پۆلیسی هەولێر : له‌دەمەقاڵێی نێوان دوو بنەماڵەدا سێ كه‌س لە قەزای خەبات كوژران
گوتەبێژی پۆلیسی هەولێر ڕایگەیاند، ئێوارە دوێنێ ڕووداوێکی کوشتن لە نێو بازاڕی قەزای خەبات ڕوویدا و سێ کەس لە ڕووداوەکە کوژران کە باوکێک و دوو کوڕن.
هۆگر عەزیز، گوتەبێژی پۆلیسی هەولێر ڕایگەیاند، ئێوارەی دوێنێ ڕووداوێکی کوشتن لە نێو بازاری قەزای خەبات ڕوویدا، دەستبەجێ هێزەکانی بەڕێوەبەرایەتی پۆلیسی پارێزگای هەولێر گەیشتنە شوێنی ڕووداو و دەرکەوت کەوا لەسەر کێشەی منداڵەکانیان دەمەقاڵی لە نێوان هەردوو بنەماڵەدا ڕوویداوە و دواتر بووە بە شەڕیان، لە ئاکامدا باوکێک و دوو کوڕ بەناوەکانی (محمد قادر عباس، بەدر محمد قادر و شێروان محمد قادر) دەکوژرێن.
هۆگر عەزیز ڕاشیگەیاند، بەڕێوەبەرایەتی پۆلیسی پارێزگای هەولێر پەڕاوی لێکۆڵینەوەی بۆ ئەم ڕووداوە کردووەتەوە و دەست کراوه بە لێکۆڵینەوە بۆ ئەوەی بکەرانی تاوانەکە دەستگیر بکرێن و بدرێنە دادگا.
