پارتی و یەکێتی لەسەر پرسی کەرکووك کۆدەبنەوە
بڕیارە شاندی هاوبەشی پارتی و یەکێتی لەسەر ئاستی باڵا لەبارەی پرسی هەڵبژاردنەکان و پاریزگاری کەرکووک کۆ ببنەوە و ئەندامێکی ئەنجوومەنی سەرکردایەتی یەکێتیش رای دەگەیەنێت، لەبارەی دۆخی هەرێمی کوردستان گفتوگۆ دەکرێت.
محەمەد وەتمان ئەندامی ئەنجوومەنی سەركردایەتی یەكێتی نیشتمانی كوردستان ڕایگەیاند، كۆبوونەوەی وەفدی هاوبەشی یەكێتی نیشتمانی كوردستان و پارتی دیموكراتی كوردستان لەسەر چەند پرسێکی تایبەت بە هەردوولا دەبێت و یەكێك لە تەوەرەكانیش پرسی كەركووكە.
وەتمان زیاتر روونی دەکاتەوە، لە كۆبوونەوەکەدا تاتوێی كاری ڕۆژانەی یەكێتی و پارتی دەکرێت و لەبارەی دۆخی هەرێمی كوردستان و عێراق و ناوچەكە گفتوكۆ دەكرێت و پرسی تایبەتی كۆبوونەوەكەش لەسەر دۆخی كەركووك و پارێزگاری كەركووك كە ماوەیەكی زۆری بەسەردا چووە.
محەمەد وەتمان گوتیشی، تا ئێستا هەر تەیب جەبار دیاری كراوە بۆ پۆستی پارێزگاری كەركووك، بەڵام جێگیر نەكراوە و بڕیارەكە جێگەی خۆی نەگرتووە، نازانرێت ئەمڕۆ لە كۆبوونەوەكەدا بڕیاری چی دەدرێت بەڵام یەكێتی و پارتی ئێستا پێوەندییان زۆر باشە.
لە ماوەی ڕابردوودا هەر یەكە لە پارتی و یەكێتی لەسەر تەیب جەبار، بۆ پۆستی پارێزگاری كەركووك ڕێككەوتن، بەڵام تا ئێستا بە فەرمی دانەنراوە لە جێگەی ڕاكان جبوری كە لەدوای ڕووداوەكانی 16ی ئۆكتۆبەرەوە وەک پارێزگار بەسەر ئەو شارەدا سەپینرا.
