سەرۆکی فراکسیۆنی پارتی بۆ سوودانی: دەسەڵاتت بەکار بهێنە، 70 رۆژە مووچەی هەرێم خەرج نەکراوە
سەرۆکی فراکسیۆنی پارتی داوای لە سەرۆک وەزیرانی عێراق کرد دەسەڵاتە دەستوورییەکانی بەکار بهێنێت بۆ خەرجکردنی کورتهێنانی مووچەی فەرمانبەرانی هەرێمی کوردستان کە 70 رۆژە مووچەیان وەرنەگرتووە.
ڤیان سەبری، سەرۆکی فراکسیۆنی پارتی لە پەرلەمانی عێراق لە کۆبوونەوەکەی دوێنی پەرلەمانی عێراق بە سوودانی گوت: “70 رۆژ تێ دەپەڕێت، هاووڵاتییانی هەرێمی کوردستان مووچەی هەردوو مانگی تشرینی یەکەم و دووەمیان وەرنەگرتووە کە مافێکی دەستووری، یاسایی و شەرعی خۆیانە. لە راستیدا ئەمە کێشەیە و لێکەوتەی نەرێنیی ئابووری و کۆمەڵایەتی ناوخۆیی لێ کەوتووەتەوە.”
ڤیان سەبری بە سوودانی راگەیاند: “بە گوێرەی بڕیاری دادگای باڵای فیدراڵی، دەبێت مووچەی فەرمانبەرانی هەرێمی کوردستان مانگانە خەرج بکرێت وەکو هەر پارێزگایەکی دیکەی عێراق، بەڵام بەداخەوە سەرباری ئەوەی 70 رۆژ تێ دەپەڕێت، شۆکبووین بەوەی تەنها 760 ملیار دینار بۆ مووچەی فەرمانبەران رەوانە کراوە.”
سەرۆکی فراکسیۆنی پارتی ئاماژەی بەوەش کرد “کۆی مووچەی مانگانەی هەرێمی کوردستان دەگاتە سەرووی 900 ملیار دینار، واتا ئەو بڕە پارەی ئێوە (حکومەتی عێراق) ناردووتانە زیاتر لە 200 ملیار دیناری لێ کەمە.”
لەبارەی پڕکردنەوەی کورتهێنانی مووچە، سەرۆکی فراکسیۆنی پارتی، پرسیاری لە سوودانی کرد: “وەزارەتی دارایی فیدراڵی دەڵێت، دەسەڵاتی گواستنەوە بۆ تەواوکردنی مووچەی فەرمانبەرانی هەرێمی کوردستان بە گوێڕەی یاسای بودجە، لە دەسەڵاتی ئەنجومەنی وەزیرانی عێراقە. پرسیارەکە ئەمەیە، بۆ بەڕێزتان فەرمان بە وەزارەتی دارایی ناکەن گواستنەوە بۆ پڕکردنەوەی ئەو کورتهێنانەی لە بودجەی بەگەڕخراوی هەرێمی کوردستان دروست بووە.”
سەرۆکی فراکسیۆنی پارتی لە درێژەی قسەکانیدا دووپاتی کردەوە “حکومەتی هەرێمی کوردستان پابەندییەکانی بەرامبەر بە یاسای بودجە جێ بەجێ کردووە و نیوەی داهاتە نانەوتییەکانی ناردووە.”
سەرژمێری دانیشتووان وەکو ئەوەی ڤیان سەبری باسی کرد “سەلماندوویەتی، پشکی هەرێمی کوردستان لە بودجەی گشتی فیدراڵی، سەدا 14ـیە و لە ڕاستیدا، لە باشترین بارودۆخیشدا زیاتر لە سەدا 5 یان 6ـمان پێ نەگەیشتووە.”
سەرۆکی فراکسیۆنی پارتی لە کۆتایی قسەکانیدا داوای لە سەرۆک وەزیرانی عێراق کرد “لەبەر گرنگییەکەی، پێداچوونەیەک لەم بابەتەدا بکەیت، لە چوارچێوەی ئەو بەرپرسیارێتییە دەستوورییەی لەسەر شانتانە بۆ خەرجکردنی ئەو شایستە داراییانەی فەرمانبەرانی هەرێمی کوردستان کە ماوەتەوە. “
