وەزیری دەرەوەی فەرەنسا پەیامێك ئاراستەی مەسرور بارزانی دەكات
وه‌زیری ده‌ره‌وه‌ی فه‌ڕه‌نسا په‌یامێكی پیرۆزبایی ئاراسته‌ی مه‌سرور بارزانی، سه‌رۆكی حكوومه‌تی هه‌رێمی كوردستان كردووه و به‌بۆنه‌ی ده‌ستبه‌كاربوونی وه‌ك سه‌رۆك وه‌زیرانی هه‌رێمی كوردستان، هیوای سه‌ركه‌وتنی له به‌جێگه‌یاندنی ئه‌م به‌رپرسیارییه‌تییه گه‌وره‌یه بۆ خواستووه.
ژان ئیڤ لۆدریان، وه‌زیری ده‌ره‌وه‌ی فه‌ره‌نسا له پیرۆزبایینامه‌كه‌یدا ده‌ڵێت: “له كاتێكدا كه كوردستان و عێراق له سه‌روبه‌ندی پرۆسه‌ی سه‌قامگیریی و ئاشته‌وایی نیشتمانین، ده‌ستبه‌كاربوونی ئێوه قۆناخێكی گرنگه بۆ ئاراسته‌كردنی هه‌رێم بۆ سه‌ر رێگای ئاسایش و سه‌قامگیریی و خۆشگوزه‌رانی. ئه‌و حكوومه‌ته‌ی كه ئێوه پێكتانهێناوه، به‌رپرسیارێتی ئه‌وه‌ی له‌سه‌ر شانه كه به‌رده‌وامیی بدات به‌و ریفۆرمانه‌ی كه وه‌ڵامی خواستی خه‌ڵكی كوردستان ده‌ده‌نه‌وه و فه‌راهه‌مكردنی به‌هێزبوونی په‌یوه‌ندییه‌كانی نێوان به‌غدا و هه‌ولێر، كه له‌ماوه‌ی چه‌ند مانگی رابردوودا ده‌ستیان پێكردووه. ده‌زانم كه هه‌موو هه‌وڵێك ده‌ده‌ن بۆ ئه‌وه‌ی ئه‌م ئه‌ركانه به سه‌ركه‌وتوویی به‌جێبگه‌یه‌نن”.
لۆدریان له په‌یامه‌كه‌یدا ده‌ڵێت:” راوێژكارى ئه‌نجوومه‌نى ئاسایش له كاته هه‌ره سه‌خته‌كانى جه‌نگى دژى داعش، ئێوه رۆڵێكى گرنگتان هه‌بوو له‌سه‌ركه‌وتن له دژى به‌ربه‌رییه‌تى جیهادیی، فه‌ره‌نسا ده‌زانێت كه قه‌رزارى قوربانییه‌كانى پێشمه‌رگه‌یه و تێبینى ئه‌وه‌م كردووه، له‌چوارچێوه‌ى ئه‌و هه‌مه‌هانگییه‌ى كه هه‌یه له نێوان هێزه‌كانمان كه وڵاته‌كه‌م له‌گه‌ڵ ئێوه هاوپه‌یمانێكى وه‌فادار و متمانه پێكراو و به‌هێزى هه‌یه، هاوشێوه‌ى ئه‌و په‌یوه‌ندییه پێشكه‌وتوانه‌ى كه ماوه‌یه‌كى درێژه فه‌ره‌نسا و كوردستانى عێراق پێكه‌وه گرێ ده‌ده‌ن”.
وه‌زیری ده‌ره‌وه‌ی فه‌ره‌نسا ده‌ڵێت: “هیواخوازم كه بتوانین له‌گه‌ڵ حكومه‌ته‌كه‌ى ئێوه كاربكه‌ین بۆ پته‌وكردنى په‌یوه‌ندییه‌كانمان، به‌تایبه‌تیش له‌و بوارانه‌ى كه خه‌ڵكان له‌یه‌كترى نزیك ده‌كه‌نه‌وه وه‌ك بواره‌كانى ئابوورى و كه‌لتوورى و په‌روه‌رده”.
هه‌روه‌ها گوتوویه‌تی: “له‌كۆتاییدا ده‌مه‌وێت سوپاستان بكه‌م بۆ ئه‌و پێشوازییه‌ى كه له‌منتان كرد له هه‌ولێر له‌مانگى كانوونى دووه‌مى ئه‌م ساڵ و هه‌روه‌ها پێشتان رابگه‌یه‌نم كه زۆر خۆشحاڵ ده‌بم كه له داهاتوودا پێشوازى له به‌ڕێزتان بكه‌م له پاریس، رێزدار جه‌نابى سه‌رۆك وه‌زیران، تكا ده‌كه‌م كه بڕوا بكه‌ن له ستایشى بێپایانم”.
