رۆژنامەیەكی ئیماراتی: قاسم سولەیمانی سەرۆككۆماری عێراقە
لە ڕۆژنامەیەکی ئیماراتیدا، رەخنەی توند لە سەردانەکانی سەرۆک کۆماری عێراق دەگیرێت و ئەو بانگەشانەی ڕەت دەکرێتەوە کە لەبارەی بێلایەنیی عێراق لە کێشەی نێوان ئەمریکا و ئێران دەیکات و دەشلێت”قاسم سولەیمانی سەرۆككۆماری عێراقە”.
ئیبراهیم زوبەیدی، نووسەری عێراقی، لە وتارێکیدا بە ناوی (قسەکانی سەرۆکی گەشتکردوو) کە لە ڕۆژنامەی (العرب)ی ئیماراتیدا بڵاوی کردووەتەوە، بە توانجەوە ئاماژەی بەوە داوە کە بەرهەم ساڵح عاشقی راستەقینەی ئاشتییە، لەو ڕۆژەوەی چووەتە کۆشکی کۆماریی عێراق (سەلام)، ئەو لە گەشت دایە و لە گەشتەکانیشی بێزار نابێت، لە هیچ گەشتێکیش ناگەڕێتەوە تاوەکوو بە نیازی گەشتێکی نوێ نەبێت، لە پێناو ئاشتیدا. ”ئەو خەون بەوەوە دەبینێت کە ڕێگە نەدات عێراق ببێتە گۆڕەپانی ململانێی نێوان ئێرانی دراوسێ و ڕکابەرە یەکگرتووەکانی کە دۆناڵد ترامپ، سەرۆکی ئەمریکا و سەرکردەکانی شانشینی عەرەبیی سعوودی و ئیماراتی عەرەبیی یەکگرتوو و میسڕ و بەحرەینە“.
زوبەیدی لەو نووسینەیدا باسی لەوە کردووە کە بەپێی لێدوانەکانی سەرۆک کۆماری عێراق لە کەناڵەکانەوە ”کە کۆتاییان نایەت“، ئەم گەشتانەی تەنیا لە پێناو ”چاککردنەوەی دەوڵەتە بچووکەکەیەتی کە عێراقە“، هەروەها دوورخستنەوەی ئاگری شەڕێکی پێشبینیکراو لە داهاتوودا.
نووسەر ئاماژەی بەوە داوە کە گرنگتر لە گرنگ ئەوەیە، هەوڵەکانی بەرهەم ساڵح بەرهەمدار و سەرکەوتوو دەبێت، ئەگەر ئێرانی دراوسێی عێراق بڕیار بدات، بە نیەتێکی باش بۆ حکوومەتێکی رەشید دەگەڕێتەوە، هەروەها دان بە هەڵەکانیدا دەنێت و ئامادەیی خۆی بۆ تۆبەکردن لە دەستێوەردان لە ژیانی ئەوانی دیکە دەردەبڕێت، هەروەها واز دەهێنێت لە پارەدارکردنی میلیشیاکانی کوشتن و وەدەرنان و تێکدان و ئاژاوەگێڕی لە عێراق و سووریا و لوبنان و یەمەن و فەلەستین، هەرەوها لە قاچاخیی چەک و پیلانگێڕی و دەسیسەیی، هەروەها داوای لێبووردن لەوانە دەکات کە بەهۆی سیاسەتی داگیرکاریی و فراوانخوازیی ئەوەوە زەرەرمەند بوون، ئەوکاتەش هەمووان بە ئاشتی دەژین، بەبێ بۆمبی چێنراو و مووشەک و فڕۆکەی دڕۆن و مین.
هەروەها سەردانەکانی بەرهەم ساڵحی بۆ پایتەختەکانی عەرەبی و هەرێمی و نێودەوڵەتی “بە داواکاریی ئێران یان بەبێ داواکاریی ئێران”، بە خەونبینن بە فڕینی بزن یان هێلکەکردنی کەڵەشێر وەسف کردووە. بۆیە دەڵێت ئەو گەشتانەی سەرۆک کۆماری عێراق کە کۆتاییان نایەت، “تەنیا کات دەکوژێت و هەوڵ و پارەیەکی زۆر بەفیڕۆ دەدات”.
