مەسروور بارزانی کارنامەی کابینەی نۆیەمی راگەیاند
مەسروور بارزانی دوای متمانە و خواردنی سوێندنی یاسایی، گوتارێکی پێشکەشکرد و کارنامەی خۆی و کابینەکەی وەک سەرۆکوەزیرانی نوێ راگەیاند.
ئەمڕۆ چوارشەممە 10-7-2019 دوای پێدانی متمانە و خواردنی سوێندنی یاسایی، مەسروو بارزانی، سه‌رۆكی ئه‌نجوومه‌نی وه‌زیرانی هەرێمی کوردستان گوتارێکی پێشکەش کرد و کارنامەی حکومەتی خوێندنەوە و رایگەیاند: “پلان و ئامانجەکانمان بۆ خزمەتی هاووڵاتیان لە چوارچێوەی بەرنامەیەکی کار رێکخستووە، کە نەخشەڕێگەی سەرەکی و گشتیمان دەبێت لە کابینەی نوێی حکومەتی هەرێمی کوردستان”.
دوای متمانە بەخشین پێی، مەسرور بارزانی وتارێکی پێشکەش کرد و تێیدا بەرنامەی کاری کابینەکەی ئاشکرا کرد.
دەقی بەرنامەی کاری حکوومەت لە قۆناغی داهاتوو:
هێڵە گشتییەکانی کارکردنی حکوومەتی هەرێمی کوردستان
– لە ئاستی چاکسازیدا:
١- کار بۆ چاکسازی دەکەین لە کەرتی وەزیفەی گشتی
٢- کار دەکەین بۆ نەهێشتنی رۆتین و خێراکردنی ڕاپەڕاندنی ئیشوکاری هاووڵاتییان.هەرچی زووترە پەرە بە خزمەتگوزارییە ئەلیکترۆنییەکان دەدەین.
٣- نابێ بەرپرسانی حکوومەت پێگەی خۆیان بۆ کاری بازرگانی بەکار بهێنن و نابێ کاری بازرگانی و بەڵێندەرایەتی و وەبەرهێنان بکەن.
٤- ئەنجامدانی ئیفاد بەپێی پێویست دەبێت و ڕێگە لە بەهەدەردانی سامانی گشتی لەم بوارە دەگرین.
٥- ڕێگە دەگرین لە بەهەدەردانی سامانی گشتی و زیادەڕۆییکردن بۆ سەر موڵکی گشتی.
٦- کار دەکەین بۆ چەسپاندنی شەفافیەت لە گشت بوارە داراییەکانی هەرێمی کوردستان بەتایبەتیش بواری داهاتە نەوتییەکان و کار بۆ دانانی سندووقی داهاتە نەوتییەکان دەکەین.
٧- چاکسازی لە کەرتی تەندرووستی و خۆراک و دەرمان دەکەین و ڕێگەی یاسایی دەگرینە بەر بۆ ئەم مەبەستە.
٨- چاکسازی لە سیستەمی باج دەکەین و دەبێت دادپەروەری لە وەرگرتنی باج جێگیر ببێت و ڕێگە دەگرینە بەر لە خۆدزینەوە لە باج.
٩- کار بۆ رێگەگرتن لە قۆرخکاری دەکەین.
١٠- پشتیوانی کاری چاودێریی پەرلەمان دەکەین و پابەند دەبین بە هەموو ڕێکارەکانی چاودێری لە پەرلەمان و ڕێز لە ئۆپۆزسیۆنی پەرلەمانی دەگرین.
١١- سندووقی خانەنشینی بەپێی یاسای پەیوەندیدار لە هەرێمی کوردستان دادەنێین تاوەکوو گەرەنتیی مووچەی خانەنشینان بکات.
١٢- بە هەماهەنگی لەگەڵ سەرۆکایەتیی هەرێمی کوردستان پێداچوونەوە بە ڕێکخستنی هێزی پێشمەرگەی کوردستان دەکەین و هەوڵ دەدەین ئەم هێزانە لە ستانداردە سەربازییەکان نزیک بکەینەوە.
١٣- کار دەکەین بۆ سەروەریی یاسا و نابێت کەس لە کوردستاندا لە سەرەوەی یاسا بێت، کەس ڕێگەی پێ نادرێت بەهۆی پێگەی حزبی و سیاسی لە یاسا رابکات.
