مەسروور بارزانی بۆ پێکھێنانی حکوومەت رادەسپێردرێ
په‌رله‌مانتارێكى پارتی دیموكراتى كوردستان له په‌رله‌مانی كوردستان ڕای گه‌یاند، ئاماده‌كاریی ته‌واو بۆ مه‌راسیمی سوێندخواردنی سه‌رۆكی هه‌رێم له ڕۆژی ۱۰ی حوزه‌یران كراوه، ئاشكرایشى كرد كه هه‌مان ڕۆژ مه‌سروور بارزانی وه‌ك سه‌رۆكی ئه‌نجوومه‌نی وه‌زیرانی هه‌رێمی كوردستان ناوزه‌د ناكرێت به‌ڵكو دانیشتنه‌كه به كراوه‌یه‌ى ده‌مێنێته‌وه و بۆ ڕۆژى دواتر ۱۱ی حوزه‌یران ڕۆژى سێ شه‌ممە ناوزه‌د ده‌كرێت.
شوان کەریم زراری په‌رله‌مانتارى پارتی دیموكراتى كوردستان له په‌رله‌مانی كوردستان به (خواکوڕك)ـی ڕاگه‌یاند، ته‌واوی ئاماده‌كارییه‌كانی سوێندخواردنی نێچیرڤان بارزانی سه‌رۆكی هه‌ڵبژێردراوی هه‌رێمی كوردستان كۆتایی هاتوون، ڕۆژی ۱۰ی حوزه‌یران دووشه‌مى داهاتوو، سه‌عات ۱۱ی سه‌ر له‌به‌یانی به ئاماده‌بوونی نوێنه‌رانی وڵاتان و عێراق و حزب و لایه‌نه سیاسییه‌كان، له مه‌ڕاسیمێكی گه‌وره‌دا سه‌رۆكی هه‌رێم سوێندی یاسایی ده‌خوات.
زراری ئاشكراى كرد، به‌هۆی ئه‌وه‌ی سه‌ركرده عێراقی و كوردستانییه‌كان و نوێنه‌ری حزبه كوردستانییه‌كان و نوێنه‌ری وڵاتان و باڵیۆز و كۆنسوڵه‌كان، له مه‌ڕاسیمی سوێندخواردنی سه‌رۆكی هه‌رێم ده‌بن، په‌رله‌مان بڕیاریدا دانیشتنه‌كه له هۆڵی شه‌هید سه‌عد عه‌بدوڵا به‌ڕێوه‌بچێت.
ئه‌وه‌یشی خسته‌ڕوو كه “به‌گوێره‌ی به‌رنامه‌ی كاری په‌رله‌مان، ڕۆژى ۱۱ی حوزه‌یران له په‌ره‌له‌مانه‌وه پارتى وه‌ك فڕاكسیۆنی زۆرینه و براوه ناوزه‌ندی سه‌رۆكوه‌زیران مه‌سروور بارزانی ده‌كات، پاشان مه‌ڕسوومی سه‌رۆكایه‌تی له‌لایه‌ن سه‌رۆكی هه‌رێمی كوردستان ده‌رده‌چێت و هه‌نگاوه‌كانی پێكهێنانی حكوومه‌ت ده‌ست پێده‌كات”.
ڕۆژی ۲۸ی ئایار، لە دانیشتنی پەرلەمانی كوردستان نێچیرڤان بارزانی سه‌رۆكی ئه‌نجوومه‌نی وه‌زیران له كابینه‌ی هه‌شته‌م و جێگری سه‌رۆكی پارتی دیموكراتی كوردستان، به ٦۸ ده‌نگی ئه‌ندامانی په‌رله‌مان وه‌ك سه‌رۆكی هه‌رێمی كوردستان هه‌ڵبژێردرا كه ده‌نگی په‌رله‌مانتارانی پارتی، یه‌كێتی، گۆڕان، پێكهاته‌كان و سۆسیالیست بوون و یه‌كێتی به‌شداریی كۆبوونه‌وه‌كه‌ی نه‌كرد.
