سەرۆکی هەرێم: ئێزیدییەکان له‌سه‌ر خاكی خۆیان ماون و بۆ هه‌تاهه‌تایه‌ش ده‌مێنن، ئه‌وان ده‌مێنن و لالش و مه‌زاری شه‌رفه‌دین ده‌پارێزن.
دوای ئەوەی ئەمڕۆ هەریەکە لەسەرۆکی هەرێم و سەرۆکی حکومەت بەشداریان لە پێنجەمین ساڵیادی جینۆسایدکردنی ئێزیدیەکان کرد لە شاری دهۆک، سەرۆکی هەرێمی کورستان وتارێکی پێشکەش کرد، لە وتارەکەیدا ڕایگەیاند ئێزیدیاتی، لالش، شنگال و شەرفەدین لە کوردستان جیانابنەوە.
خواکوڕێک بەشێک لە وتارەکەی سەرۆکی هەرێم بڵاودەکاتەوە.
“ئه‌مڕۆ به ڕێز و شكۆداری یادی قوربانییانی قێزه‌ونترین تاوان ده‌كه‌ینه‌وه، كه هیچ كه‌س له‌بیری ئه‌وه‌دا نه‌بوو له سه‌ده‌ی 21 تاوانێكی له‌و جۆره رووبدات، بۆ قوربانییه‌كان ده‌ڵێین هه‌رگیز له بیرمان ناچن.
ئێزدییان به درێژایی مێژوو ده‌یان فه‌رمان و كاره‌ساتیان به‌سه‌ردا هاتووه، به‌ڵام ئه‌وان به‌هێز و بیروباوه‌ڕی خۆیان به‌رگریان كردووه و ده‌ستبه‌رداری خاك و بیروباوه‌ڕی خۆیان نه‌بوونه.
له‌گه‌ڵ ئه‌و هه‌موو كاره‌سات وفه‌رمانه‌ی به‌سه‌ریان هاتووه، ئێزدی وه‌كو كولتوورێكی زیندووی پێكه‌وه‌ژیان له‌گه‌ڵ پێكهاته‌كانی دیكه‌ی كوردستان، له‌سه‌ر خاكی خۆیان ماون و بۆ هه‌تاهه‌تایه‌ش ده‌مێنن، ئه‌وان ده‌مێنن و لالش و مه‌زاری شه‌رفه‌دین ده‌پارێزن.
ئه‌و جینۆسایده‌ی له‌لایه‌ن داعشه‌وه به‌سه‌ر ئێزدیاندا هات، شتێكی كه‌موێنه‌یه، تا ئێستا 80 گۆڕی به‌كۆمه‌ڵ و سه‌دان گۆڕی دیكه‌ش دۆزراونه‌ته‌وه.
ئه‌وه‌ی به‌سه‌ر ئێزدیاندا هات گه‌وره‌ترین تاوان بوو، به جۆرێك 360 هه‌زار ئێزدی ئاواره بوون، 67 مه‌زاری ئێزدیان ته‌قێندرانه‌وه، زیاتر له 100 هه‌زار ئێزدی ئاواره‌ی دنیا بوونه، ئه‌وه ره‌شترین كاره‌ساته له مێژوودا، به‌ڵام هیچ یه‌كێك له‌وانه نه‌یانتوانیوه ئێزدی و كوردستان له یه‌ك جیابكه‌نه‌وه. ئێزدییه‌كان كۆنترین پێكهاته‌ی سه‌ر خاكی وڵاته‌كه‌مانن.
ئێمه زۆر باش له ده‌رد و ژانی ئێزدیان تێده‌گه‌ین، ده‌زانین ژیانی ئاواره‌یی له كه‌مپه‌كان چه‌نده زه‌حمه‌ته، جیابوون له خانه‌وه‌دا سه‌خته، ده‌زانین به‌دڵ ته‌ژی حه‌سره‌ت و كۆڤان، چاویان له‌وه‌یه ئازیزیانیان بگه‌ڕێنه‌وه، برینه‌كانیان زۆره و به سانایی ساڕێژ نابین.
ئێمه ده‌زانین ئامانج و مه‌ره‌می دوژمنان بێ ئومێدكردن و ده‌رخستنی ئێزدیانه له خاكی خۆیان و باب و باپیرانییان، ده‌یانه‌وێ له‌سه‌ر خاكی خۆیان نه‌مێنن و ده‌ربه‌ده‌ری دنیا بن، بێ كه‌سوخودان بن و ده‌ربه‌ده‌ر بن و كولتوور و نه‌ریتی خۆیان جێبهێڵن.
