سەرۆكی فراكسیۆنی پارتی لە ئەنجومەنی پارێزگای موسڵ: هەفتەی داهاتوو پارتی 21 پۆستی دیكە لە موسڵ وەردەگرێت
![](https://xwakurk.com/wp-content/uploads/2018/11/1-32.jpg)
دوای ئەوەی پارتی دیموكراتی كوردستانی جێگری یەكەمی پارێزگای موسڵی وەرگرت, لە ئێستادا لەسەر بەندی پێداچوونەوەو چاكسازی لەحكومەتی ناوخۆی موسڵ بڕیارە چەند پۆستێكی دیكە بە كورد بدرێت, سەرۆكی فڕاكسیۆنی برایەتی و پێكەوەژیان لە ئەنجوومەنی پارێزگای مووسڵ رایگەیاندووە:” پارتی 21 پۆستی دیكە لە ناو موسڵ وەردەگرێت, سیڤی سەرجەم پۆستەكان پێشكەشكراوە”.
بەرەكات شەمۆ سەرۆكی فڕاكسیۆنی برایەتی و پێكەوەژیان لە ئەنجوومەنی پارێزگای مووسڵ ، بە ماڵپەڕی فەرمیی پارتی راگەیاندووە: ” دوای بریاری چاكسازی لە حكومەتی محەلی موسڵ و پێدانی ئیستیحقاقی پارت و لایەنەكانی نێو ئەنجومەنی پارێزگای موسڵ لە داهاتوودا پارتی 21 پۆستی دیكەی بەردەكەوێت لە نێو موسڵ كە پۆستەكانی بەڕێوەبەری گشتی و جێگری بەڕێوەبەر و چەند پۆستێكی دیكەش لەناو دیوانی پارێزگا و ژمارەیەكی بەڕێوەبەری بەشەكانیش وەردەگرێت، لەوانە بەڕێوەبەری گشتیی تەندروستی مووسڵ و بەڕێوەبەری ئاو و بەڕێوەبەری كشتوكاڵ و جێگری بەڕێوەبەری گشتیی وەبەرھێنان و جێگری بەڕێوەبەری گشتیی پەروەردە و جێگری بەڕێوەبەری گشتیی پۆلیس وەردەگرین”.
سەرۆكی فڕاكسیۆنی برایەتی و پێكەوەژیان لە ئەنجوومەنی پارێزگای مووسڵ ئاشكرای كردووە كە : “بەڕێوەبەرە گشتییەكان پێویستە لە ئەنجوومەن پەسەند بكرێن و ئەوانەی دیكەش فەرمانی دەستبەكاربوونیان لە پارێزگا دەردەچێت و لە چوار بەڕێوەبەری گشتی، بەڕێوەبەری گشتیی تەندروستی بەر ئێمە كەوتووە و سێ كاندیدمان پێشكەش كردووە و پشتگیری لە یەكێك دەكەین، ئەویش ئێستا جێگری بەڕێوەبەری گشتیی تەندروستییە و سیڤیی سەرجەم پۆستەكانی دیكەش پێشكەش كراون و چاوەڕێ دەكرێت ئەم ھەفتەیە سەرجەم پۆستەكان وەربگرینەوە, ھەفتەیە ئەو پۆستە یەكلایی دەكرێتەوە”.