– لە ئاست خزمەتگوزارییەکاندا:
١- کار بۆ باشترکردنی کەرتی تەندرووستی دەکەین و هەوڵی دانانی سیستەمی بیمەی تەندرووستی دەدەین.
٢- کار دەکەین بۆ چارەسەرییەکی بنەڕەتی بۆ کێشەی کارەبا لە زیادکردنی ئاستی بەرهەمهێنان و کار دەکەین بۆ رێکخستنەوەیەکی گونجاوی نرخی کارەبا
٣- کار دەکەین بۆ ڕیکخستنەوە و پێشخستنی کەرتی پەروەردە و پێداچوونەوە بە سیستەمی پەروەردە.
٤- کار دەکەین بۆ سوودوەرگرتن لە سەرچاوە ئاوییەکانی سەر زەویی هەرێمی کوردستان و گەیاندنی بە هەموو ناوچەکان تا بکرێت ئاوی ژێر زەوی بە هەدەر نەدرێت.
٥- کار دەکەین بۆ پێشخستنی ڕێگەوبانی هەرێم و ڕاکێشانی وەبەرهێنەرانی بیانی لەم بوارە.
٦- کار دەکەین بۆ فراوانکردنی وەبەرهێنان لە بوارە جیاجیاکانی کشتوکاڵ و پیشەسازی و گەشتوگوزار تا دەرفەتی کار زیاتر بکرێت.
٧- کار بۆ ڕێکخستنەوەی دۆخی کرێکاران
٨- کار دەکەین بۆ پێداچوونەوە بە لیستەکانی زیندانییانی سیاسی و ئەو ناوانەی بە نایاسایی زیاد کراون.
٩- گرنگییەکی تایبەت بە خاوەن پێداویستییە تایبەتەکان دەدەین.
١٠- کار دەکەین بۆ بەکارخستنی سیستەمێکی پێشکەوتووی ریسایکلین و دوورخستنەوەی مەترسییە ژینگەییەکان.
١١- لەسەر شێوازێکی دادپەروەرانە کار بۆ ئاوەدانکردنەوەی گوند و ناحیەکان دەکەین.
١٢- گرنگیی تایبەت بە فراوانکردنی پانتایی کاری ڕێکخراوەکانی کۆمەڵگەی مەدەنی دەدەین.
١٣- کار بۆ گرنگیدان بە خوێندنی باڵا و توێژینەوەی زانستی دەکەین لە ڕێگەی بەرزکردنەوەی لایەنی جۆریی زانکۆکان و کار بۆ ڕێکخستنەوەی کاری زانکۆ و پەیمانگا ئەهلییەکان لە ڕووی کوالێتی و نرخیان دەکەین.
١٤- کار بۆ فەراهەمکردنی خزمەتگوزارییە ئەلیکترۆنییەکان لە ئەرکە لەپێشینەکانمان دەبێت و لەم ڕووەوە ڕێگە لە ڕۆتین دەگیرێت.
١٥- گەنجانمان سەرمایەیەکی نیشتمانیی گەورەن و لە هەموو وەزارەتەکان کار بۆ بەکارخستن و ئاراستەکردنی تواناکانیان بۆ بونیادنانی کۆمەڵگەیەکی تەندرووست دەکەین.
١٦- شوێنەوارەکانمان بەشێکن لە مێژووی نەتەوە و کۆمەڵگەکەمان و کار بۆ پاراستنینان دەکەین و هەوڵی گەشەپێدانیان دەکەین.
– لە ئاستی پەیوەندیی نێوان هەولێر و بەغدا
١- دەستەی دانوستان بۆ دانوستاندن لەگەڵ بەغدا بۆ بەدەستهێنانی مافە دەستوورییەکانی گەلەکەمان پێک دێنین.
٢- دەستوور بنچینەی دانوستانەکان دەبێت و ماددەی ١٤٠ و سەرجەم مافە دەستوورییەکانی هاووڵاتییانی هەرێم لە نزیکترین کاتدا بابەتی گفتوگۆمان دەبێت لەگەڵ حکوومەتی عێراق.
