نووسینگەی سەرۆکی حکومەتی هەرێمی کوردستان ڕوونکردنەوەیەک بڵاو دەکاتەوە .
لەم روونکردنەوەدا نووسینگەی حکومەتی هەرێمی کوردستان بەرپەرچی هەندێک لە چەواشەکاری میدیاکانی ناوخۆیی و دەنگۆکان دەداتەوە و بەڵێن دەدات ئەوان بەردەوام دەبن لە خزمەتی زیاتری هاووڵاتیان .
دەقی روونکردنەوەکە
لە کاتێکدا کە حکومەتی ھەرێمی کوردستان شێلگێرانە سەرقالی گرتنەبەری رێکاری زیاتری خزمەتی ھاووڵاتیانە، ھەندێ دەزگای نابەرپرسی میدیایی لە ئاراستەیەکی پێچەوانەدا سەرقالی دروستکردن و بڵاوکردنەوەی ھەواڵی چەواشاکارانەن و بە تایبەت ھەوڵ دەدەن ناوی سەرۆکی حکومەت ئاوێتەی ئەم ھەوڵە نابەجێیانەیان بکەن. لە میانەی ئەو ھەڵمەتەدا و لە دوا ھەوڵیان ناوی کەسێکیان ھێناوە کە گوایە حیزبێک دادەمەزرێنێت و بەڵێنی دامەزراندنی خەڵکیان بۆ دراوە. سەر لە بەری ئەم ھەواڵانە زادەی خەیاڵی نەخۆشی خۆیانە و جێگەی داخە کە توانای ماددی و مرۆیی کوردستان دەخرێتە ناو دەزگای چەواشەکاری ناپرۆفیشنال.
نووسینگەی سەرۆکی حکومەتی ھەرێمی کوردستان
