وەزارەتی پەروەردە: پێویستە بە زووترین کات دەست بە دەوامکردن لە ناوەندەکانی خوێندن بکرێتەوە

لە راگەیاندراوێکدا، ئەنجومەنی وەزارەتی پەروەرده‌ دەڵێ، مووچە مافێکی بنەڕەتی مامۆستایان و فەرمانبەرانە و بۆ ئه‌و مه‌به‌سته‌ سوپاسی رۆڵی مامۆستایان دەکات، هەروەها داوا ده‌كات هەر چی زووترە دەست بە پرۆسەی پەروەردە و فێربوون بكرێته‌وه‌.

لە راگەیاندراوی ئەنجومەنی وەزارەتی پەروەردە هاتووە: “مووچە مافێکی بنەڕەتی مامۆستایان و فەرمانبەرانە و ئێمە سوپاسی رۆڵی دڵسۆزانەی مامۆستایان دەکەین، هەموو لایەکیش دۆخی دارایی ئێستای کوردستان و هۆکارەکانی دروستبوونی ئەو دۆخە دەزانین کە رووبەرووی کوردستان کراوەتەوە، زیاتر لە دوو هەفتەیە دەوامی ناوەندەکانی خوێندن دەستیپێکردووە، لە هەندێک ناوچە دەوام نەکراوە، وەک ئاماژەمان پێدا مووچە مافی بنەڕەتی مامۆستایانە و حکومەتی هەرێمی کوردستان لەهەوڵی بەردەوامی بەدەستهێنانی شایستە داراییەکانی کوردستانە لە حکومەتی عێراقی فیدراڵ.”

ئەوەش هاتووە: “داواکارین کە هەرچی زووترە دەست بە پرۆسەی پەروەردە و فێربوون لەو ناوچانە بکرێتەوە، چونکە دەرئەنجامەکانی بایکۆت لە ساڵانی رابردوو زیانی هەبووە و هیچ بوارێکمان نییە گۆڕانکاری لە ساڵنامەی خوێندن بکرێت، بۆ ئەم مەبەستەش سەرجەم بەڕێوەبەرایەتی گشتیی پەروەردە پەیوەندیدارەکان ئاگادار دەکەینەوە کە بە زووترین کات دەستبکرێتەوە بە دەوامکردنی ناوەندەکانی خوێندن.”