سەرۆکی حکومەت وەزیری ناوخۆی راسپار بۆ پێشوازی کردن لە پەنابەرانی ڕۆژئاوا
دوای ئەوەی تورکیا هێڕشی داگیر کاری بۆ سەر ڕوژئاوای کوردستان دەستپێکرد بەهەزاران هاونیشتمانی کورد ئاوارە بوون بەشێکیشان ڕوویان لە هەرێمی کوردستانکرد، وەزیری ناوخۆش ڕایدەگەیێنێت لەلایەن سەرۆکی حکومەت راسپێردراون بە باشترین شێوە پێشوازی لە پەنابەران بکرێت.
رێبەر ئەحمەد، وەزیری ناوخۆی حکوومەتی هەرێمی کوردستان دوای کۆبوونەوەی لەگەڵ نوێنەری ڕێکخراوی نەتەوە یەکگرتووەکان کە بە سەردانێک هاتووەتە هەولێر لە پرێس کۆنفراسێکدا ڕایگەیاند: ” لە کۆبونەوەی ئەمڕۆ لەگەڵ نوێنەری نەتەوەیەکگرتووەکان باسمان لە پرسی پەنابەرانی ناوخۆ و دەرەوەکرد، بەتایبەت دۆخی کەمپەکانی هەرێم.
وەزیری ناوخۆ گوتیشی ”ئێمە لەلایەک مەسرور بارزانی، سەرۆک وەزیرانی هەرێمی کوردستان و راسپێردراوین کە بە باشترین شێوە پێشوازی لە ئاوارەکان بکەین، بۆیە پارێزگارەکان و دەزگا جۆراوجۆرەکانمان ڕاسپاردووە بە ئەرکی خۆیان هەڵسن“.
ڕوونیشی کردەوە کە تاوەکوو ئێستا پێنج هەزار ئاوارە گەیشتوونەتە هەرێمی کوردستان، پێشبینی دەکەن ئەگەر دۆخەکە بەردەوام بێت، ٣٠ تا ٥٠ هەزار کەس و ئەگەریش زیاتر درێژە بکێشێت، تاوەکوو ٢٥٠ هەزار ئاوارەی ڕۆژئاوای کوردستان ڕوو لە هەرێمی کوردستان بکەن.
گوتیشی: ”ئێستا کەمپێک لە بەردەڕەش بۆ ئەو ژمارەیە درووست کراوە کە گەیشتوون. ئەگەر بەردەوام بێت، ئەو کەمپە بەش ناکات. بۆیە پێویستیمان بە هاوکارییە، لە پێنج ساڵی ڕابردوو هەرێم زیاتر لە ٢ ملیۆن ئاوارەی ناوخۆیی لەخۆوە گرتووە، کەچی هاوکاریی دارایی هەرێم نەکراوە“.
