بەشیر حەداد: لە دوو رۆژی ئایندە شاندێكی حكومەتی ھەرێم سەردانی بەغدا دەكات
جێگری سەرۆكی پەرلەمانی عێراق رایگه‌یاند لە دوو رۆژی داهاتوودا شاندێكی حكوومەتی ھەرێمی كوردستان دەچێتە بەغداو لەگەڵ بەرپرسانی حكوومەتی عێراق كۆدەبێتەوە.
د. بەشیر حەداد، لە كۆنگرەیەكی رۆژنامەوانیدا رایگەیاند: لە دوای پێكھێنانی كابینەی نۆیەمی حكوومەتی ھەرێمی كوردستان و كابینەی نوێی حكوومەتی عێراق، پەیوەندییەكانی ھەولێر و بەغدا چووەتە قۆناغێكی نوێوە.
جەختی كردەوە: ئەمڕۆ یان سبەی شاندی حكوومەتی ھەرێمی كوردستان دەگاتە بەغدا و ئومێد ھەیە لە ماوەی مانگێك تا دوو مانگ گفتوگۆكانی نێوان ھەولێر و بەغدا بە ئامانج بگات، چونكە ئێستا لە بەغدا كار لەسەر بودجەی ساڵی 2020 دەكرێت و تا مانگی 12 دەبێ بودجە بھێندرێتە پەرلەمان، بۆیە ئەگەر لەو ماوەیەدا ھەرێمی كوردستان و بەغدا نەگەنە رێككەوتن، تێپەڕاندنی بودجە لە پەرلەمانی عێراق زۆر زەحمەت دەبێت.
جێگری سەرۆكی پەرلەمانی عێراق ئەوەشی خستەڕوو دەرفەتێكی باش لە عێراق ھاتووەتە پێش و خواست لەسەر چارەسەركردنی كێشەكانی نێوان ھەولێر و بەغدا ھەیە، چەند لیژنەیەك لە نێوان ھەردوولادا لەسەر دۆسیەكانی نەوت، بودجە و موچە، مادەی 140 و دۆسییە ئەمنی و سیاسییەكان پێكھێنراون.
لە ماوه‌كانی رابردوو شاندی باڵای هەرێمی كوردستان بە سەرۆكایەتی مەسرور بارزانی، سەرۆكی حكومەتی هه‌رێمی كوردستان و شاندی باڵای حكومەتی عێراق بە سەرۆكایەتی فواد حسێن، جێگری سەرۆك وەزیران بۆ كاروباری وزە كۆبوونەوە.