٣- هەوڵەکانمان بۆ ئاساییکردنەوەی دۆخی کەرکووک و ناوچە کوردستانییەکان دەستی پێکردووە و جەخت دەکەینەوە کە هەرچی زووە دۆخی ئەو ناوچانە ئاسایی بکرێتەوە و بگەڕێندرێتەوە بۆ پێش ١٠ی ٦ی ٢٠١٤.
٤- هەڕەشەی تیرۆر هێشتا جددییە و حکوومەتی هەرێمی کوردستان ئامادەی ڕووبەڕووبوونەوەی ئەو هەڕەشانەیە و ئامادەیە لەم چوارچێوەیەدا هاوکاریی هێزەکانی عێراق بکات لە ناوچەکانی دەرەوەی ئیدارەی هەرێمی کوردستان.
٥- کار بۆ بەدەستهێنان و بەهێزکردنی مافەکانی هێزی پێشمەرگەی کوردستان لە چوارچێوەی هێزی بەرگریی عێراق دەکەین.
٦- هەوڵ دەدەین یاسای نەوت و غاز لە لایەن پەرلەمانی عێراق دەربچێت.
٧- جەخت لە ڕەچاوکردنی پشکی هەرێمی کوردستان لە دامەزراوەکانی عێراق بە گشتی و وەزارەتەکانی دەرەوە و نەوت بەتایبەتی دەکەینەوە.
٨- جەخت لەسەر پرەنسیپەکانی تەوازون و تە
٩- جەخت لەسەر دەرکردنی یاسای دادگای فیدرالیی عێراق دەکەینەوە
– لە ئاستی ئازادییە گشتییەکاندا
١- جەخت لە پێکەوەژیانی سەرجەم پێکهاتەکانی هەرێمی کوردستان دەکەینەوە و ئەو تایبەتمەندییەی هەرێم بەهێزتر دەکەین.
٢- پێداگری لەسەر ئازادی دەکەینەوە و دژی هەموو دەمارگیرییەک دەوەستینەوە.
٣- دژی هەر جیاکارییەکی رەگەزی دەوەستینەوە و پێویستە ئافرەتان بەشدارێکی کارای سەرجەم بوارەکانی کۆمەڵگەی هەرێمی کوردستان بن.
٤- هاووڵاتییان ئازادن لە چوارچێوەی ژیانی سیاسیی کوردستاندا بیروباوەڕی سیاسیی خۆیان هەبێت و نابێت لە هەرێمی کوردستاندا هیچ کەسێک لەسەر بیروڕای سیاسی سزا بدرێت.
– پەیوەندیی هەرێمی کوردستان و ناوەندە نێودەوڵەتییەکان
١- فەرمانگەی پەیوەندییەکانی دەرەوە لە سەر بنەمای بارودۆخی نوێ ڕێک دەخرێتەوە
٢- پشتگیریی چارەسەری ئاشتییانەی گشت کێشەکانی ناوچەکە دەکەین و پێگەی کوردستان بە ئاراستەیەک بەکار دێنین کە بەشێک بن لە ڕەوتی چارەسەری.
٣- حکوومەتی هەرێم هەوڵی بەهێزکردنی نوێنەرایەتییەکانی و زیادکردنی بەپێی پێویست دەکات.
– لەئاستی ئابووری و دارایی
١- کار دەکەین کە ئابووریی هەرێم فرە ڕەنگ و فرە سەرچاوە بێت.
٢- کشتوکاڵ بوارێکی سەرەکیی گرنگیدانمان دەبێت و کار بۆ پێشخستنی ئەم کەرتە دەکەین.
٣- کار دەکەین بۆ ڕیکخستنەوەی سیستەمی بانکی لە هەرێمی کوردستان.
٤- کار دەکەین بۆ داڕشتنەوە و هەموارکردنەوەی یاسای وەبەرهێنان لە هەرێمی کوردستان.
– لە ئاستی کارگێڕی
١- کار دەکەین بۆ لامەرکەزیەتی پارێزگاکان لە هەرێمی کوردستان.
٢- کاری جددی دەکەین بۆ تەرشیقی هەیکەلیەتی دامەزراوەکانی حکوومەت لە خوارەوە بۆ سەرەوە.
