عادل عه‌بدولمه‌هدی: ده‌مانه‌وێت خۆپیشاندانه‌كان سه‌ركه‌وتووبن، به‌ڵام نابێت خۆپیشاندان له چوار كاتژمێر زیاتر بێت
عادل عه‌بدولمه‌هدی سه‌رۆك وه‌زیرانی عیراق له وته‌یه‌كدا له‌كاتی دانیشتنی هه‌فتانه‌ی حكوومه‌تدا دووپاتی كرده‌وه كه ناڕه‌زایی ده‌ربڕینه‌كان گرنگن و ده‌شێت چاوپۆشی له كرداره نه‌رێنییه سنوورداره‌كانیان بكرێت و پێداگیری له‌سه‌ر ئه‌وه‌یش كرد كه نابێت حكوومه‌ت لاواز بكرێت چونكه ئه‌وه ده‌بێته هۆی په‌ره‌سه‌ندنی گه‌نده‌ڵی زیاتر.
سه‌رۆك وه‌زیرانی عیراق له وته‌كه‌دا دووپاتی كرده‌وه كه ئه‌م ته‌نگژه‌یه‌ی ئێسته‌ی عیراق پێوه‌ندی به خزمه‌تگوزارییه گشتییه‌كانه‌وه‌و نابێت حكوومه‌تێك ته‌مه‌نی چه‌ند مانگێكه به گه‌نده‌ڵی تۆمه‌تباربكرێت و ئه‌م حكوومه‌ته دووچاری دۆسێ كه‌ڵه‌كه‌بووه‌كانی گه‌نده‌ڵییه‌كانی حكوومه‌ته‌كانی پێشوو بووه‌ته‌وه.
هاوكات دووپاتی كرده‌وه كه هه‌ندێك له گێره‌شێوێنه‌كان به ئه‌نقه‌ست ڕووبه‌ڕووی هێزه ئه‌منییه‌كان بوونه‌وه‌و ئاماژه‌ی به‌وه‌یش كرد كه خۆپیشاندان مافێكی ڕه‌وایه به‌ڵام ده‌بێت به مۆڵه‌ت وه‌رگرتن له وه‌زاره‌تی ناوخۆ به‌ڕێوه‌بچێت و نابێت له چوار كاتژمێر تێپه‌ڕێت.
سه‌باره‌ت ده‌ستووریش گوتی وڵات پێویستی به هه‌مواركردنی ده‌ستوورو چاكسازی سیستمی هه‌ڵبژاردن هه‌یه. هاوكات داخ و په‌ژاره‌ی خۆی به‌رانبه‌ر به‌وه ده‌ربڕی كه خۆپیشاندانه‌كان كوژرانی خۆپیشانده‌ران و هێزه ئه‌منییه‌كانیان لێ كه‌وته‌وه. گوتیشی ئازادییه‌كی زۆر له عیراق هه‌یه‌و گه‌نده‌لێش له عیراق دۆسێیه‌كی سه‌ره‌كییه‌و پێویسته چاره‌سه‌ربكرێت.
سه‌رۆك وه‌زیرانی عیراق دووپاتی كرده‌وه كه ڕووبه‌ڕووی خۆپیشاندانه‌كان نابنه‌وه كاتێك ئاشتیانه به‌ڕێوه‌بچن. ئاماژه‌ی به‌وه‌یش كرد كه به‌رده‌وام هه‌وڵیان داوه سنوورێك بۆ خۆپیشاندانه‌كان دابنرێت و چاره‌سه‌ریش بدۆزنه‌وه. دووپاتیشی كرده‌وه كه ده‌یانه‌وێت ئه‌م خۆپیشاندانانه سه‌ركه‌وتووبن
