كۆنگره‌ی ئاسایشی میونشن: شه‌ڕی چوار وڵات له یه‌مه‌ن و كه‌نداوو عێراق هه‌ڵده‌گیرسێت
كۆنگره‌ی ئاسایشی میونشن بڕیاره له رۆژانی ۱۵ تا ۱۷ی۲ی۲۰۱۹ به به‌شداریی ژماره‌یه‌ك سه‌رۆك ده‌وڵه‌ت و وه‌زیرانی به‌رگریی ۸۰ وڵاتی جیهان له شاری میونشنی ئه‌ڵمانیا به‌ڕێوه بچێت.
له راپۆرتێكی كۆنگره‌ی ئاسایشی میونشن بۆ ساڵی ۲۰۱۹ ئاشكرای كردووه كه له‌نێوان ساڵانی ۲۰۱۳ تا ۲۰۱۷ هاورده‌كردنی چه‌ك و ته‌قه‌مه‌نی له رۆژهه‌ڵاتی ناوه‌ڕاست دوو به‌رابه‌ر زیادی كردووه له چاو پێنج ساڵی پێشتردا و هۆشداریی له‌باره‌ی دروستبوونی جه‌نگ له‌نێوان چوار ده‌وڵه‌ت ده‌دات.
ڕاپۆرته‌كه‌ی كۆنگره‌ی ئاسایشی میونشن ئاماژه‌ی پێداوه كه له ۵۳% هه‌نارده‌كردنی چه‌ك و ته‌قه‌مه‌نی بۆ رۆژهه‌ڵاتی ناوه‌ڕاست له‌لایه‌ن ویلایه‌ته یه‌كگرتووه‌كانی ئه‌مه‌ریكا و ۱۱% له‌لایه‌ن فه‌ره‌نسا و ۱۰% له‌لایه‌ن بریتانیا و ۲% له‌لایه‌ن توركیاوه.
ڕاپۆرته‌كه‌ی تیشكی خستووه‌ته سه‌ر كشانه‌وه‌ی هێزه‌كانی ئه‌مریكا له سووریا و ئاماژه‌ی به ڕۆڵی (روسیا و ئیران و توركیا ) داوه به‌ڵام ڕۆڵی یه‌كێتی ئه‌وروپای له داهاتووی سووریا به‌لاوازو له پاشه‌كشه‌دا باس كردووه .
ڕاپۆرته‌كه‌ی كۆنگره‌ی ئاسایشی میونشن له‌باره‌ی درووستبوونی شه‌ڕ و روبه‌ڕوبوونه‌وه له رۆژهه‌ڵاتی ناوه‌ڕاست له‌نێوان (ئه‌مه‌ریكا، ئیسرائیل، سعوودیه له‌گه‌ڵ ئێران) هۆشداریی ده‌دات و پێیوایه له یه‌مه‌ن یان كه‌نداو یان عێراقه‌وه هه‌ڵده‌گیرسێ.
هه‌روه‌ها ده‌شڵێت :” “ئه‌گه‌ر هاتوو سیستمی ئێستای جیهانی ناسه‌قامگیریی تێكه‌وت، وڵاته گرنگه‌كانی وه‌ك فه‌ره‌نسا، بریتانیا و ئه‌ڵمانیا ده‌توانن رۆڵی گرنگیان له پاراستنی سه‌قامگیریی ناوچه‌كانیاندا هه‌بێت”.
