بنەماڵەی تاڵەبانی دەیانەوێ کۆسرەت ڕەسووڵ و مەحموود سەنگاوی و حاکم قادر دوور بخەنەوە
مامۆستایەکی زانکۆ رای گەیاند، بنەماڵەی تاڵەبانی، لە ڕێگەی سیناریۆیەکەوە بە ناوی لێکۆڵینەوە لە مەلا بەختیار، هەوڵی دوورخستنەوەی سەرکردە پیرەکانی یەکێتی، لە نێویشیاندا کۆسرەت ڕەسووڵ، مەحموود سەنگاوی و حاکم قادر دەدەن.
د. جەزا چنگیانی، مامۆستای زانکۆ لە ڕووسیا، لە پێگەی تایبەتیی خۆی لە تۆڕی کۆمەڵایەتیی (فەیسبووك) وتارێکی بەناوی (تەڵەکەی مەلا بەختیار، قاچی پیرەکان دەگرێ) بڵاو کردووەتەوە و باسی لەوە لەوە کردووە کە هەڕەشەی لێکۆڵینەوە لە مەلا بەختیار، سیناریۆیەکە بۆ پیرەکانی نێو یەکێتی داڕێژراوە.
ئەو پێیوایە کە ئامانج لەم سیناریۆیە، پاککردنەوەی یەکێتییە لە سەرانی پیر و هەروەها زیندووکردنەوەی ناکۆکیی نێوان ”جەلالی و مەلایی ساڵانی شەستەکانە“ و ”ڕەنگکردنی ڕووی پارتییە وەک دوژمن“.
ئەو مامۆستایەی زانکۆ پێیوایە کە سیناریۆکە لە دەرەوەی کوردستان نەخشەی بۆ کێشراوە و هەمان ئەوانەی ٥٥ ساڵ لەمەوبەر مام جەلالیان بۆ دژایەتیکردنی مەلا مستەفا بارزانی، ڕابەری بزووتنەوەی ڕزگاریخوازی کورد بەکار هێناوە، ئێستاش لاهوو جەنگی بۆ هەمان کار بەکار دێنن، ئەوان هەروەك ساڵانی شەستەکان، مەبەستیانە جەستەی سیاسیی باشووری کوردستان بکەن بە دوو دەسەڵاتی خێزانیی دژ بە یەك، بۆ پووچەڵکردنەوەی پڕۆژەی دەوڵەت و حکوومەتیکی خاوەن دەستووریی نیشتمانی.
جەزا چنگیانی لێکۆڵینەوە لە مەلا بەختیار بە “سیناریۆ“ دەزانێت و پێیوایە کە خودی مەلا بەختیار، بەشێکە لە ماڵباتی تاڵەبانی، بەڵکوو پلانەکە بۆ ئەوەیە کە لە ڕێگەی سیناریۆکەوە ”کۆسرەت رەسووڵ و مەحموود سەنگاوی و حاکم قادر و چەند کەسێکی دیکە“ دوور بخرێنەوە. دەشڵێت: ”هەروەک لە نامەیەکدا هێرۆ برایم ئەحمەد باس لە خانووە دوو ملیۆن دۆلارییەکەی حاکم قادر دەکات.
مامۆستاکەی زانکۆ ئاماژەی بەوەش داوە، یەکێتی ڕێکخراوێک نەبووە کە لە ئاست هۆشیاریی کۆمەڵگە و ستراتیژی نیشتمانییەوە درووست بووبێت.
ئەمە لە کاتێکدایە کە لەم دواییانەدا دەنگۆی ئەوە بڵاو کرایەوە، لەنێو یەکێتیدا و بە بڕیاری چەند کەسێک، لێکۆڵینەوە لە مەلا بەختیار، لێپرسراوی دەستەی کارگێڕیی مەکتەبی سیاسیی یەکێتی دەکرێت.
