پارتی ناوی به‌ربژێره‌كانی بۆ کابینەی داهاتووی حکومەتی هەرێم ڕاده‌ستی مه‌سرور بارزانی ده‌كات
راوێژكاری مەكتەبی سیاسیی پارتی دیموكراتی كوردستان رایگەیاند، لیژنەیەكی باڵا ناوی وەزیرانی پشكی پارتی لە كابینەی نوێدا ئامادە كردووە و بە چەندین فیلتەردا تێپەڕ بوونە و چەندین مەرجیشیان بۆ دانراوە، بۆیە بڕیارە تاوەكو ھەفتەی داھاتوو مەكتەبی سیاسی كۆ ببێتەوە و پەسەندیان بكات.
عارف روشدی، راوێژكاری مەكتەبی سیاسیی پارتی ڕایگه‌یاند، پارتی دیموكراتی كوردستان لیژنەیەكی باڵای بۆ یەكلاكردنەوەی كاندیدەكانی وەزارەتەكانی پشكی پارتی پێك ھێناوە و ئێمە ھیچ كێشەیەكمان نییە و كاندیدەكانمان ئامادەن، كە بە چەندین فیلتەردا تێپەڕ دەبن و ئێستاش لە لیژنەیەكی تایبەتن و پێشكەشی مەكتەبی سیاسی پارتی دەكرێن، هەروەها بە زووترین كات كۆبوونەوەی مەكتەبی سیاسی دەكرێت، كە دەكەوێتە ھەفتەی داھاتووەوە و پەسەندیان دەكات، چونكە دواجار مەكتەبی سیاسی بڕیاری كۆتایی لەسەر دەدات”.
روشدی گوتیشی: مەرجی پارتی بۆ وەزیرەكانی ئەوەیە، ئەو كەسانەی دەبنە وەزیر، پێویستە كەسانی شارەزا بن و ھەڵوێستی نیشتیمانییان ھەبێت و لەگەڵ سیاسەتی پارتیدا بن كە نەتەوەییە، بۆیە پێویستە ئەو مەرجانەیان ھەبێت تاوەكو ببنە وەزیر لە پشكی پارتی، ھەر كاتێكیش مەكتەبی سیاسی ناوی كاندیده‌كانی پەسەندی كرد، پێشكەشی مەسروور بارزانی دەكرێن.
