نووسەرێکی سلێمانیی یەکێتیی بووەتە نووسینگەیەکی شەخسیی چەند باوکێک“ کە کاری سەرەکییان دۆزینەوەی پۆستە بۆ منداڵەکانیان
دوای ئەوەی بەهۆی ناکۆکی ناوخۆ یەکێتی نەیتوانی کاندید بۆ ئەو پشکانە دیاری بکات کە لەحکومەت بەریاندەکەوێت،نووسەرێکی سلێمانیی بە توندی ڕەخنە لە سیاسەتی ئێستای یەکێتیی نیشتمانیی کوردستان دەگرێت و ئاشکرای دەکات کە ئەو حزبە ”بووەتە نووسینگەیەکی شەخسیی چەند باوکێک“ کە کاری سەرەکییان دۆزینەوەی پۆستە بۆ منداڵەکانیان.
ئاراس فەتاح کە نووسەرێکی سلێمانییە، لە نوێترین وتاریدا کە بە ناونیشانی (یه‌كێتی نیشتیمانیی كوردستان: حیزبێك بێ نیشتیمانی سیاسیی)، ئاماژەی بەوە داوە، یەکێتی بووە بە ھێزێک کە ھیچ شوناسێکی سیاسیی و فیکریی نەماوە، ساڵانێکە وێنەی خۆی لەدەست داوە و بە سێبەرەکەی دەژیی، سێبەرێک کە خۆی لێبووە بە ئۆرجیناڵ.
لە بەشێکی دیکەی نووسینەکەیدا ئاراس فەتاح باسی لەوە کردووە، یەکێتی لە حیزبێکی جەماوەرییەوە ”بووە بە چەندین نووسینگەی شەخسیی چەند باوکێکی سیاسی کە وەزیفە و کاری سەرەکییان بووە بە دۆزینەوەی پۆست و پێگەی سیاسیی و ئابووریی بۆ منداڵەکانیان“. ئەوەشی نەشاردووەتەوە کە یەکێتی پاش لەدەستدانی شوناسی خۆی و لاساییکردنەوەی پارتی دیموکراتی کوردستان، ”ئەوەی پێی دەگوترێت خەمی سیاسی و پڕۆژەی نیشتمانی بۆ باشترکردن و دابینکردنی ژیانێکی شەرەفمەندانە بۆ هاووڵاتییانی ھەرێم، لە فەرھەنگی سیاسەتی یەکێتیدا بوونی نەماوە“.
ئەو نووسەرە کە لە سلێمانیدا ناوبانگی هەیە، یەکێتی بە ”قەلەڕەش“ێک شوبهاندووە کە ”رۆیشتنی سیاسیی خۆی بیرچووەتەوە، چونکە نە توانی لەگەڵ گۆڕاندا ڕێبکات و پەیمانی دەباشان جێبەجێ بکات، نە توانیشی ھاوتای ھەیمەنەی پارتی ڕێبکات و ببێتە رکابەرێکی سیاسیی راستەقینە“. هەروەها نووسیویەتی: ”ساڵانێکە ئەم حزبە بووە بە قەفەسێکی سیاسیی گەورە کە تیایدا ھەر باڵندەیەک بەپێی بەرژەوەندییە ئابووریی و تەکەتولییەکانی خۆی لە ئاوازێک دەخوێنێت. لەم دۆخەشدا ئەگەر دەنگێکی ناڕەزایەتیشی بەرامبەر بە ھەیمەنەی پارتیی تێدابێت، ون دەبێت، چونکە تەنھا گوێت لە ژاوەژاوێکی گەورەیە“.
