حكوومه‌تى به‌ريتانيا پیرۆزبایی له نێچیرڤان بارزانی ده‌كات
ئه‌مڕۆ چوارشه‌ممه 12/6/2019 له په‌یوه‌ندییه‌كی ته‌له‌فۆنیدا له‌گه‌ڵ به‌ڕێز نێچیرڤان بارزانی سه‌رۆكی هه‌رێمی كوردستان، به‌ڕێز د. ئه‌ندرۆ مۆریسن وه‌زیری ده‌وڵه‌تی به‌ریتانیا بۆ كاروباری ڕۆژهه‌ڵاتی ناوه‌ڕاست و په‌ره‌پێدانی نێوده‌وڵه‌تی، به ناوى حكوومه‌تى به‌ريتانياوه پیرۆزبایی له به‌ڕێزيان كرد و هیوای سه‌ركه‌وتنی بۆ خواست له ئه‌رك و پۆستی نوێیدا.
هه‌ر له په‌یوه‌ندییه ته‌له‌فۆنییه‌كه‌دا به‌ڕێز مۆریسن جه‌ختی له پته‌وكرنی زیاتری په‌یوه‌یندییه‌كانی نێوان هه‌رێمی كوردستان و به‌ریتانیا له هه‌موو بواره‌كاندا له‌ژێر سه‌ركردایه‌تيی سه‌رۆك نێچیرڤان بارزانیدا كرده‌وه.
لای خۆیه‌وه به‌ڕێز سه‌رۆكی هه‌رێمی كوردستان سوپاسی په‌یوه‌ندیی ته‌له‌فۆنی و پیرۆزباییه‌كه‌ی كرد و ئه‌و په‌يوه‌ندييه‌‌ى به ده‌رفه‌ت زانى بۆ ئه‌وه‌ى سوپاسی هه‌رێمى كوردستان بۆ هاوكاری و پیشتگیرییه‌كانی به‌ریتانیا له كاته سه‌خته‌كاندا دووپات بكاته‌وه، هه‌روه‌ها خواستى هه‌رێمی كوردستانى بۆ به‌ره‌وپێشبردنی زیاتری په‌یوه‌ندییه‌كانی له‌گه‌ڵ به‌ریتانیا له هه‌موو بواره‌كاندا، نيشان دا.
