مەسرور بارزانی: پێویستە بە زووترین کات کێشەی شایستە داراییەکانی هەرێمی کوردستان چارەسەر بکرێت

2023-09-14

مه‌سرور بارزانی‌ سه‌رۆكی حکومەتی كوردستان ناوه‌ڕۆكی‌ كۆبوونه‌وه‌كه‌ی‌ له‌گه‌ڵ محه‌مه‌د شیاع سوودانی‌ سه‌رۆك وه‌زیرانی‌ عێراق ئاشكرا كردووه‌ و ده‌ڵێ‌، دووپاتمكرده‌وه‌، شایسته‌ داراییه‌كانی هه‌رێمی كوردستان و مووچه‌ی فه‌رمانبه‌ران تێكه‌ڵی ململانێ سیاسییه‌كان نه‌كرێن.
مه‌سروور بارزانی‌ سه‌رۆكی حکومەتی كوردستان لە ئەکاونتی خۆی له‌ تۆڕی کۆمەڵایەتی فه‌یسبووك نووسیویه‌تی‌، ئه‌مڕۆ له‌گه‌ڵ قوباد تاڵه‌بانی و شاندی یاوه‌رم له‌ حكومه‌تی هه‌رێمی كوردستان، له‌گه‌ڵ محه‌مه‌د شیاع سوودانی، سه‌رۆك وه‌زیرانی عێراق له‌ به‌غدا كۆبووینه‌وه‌، “له‌كۆبوونه‌وه‌كه‌دا دووپاتم له‌ چاره‌سه‌ركردنی كێشه‌كان له‌سه‌ر بنه‌مای ده‌ستوور و رێككه‌وتنه‌كان كرده‌وه‌.
هه‌روه‌ها ده‌ڵێ‌، دووپاتمكرده‌وه‌، شایسته‌ داراییه‌كانی هه‌رێمی كوردستان و مووچه‌ی فه‌رمانبه‌ران تێكه‌ڵی ململانێ سیاسییه‌كان نه‌كرێن، پێویسته‌ به‌ زووترین كات ئه‌و كێشه‌یه‌ چاره‌سه‌ر بكرێت و مووچه‌خۆرانی هه‌رێمی كوردستان چیتر بۆ وه‌رگرتنی مافه‌كانیان له‌ چاوه‌ڕوانیدا نه‌بن. هه‌روه‌ها بیری هه‌موولایه‌كمان خسته‌وه‌، كه‌ حكومه‌تی هه‌رێمی كوردستان پابه‌ندییه‌كانی خۆی جێبه‌جێكردووه‌ و هه‌مان چاوه‌ڕوانیمان له‌ حكومه‌تی عێراقی فیدراڵ هه‌یه‌.
سه‌رۆكی حکومەتی هەرێمی كوردستان باسی‌ له‌وه‌ كردووه‌ كه‌ سوودانی ئاماده‌یی خۆی نیشاندایه‌وه‌ بۆ چاره‌سه‌ركردنی كێشه‌كان له‌سه‌ر بنه‌مای ده‌ستوور و یاساكان و دووپاتی‌ له‌وه‌ كرده‌وه‌، كه‌ به‌ هه‌موو لایه‌ك هه‌وڵبدرێت بۆ دابینكردنی پشتیوانیی سیاسی له‌پێناو دۆزینه‌وه‌ی هه‌رچی زووتری چاره‌سه‌ره‌ بۆ گشت كێشه‌كان.
له‌ كۆتایشدا نووسیویه‌تی‌، به‌ بڕوای ئێمه‌ عێراق خاوه‌ن سه‌رمایه‌یه‌كی گه‌وره‌ی مرۆیی و سرووشتییه‌ و به‌ ره‌خساندنی كه‌شێكی له‌بار و به‌ڕێوه‌بردنێكی باش، هه‌موو عێراق به‌ره‌و قۆناغێكی پێشكه‌وتووتر و گه‌شه‌سه‌ندووتر هه‌نگاو ده‌نێت.

Post Views: 159

2023-09-14

دواتر بخوێنەوە