ئیبراهیم زوبەیدی لە وتارەکەیدا نووسیویەتی: “ئەو واقیعەی کە گەلی عێراقی بێزارکردووە لە دووبارەبوونەوەی سکاڵاکانی، ئەوەیە کە حاجی قاسم سولەیمانی، نوێنەری عەلی خامنەیی، ڕابەری باڵای ئێران، سەرۆک کۆماری عێراق، سەرۆک وەزیران، سەرۆکی پەرلەمان، بزوێنەری وەزیرەکان و بەڕێوەبەرەکان و باڵیۆزەکانیەتی، هەر ئەو سەرۆکی سوپاس و پۆلیس و ئاسایشی عێراقە”.
دووپاتیشی کردووەتەوە: “تەنانەت بەردەست و خزمەتکاری کۆشکەکانی سەرۆکایەتی و وەزارەتەکان و پەرلەمان و بانکی ناوەندی و کەناڵەکان و تەلەڤزیۆنەکان و ڕۆژنامەکان و پارکەکان و باڕ و کۆگاکانی ماددەی هۆشبەر، لەلایەن بەڕێز مەندوبی سامی ئێرانییەوە دانراون”. ڕوونیشی کردووەتەوە کە هەر کەسێک لە سەر کورسیی حکوومی دابنیشێت لە عێراقدا، هیچ بژارەیەکی دیکەی نییە، جگە لە پڕکردنەوەی گیرفانی خۆی و ڕۆڵەکانی و برا و خوشک و زاواکانی بە پارەی عێراق، “جا ئاساییە لەسەر کورسییەکە دابنیشێت بەبێ چاو و گوێ و زمان، هەروەها ببێتە ئێرانییەک زیاتر لە ئێرانییەکان”.
نووسەرەکە بە باشتریزانیوە سەرۆک کۆماری عێراق لە کۆشکەکەیدا بێت و “واز لە ڕۆشتن بەدوای سەرابدا بهێنێت” و چیتر ئەو گەشتانە نەکات کە هیچیان لێوە بەرهەم نایەت. دەشڵێت: “هاووڵاتیی عێراقی پێش خەڵکی دیکە و زیاتریش لە خەڵکی دیکە، دەزانن کە عێراق دەوڵەتێکی بێلایەن نییە تاوەکوو ئاشتی لە نێوان ئێران و ڕکابەرەکانی بێنێتە دی، لەبەر ئەوە نا کە بەرهەم ساڵح لایەنگرە و گرنگی بە پاراستنی پشتێنەی سیستەمی ئێرانی دەدات، بەڵکوو لەبەرئەوەی ئێران خۆی ئاشتی ناوێت”.
زوبەیدی پێشنیازی کردووە کە بەرهەم ساڵح بەپێی ئەو دەسەڵات و بودجە بەرزەی هەیەتی، کاتی خۆی و هەوڵەکانی بۆ چاودێریکردنی دامەزراوە ڕۆشنبیری و گەشتیاری و هونەرییەکان تەرخان بکات، شەقام و گۆڕەپان و پارک و کەنارەکانی عێراق پڕ بکات لە گوڵ و تابلۆ و پەیکەر و گرووپی مۆسیقی و سەما و گۆرانی گوتن، بۆ ئەوەی هەندێک هیوا لە نێو گەلی عێراقی خەمباردا بچێنێت، “ئەوەش بەسوودترە بۆ خۆی و بۆ ئێمە و سەرۆکایەتیش، هەروەها بۆ دراوسێ دوور و نزیکەکان”.
چاودێران پێیانوایە کە دوور نییە سەرەتای تێکچوونی پەیوەندیی نێوان سەرۆک کۆماری عێراق لەگەڵ وڵاتانی (سعودیە، ئیرارات، ئوردن و ئیسرائیل) دەست پێ بکات و بڵاوکردنەوەی ئەو وتارەش لە ڕۆژنامەی (العرب)ی ئیماراتی، بەشێک بێت لەو تێکچوونی پەیوەندییە.
