فراكسیۆنی پارتی لەبارەێ كیشەی كارەبای دھۆك ھاتە دەنگ
فراکسیۆنی پارتی دیموکراتی کوردستان لە پەرلەمانی کوردستان، راگەیاندراوێک لەبارەی دۆخی خزمەتگوزارییەکانی شاری دهۆک بۆ هاووڵاتییانی شارەکە بڵاو دەکاتەوە.
بەپێی ئەو ڕاگەیاندراوە، فراکسیۆنی پارتی ئاگاداری ڕەوشی پارێزگای دهۆک و کێشەی کارەبایە لەو پارێزگایە، فراکسیۆنەکەش بۆ چارەسەرکردنی هەموو هەوڵێک دەدات.
هاوکات ئاشکرا کراوە کە لەگەڵ لایەنە پەیوەندیدارەکان و تەنانەت نێچیرڤان بارزانی، سەرۆکی هەرێمی کوردستانیش لەسەر هێڵن، بە مەبەستی چارەسەرکردنی هەرچی زووتری کێشەی کارەبایە لە دهۆک. بۆ ئەم مەبەستەش نامەیەکیان خستووەتە بەردەست سەرۆکی هەرێمی کوردستان.
ئەمەش دەقی راگەیاندراوەکەیە:
ژ فراکسیۆنا پارتی ل پەرلەمانی کوردستانێ بو ھەڤوەڵاتیێن پارێزگەھا دھۆکێ
ئەم وەکو فراکسیۆنا پارتی ل پەرلەمانێ کوردستانێ، باش دزانین پاریزگەھا دھۆکێ کێشەیا کارەبێ ھەیە. خەڵکێ مە ل ئەڤێ پاریزگەھێ ژبەر بلندبوونا پلێن گەرمێ ل وەرزێ ھاڤینیدا، پیتڤیێن زێدەتر ب کارەبێ ھەنە. فراکسیۆنا پارتی دێ ھەموو خەباتێ کەت ژبوو چارەسەرکرنا ئەڤێ ئاریشێ.
ھەڤوەڵاتیێن زێدە ئازیز…
ئەم ھەوەیێن زێدە بەڕێز ئاگەدار دکەین، ل گەڵ لایەنێن پەیوەندیدار، بتایبەت ل گەڵ بەڕیز جەنابێ نیچیرڤان بارزانی، سەرۆکێ ھەرێما کوردستانێ ل سەر خەتین، کو ب زووترین دەم، ئەڤێ ئاریشەێ تاڕادەیەکێ باش ل بەرژەوەندیا خەڵکێ مەدا ئێکلای بکەین.
وەکو فراکسیۆنا پارتی ل پەرلەمانێ کوردستانێ، نامەیەک کو گۆزارشت ژ ھەموو داخوازیێن رەوا یێن خەڵکێ پارێزگەھا دھۆکێ دکر، لەسەر کێشا کەمیا کارەبێ و بلندبوونا بھایێ ئەمپێرا کارەبێ و ھەموو کێشەیێن کارەبێ و دەرئەنجامێن وێ و چاوانیا چارەسەرکرنا ئەڤێ کێشا ھە، مە ئێخستە بەردەم جەنابێ سەرۆکێ ھەرێما کوردستانێ.
رێزدار سەرۆکێ ھەرێما کوردستانێ بخوشحالیڤە و دەم ل دەست بەرسیڤا ناما فراکسیۆنا پارتی دا، کو دێ ب زووترین دەم کار بکەت لە گەڵ لایەنێن پەیوەندیدار بۆ چارەسەریا ئەڤێ کێشێ و گوتییە “ئەز ئاگادارم و دێ ب جددی کار لەسەر چارەسەریا ئەڤێ کێشێ کەم”.
بەڕێزان…
ئەم باش دزانین خەڵکێ مە مافێ وێ چەندێ ھەیە کو ب باشترین و خۆشترین شێوازێ ژیانێ بژین، لسەر حکومەتا مەژی ھەیە ئەوا مومکین بیت، پێتڤیێن خەلکێ مە دابین بکەن. ئەم وەکو فراکسیۆنا پارتی ل پەرلەمانێ کوردستانێ سۆزێ دەین، ئەوا دشیانێ مەدابیت خەمساریێ نەکەین و خەباتێ بکەین بۆ گەھاندنا داخوازیێن خەڵکێ خوە و چاڤدێریکرنا بجھئینانا ئەوان داخوازییا.
پشت ڕاست بن، تنێ ئامانجا مە، خزمەتا ھەڤوەڵاتییایە.
ئارامی و سەرفیرازی بۆ خەڵکێ مە
فراکسیۆنا پارتی دیموکراتی کوردستان ل پەرلەمانێ کوردستانێ
٣/٧/٢٠١٩
