نێچیرڤان بارزانی پێشوازی لە باڵیۆزی ڕووسیا کرد
سه‌رۆكی هه‌رێمی كوردستان و باڵیۆزی ڕووسیا له عێراق جه‌ختیان له په‌رةپێدانی په‌یوه‌ندییه‌كانی هه‌ولێر و مۆسكۆ و چاره‌سه‌ركردنی كێشه‌كانی نێوان هه‌ولێر و به‌غدا له سه‌ر بنه‌مای ده‌ستوور ده‌كه‌نه‌وه .
ئه‌مڕۆ له هه‌ولێر، نێچیرڤان بارزانی سه‌رۆكی هه‌رێمی كوردستان پێشوازیی له ماكسیم ماكسیمۆڤ باڵیۆزی ڕووسیا له عێراق كرد .
باڵیۆزی رووسیا پیرۆزبایی خۆی و سێرگی لاڤرۆڤ وه‌زیری ده‌ره‌وه و میخائیل بۆگدانۆڤ جێگری وه‌زیری ده‌ره‌وه‌ی ڕووسیای به نێچیرڤان بارزانی ڕاگه‌یاند به‌بۆنه‌ی دەستبەکاربوونى وەک سەرۆکى هه‌رێمی كوردستان و هیوای سه‌ركه‌وتنیان بۆ نێچیرڤان بارزانی خواست، له به‌رامبه‌ردا سه‌رۆك نێچیرڤان بارزانى سوپاسی كردن و سڵاو و رێزی بۆ وه‌زیری ده‌ره‌وه‌ی ڕووسیا و جێگره‌كه‌ی نارد.
لە دیدارەکەدا ھەردوولا جەختیان لە پەرەپێدانی پەیوەندییەکانی ھەرێمی کوردستان و ڕووسیا و چارەسەرکردنی کێشەکانی ھەولێر ـ بەغدا لەسەر بنەمای دەستوور کردەوە، لەمبارەیەوە نێچیرڤان بارزانی ئامادەیی ھەرێمی کوردستانی بۆ چارەسەر نیشان دا و ئاماژەی بە سەردانی دوێنێی شاندێکی باڵای حکوومەتی ھەرێمی کوردستان بۆ بەغدا کرد.
تاوتوێکردنی دۆخی ڕۆژھەڵاتی ناوەڕاست و چەند بابەتێکی پەیوەندیدار بە دۆخی سیاسی و ئەمنیی عێراق و ھەرێمی کوردستانەوە، لایەنێکی دیکەی کۆبوونەوەکە بوو.