ئێمه هه‌موو كارێك ده‌كه‌ین بۆ ئه‌وه ئێزدی له خاكی خۆیان و كوردستان بمێننه‌وه، له‌ژێر سێبه‌ری لالش سرووته‌كانی ئایینی خۆیان بكه‌ن.
ئێمه ده‌زانین ئێزدیاتی شنگال، لالش و شه‌رفه‌دین له كوردستان جیانابێته‌وه و له ئاواره‌ییشدا ناپارێزرێن.
دوای كاره‌ساتی شنگال، كارمان بۆ رزگاركردنی ئێزدییه‌كان ده‌ستپێكرد، ئێمه دوای كاره‌ساته‌كه له‌گه‌ڵ میر ته‌حسین به‌گ و جاڤاتی رۆحانی له دهۆك كۆبووینه‌وه، نووسینگه‌یه‌كمان بۆ رزگاركردنی دایك و خوشكانی ئێزدی دامه‌زراند، تا ئێستا 2225 ژن و 1284 پیاو رزگار كراون، به‌ڵام هێشتا 1323 ژن و 1585 پیاو چاره‌نووسیان نادیاره.
لێره‌شدا هه‌مووان دڵنیا ده‌كه‌ین، هه‌موو هه‌وڵێك ده‌ده‌ین ئه‌وانه‌ی ماون رزگار بكرێن و چاره‌نووسیان دیار بكه‌ین گه‌له‌ك سوپاس بۆ نووسینگه‌ی رزگاركردنی ئێزدیان، خوشك و دایكی ئێمه‌ی ئێزدی كه له ده‌ستی داعش رزگاربوون، سمبۆلی مه‌زڵوومیه‌تن و شه‌ره‌ف و سه‌ربڵندی میلله‌تی ئێمه‌ن، ده‌بێت رێز و پێزانین و جێگه‌ی تایبه‌تی ئه‌وان له‌ناو كۆمه‌ڵگه‌دا هه‌بێت.
هه‌م حكوومه‌تی هه‌رێمی كوردستان و حكوومه‌تی به‌غدا و كۆمه‌ڵگه‌ی نێوده‌وڵه‌تیش هاوكار بن بۆ ئه‌وه‌ی جارێكی دیكه ده‌ست به ژیانی ئاسایی خۆیان له‌ناوچه‌كانیان بكه‌نه‌وه.
دوێنی په‌رله‌مانی كوردستان، رۆژی 3ی ئابی وه‌كو رۆژی جینۆسایدكردنی ئێزدییان دیاریكرد، هیوادارین له‌سه‌ر ئاستی نێوده‌وڵه‌تی هه‌مان كار بكرێت، پێشتریش حكوومه‌ت كاری بۆ ئه‌وه‌ی كردووه داوای تایبه‌ت پێشكه‌ش به نه‌ته‌وه یه‌كگرتووه‌كان بكات.
خه‌ڵكی شنگال و ده‌وروبه‌ری، هێژای ژیانێكی شایسته‌ن له ناوچه‌كانییان، ئاڵۆزی و ململانێ و ناكۆكی حزبی نابێت ببێته هۆی رێگریكردن له ئاوه‌دانكردنه‌وه‌ی شنگال، به‌رده‌وامیش كار بۆ ئه‌وه ده‌كه‌ین شنگال بكرێته پارێزگا.
نابێت هیچ حزبێك و گرووپێك ببێته هۆی رێگریكردن له گه‌ڕانه‌وه‌ی خه‌ڵك و پێشكه‌شكردنی خزمه‌تگوزاریی و پێویسته چاره‌سه‌رێك بۆ ره‌وشی شنگال بدۆزرێته‌وه و سندووقێك بۆ ئاوه‌دانكردنه‌وه‌ی شنگال دابمه‌زرێت و هه‌رێمی كوردستانیش ئاماده‌یی هه‌یه به‌شداری تێدا بكات.
پێویسته له بودجه‌ی داهاتووی عێراقی فیدرالیش بڕێك پاره بۆ شنگال ته‌رخان بكرێت.
خه‌ڵكی دهۆك تابلۆی پێكه‌وه‌ژیانی نیشانی جیهاندا و ده‌رگای ماڵ، قوتابخانه و مزگه‌وته‌كانیان بۆ ئاواره‌كانی شنگال كرده‌وه.”
