ئه‌مریكا سزای نوێی بەسەر ئێراندا سه‌پاند
وەزارەتی دەرەوەی ئەمریکا رایگەیاند، چەند سزایەکی نوێی ئابووری بەسەر چەند کەسایەتیی و دامەزراوەیەکی ئێراندا سەپاندووە.
لە بەیاننامەیەکی وەزارەتی دەرەوەی ئەمریکادا هاتووە، سزا بەسەر ئەو بەش و دامەزراوەکانی بیناسازی ئێراندا سەپێندراوە کە لە ژێردەستی سوپای پاسداراندان.
ئەوەشی تیادا هاتووە، مایک پۆمپیۆ سەرقاڵی ئامادەکردنی سزای دیکەیە بەسەر کەرتی ئەتۆمی ئێراندا تا بە شێوەیەکی ئاسان بتوانرێت بەرنامە ئەتۆمییەکەی چاودێری بکرێت و رێگەنەدرێت بە هیچ شێوەیەک ببێتە خاوەنی بۆمبی ئەتۆمی.
ئەوەش خراوەتەڕوو، هەر بە پێی سزاکان گەمارۆ دەخرێتە سەر هاوردەی مادە کانزاییە خاوەکانی وەک بۆرییە پۆڵا و ئاسنەکان لە هەموو بوارێکدا و پلێتە کانزاییەکان کە ئێران بۆ دروستکردنی موشەک سودی لێ وەردەگرێت.
ئەمەش لە کاتێکدایە پێشتریش لە مانگی ئایاری 2018دا ترەمپ لە رێککەوتنی ئەتۆمی لەگەڵ ئێران کشایەوە و چەدین سزای بەسەر ئەو وڵاتەدا سەپاندووە.
رێککەوتنی ناوکیی ئێران و وڵاتانی پێنج + یەک لە سەرەتای نیسانی 2015 لە شاری لۆزان لە سویسڕا واژۆ کرا، کە بەپێی ئەو رێککەوتنە ئێران دەستبەرداری دروستکردنی چەکی ناوکی دەبێت و ئەمریکاش سزاکانی لەسەر ئەو وڵاتە سووک دەکات.
