محەمەد تەها ئاكرەیی بەرهەمێ (ئەز و توو) ل جەژنێ دێ بەلاڤكەت
هونەرمەندێ ناڤدارێ كوردستانێ محەمەد تەها ئاكرەیی كو نۆكە ل وەلاتێ سوید دژیت و مامۆستایە ل وی وەلاتی، دوماهیك بەرهەمێ خوە ب ناڤێ (ئەز و توو) بەرهەڤكریە بۆ بەلاڤكرنێ.
هونەرمەند محەمەد تەها ئاكرەیی بۆ (باسنیوز) راگەهاند: “ل سەرۆ بەندێ بانگەشەیا هەلبژارتنێن رێفراندۆما سەربەخۆیا كوردستانێ ساڵا 2017 ێ من بەرهەمەك بەرهەڤكر كو من ڤیا ل گەل بانگێ دروستبوونا دەولەتا كوردستانێ بەلاڤكەم بەلێ مخابن دەولەت نەهاتە راگەهاندن و من ژی بەرهەمێ خوە بەلاڤنەكر. ژبەر رەوشا كوردستانێ هەتا نۆكە من راگرتبوو، بەلێ بریارە بۆ جەژنا رەمەزانا ئەڤساڵە بەلاڤ كەم.
گۆتژی: “نووترین بەرهەم ب ناڤێ (ئەز و توو) كو ژ پەیڤ و ئاوازێن هەلبەستڤان هونەرمەندێ كورد عەبدولرەحمان حاجیی یە. بەرهەم پێك دهێت ژ نەهـ تراكا و ل ستودیویا حەسەن شەنگۆ ل كوردستانێ هاتیە دروستكرن ، بریارە ئەڤ بەرهەمە ل جەژنا رەمەزانا ئەڤساڵە بهێتە بەلاڤكرن ب رێكا كەنالێ منێ تایبەت ل یۆتوبێ، بەرهەمێ (ئەز و توو) ژ سترانێن لسەر كوردستانێ و ئەڤینیێ تێدا نە .نۆكە نەشێم چۆ كلیپا دروستكەم ژبەركۆ مامۆستامە ل وەلاتێ سوید. دێ مەها تەموزا ئەڤسالە ب زڤرمەڤ كوردستانێ.
