به‌ڤیدۆ و وێنه: ببینه چۆن شه‌قامه‌كانی حه‌له‌ب پڕبووه له لاشه‌ی مرۆڤ
خواكوڕك
رۆژی چوارشه‌ممه 30/11/2016 راگه‌یاندنه‌كانی ئۆپۆزسیۆنی سوریا دیمه‌نی دوای مووشه‌ك بارانكردنی شه‌قامه‌كانی رۆژهه‌ڵاتی حه‌له‌ب له‌لایه‌ن فرۆكه‌كانی سوریا و روسیاوه بڵاوكرده‌وه، كه به‌هۆیه‌وه 45 كوژراو له ئافره‌ت و منداڵ و پیر و گه‌نجی لێكه‌وته‌وه.
وێنه و ڤیدیۆكان دیمه‌نی بێ به‌زه‌ییانه‌ی جه‌نگ له شاره‌كه بڵاوده‌كه‌نه‌وه كه چۆن بێ ره‌چاوكردنی یاساكانی جه‌نگ به‌ڕێوه‌ده‌چێت، هه‌روه‌ها به‌ڵگه‌یه‌كیشه له‌سه‌ر بۆردومانی خه‌ڵكی سیڤیل له‌لایه‌ن فرۆكه‌كانی روسیا و سوریا.
ستیفن ئۆبرایەن جێگری سکرتێری گشتی ڕێکخراوی نەتەوەیەکگرتووەکان ده‌ڵێت، “هاوڵاتیانی ڕۆژهەڵاتی حەلەب لە نێوان حکومەتی سوریا و ئۆپۆزسیۆندا گیریانخواردووە. کاتێک هەوڵدەدەن لەدەست جەنگ هەڵبێن لەلایەن هێزە ئۆپۆزسیۆنەکانەوە ڕێگریان لێدەکرێت، ئه‌وكاته‌ی له‌ماڵه‌وه‌ش ده‌مێننه‌وه فرۆكه‌كانی سوریا بۆردومانیان ده‌كات”.
ئۆبراین ده‌شڵێت، “” با لەبەر خاتری مرۆڤایه‌تی و بۆ پاراستنی گیانی کەسانی مەدەنی هەموو هەوڵێکی خۆمان بدەین و گەمارۆ لەسەر ڕۆژهەڵاتی حەلەب لابەرین”.
له‌وه‌ڵامی ئه‌و داوایه‌شدا ڤیتالی چەرکین باڵیۆزی ڕوسیا لە نەتەوەیەکگرتووەکان کۆتایی هێنان بە هێرشەکانی ڕوسیای ڕەتکردەوە و ڕایگەیاند “داوای نەتەوەیەکگرتووەکان بۆ کۆتایی هێنان بە شەڕی سوریا تەکتیکێکی بێمانایە”.
