌وشی سیاسی و ئه‌منی و ئابوریی عێراق، ڕۆڵی هه‌رێمی كوردستان له پێكه‌وه‌ژیان و پاراستنی هه‌موو پێكهاته‌كان بێ جیاوازی خرانه به‌ر باس و گفتوگۆ.
هه‌ردوولا بیروڕایان له‌سه‌ر چۆنیه‌تیی جێگیركردنی سه‌قامگیری له عێراق به پشتگیریی كۆمه‌ڵگه‌ی نێوده‌وڵه‌تی، پرۆسه‌ی سیاسی له هه‌رێمی كوردستان و په‌یوه‌ندییه‌كانی هه‌ولێر ـ به‌غدا ئاڵوگۆڕ كرد، له‌مباره‌یه‌وه سه‌رۆك وه‌زیران خواستی هه‌رێمی كوردستانی بۆ چاره‌سه‌ركردنی كێشه‌كان له ڕێگه‌ی گفتوگۆ و به‌پێی یاسا و ده‌ستووری عێراق دووپات كرده‌وه.
