بزانە مەسرور بارزانی بۆچی چۆتە ئەمریكا
خواكوڕك
لەدوای ئەوەی كاندیدی كۆماریەكان بووە براوەی هەلبژاردنەكانی ئەمریكا بۆ چوار ساڵی داهاتوو جلەوی ئیدارەی ئەمریكا بەدەست كۆماریەكانە شاندێكی هەرێمی كوردستان بۆ تاوتوێكردنی داهاتووی هەرێمی كوردستان لە رۆژهەڵاتی ناوەڕاست و پاڵپشتیكردنی هێزەكانی پێشمەرگە و زانینی دید و بۆچوونی بەرپرسانی باڵای ئێستا و داهاتووی ئیدارەی ئەمریكا و تیمی دۆناڵد ترەمپی سەرۆكی نوێی ئەمریكا، بەسەرۆكایەتی مەسرور بارزانی راوێژكاری ئەنجوومەنی ئاسایشی هەرێمی كوردستان، بە یاوەری فوئاد حسێن سەرۆكی دیوانی سەرۆكایەتی هەرێمی كوردستان سەردانی واشنتۆنی كرد.
بە پێی زانیاریەكان مەسرور بارزانی دەیەوێت، لەم سەردانە پڕ لە جوڵە دیبلۆماسیەدا، لە هەڕەمی وڵاتانی جیهانەوە، خەبات و قوربانیدانی پێشمەرگە، لەتەك خەباتی دیپلۆماتیانەی گونجاودا، جارێكی دیكە پرسی داهاتووی هەرێمی كوردستان لە ناوچەكە تاووتوێبكات.
هەروەها سەرچاوەیەكی ئاگادار لە سەردانەكەی راوێژكاری ئەنجوومەنی ئاسایشی هەرێمی كوردستان راگەیاند:” وا بڕیارە مەسرور بارزانی لەگەڵ ئیدارەی ئێستا و داهاتووی ئەمریكا، باس لە ئاییندەی كوردستان و پێشمەرگە بكات، بەتایبەت كە چەندینجار ئەمریكاییەكان كوردییان بە دۆستی نزیكی خۆیان زانیوە و پاڵپشتی و هاوكاری بەردەوامی پێشمەرگە بوون لەشەڕی تیرۆردا.
ئەم سەرچاوەیە گوتیش” مەسرور بارزانی لە چەندین سیمینار و كۆبوونەوە لە ناوەندەكانی تینك تانكی ئەمریكا، بە ئامانجی دیالۆگی زیاتر و بیروبۆچوون و لێكتێگەیشتنی زیاتر لەسەر هەرێمی كوردستان بەشداری دەكات.
بە پێی زانیاریەكان لەیەكەم وێستەگەی سەردانەكەیدا مەسرور بارزانی لە ناوەندی گەشەپێدانی ئەمریكا، بیروبۆچوونەكانی لەگەڵ بەرپرسانی ئەم ناوەندە، لەبارەی وتوێژەكانی نێوان هەولێر و بەغدا تاووتوێكرد، بە ئامانجی دەستەبەركردنی مافەكانی كورد لە ناوچەكەدا .
هەر لەم باریەوە دانیێڵ بنیامین، لێكۆڵەر لە ناوەندەی گەشەپێدانی ئەمریكا رایگەیاندووە: “بەڕێز راوێژكاری ئەنجومەنی ئاساییشی ھەرێمی كوردستان لێرە بیروبۆچوونەكانی لەگەڵ ئێمە ئاڵوگۆڕ كرد، من خۆم لە سەر مێژووی كورد لە عێراق و كوردستان و ئاستەنگەكان و كۆمەڵكوژی ئەنفال خوێندوومە. ئەو نەھامەتیانە ترسی لای كورد لەسەر مانەوە لە عێراق دروست كردووە. لێرە تاوتوێی دۆزینەوەی رێگەیەكیش كرا لەگەڵ سەرۆك وەزیرانی عێراق، حەیدەر عەبادی. ئەمە ھەمووی بە ئامانجی دەستەبەركردنی ئاساییش و فەراھەمكردنی مافەكانی كورد. ھەروەھا پێویستیی بۆ گفتوگۆی بەرھەمھێن لەگەڵ بەغداد و ھێنانە دی ئەمە”.
