هاوسەری یەكەمی فەرهاد پیرباڵ بزانە چی دەلێت
خواكوڕك
هاوسەری یەكەمی فەرهاد پیرباڵ لەسەر هێرش كردنە سەر فەرهاد پیرباڵ و تۆمەتەكانی سەر وەڵامێك دەنووسێت و لەوەڵامەكەدا دەلێت تكایە با ئیتر كۆتایی بەو باسە بێت، چونكە هەموومان ماندووین…تنۆك و ڕۆدان له‌هه‌موومان ماندووتر.
ده‌قی روونكردنه‌وه‌كه،
دوای ماوەیەكی زۆر لە بێدەنگبوون، دوای دنیایەك تۆمەت و سوكایەتی و بوختان و قسەی ناڕەوا بەرامبەرم و دوای داواكاریی چەند كەسێكی نزیكم، كە چیدی بێدەنگ نەبم و شتێك بڵێم، بڕیارم دا ئەم كورتە ڕوونكردنەوەیە بنووسم…
سەرەتا دەبێ ئەوە بڵێم كە ئەم هاتنە دەنگ و ڕوونكردنەوەیە بۆ ئەو كەسانەیە كە نامناسن، یان لە دوورەوە ناومیان بیستووە و دەمناسن، ئەگەر نا كەسە نزیكەكانم دەزانن من كێم و كەسێكی چۆنم، بۆیە پێویست ناكا بۆیان ڕوون بكەمەوە.
بەر لە هەر شت، لە دڵەوە خەمبار بووم بەو گرتە ڤیدیۆیەی لە تۆڕە كۆمەڵایەتییەكاندا بڵاوبووەوە، كە بە دوو چەكدار كەوتبوونە گیانی د. فەرهاد پیرباڵ و بێویژدانانە ئازاری دەدەن، ئومێدەوارم هەرگیز وێنەی وای هیچ مرۆڤێك نەبینم و ئەو ناڕەزایەتییەی خەڵك بەرامبەر ئەو دیمەنە، سەرەتایەك بێ بۆ گەڕانەوەی حورمەت بۆ مرۆڤ و یاسا.
ئەوەی بۆ من جێی داخە ئەوەیە كە ماوەیەكی كەم نییە د.فەرهاد لە هەر شوێن و كەناڵێكەوە بۆی كرابێ، زۆر سه‌رسه‌ختانه خه‌ریكی شكاندن و ناوزڕاندنی منه‌و بوختانم پێ ده‌كات، كه گوایە من خیانه‌تم لێی كردووە و ژنی فڵان و دۆستی فیسارم و به بوختانی له‌و جۆره‌وه نه‌وه‌ستاوه و كه زانیویه‌تی باوه‌ڕی پێ ناكرێت، ئینجا باس له شتی تر ده‌كات، وه‌ك ئه‌وه‌ی ده‌ڵێت (موئامه‌ره‌ی بۆ كوشتنم هۆنیوه‌ته‌وه) و سه‌ر به‌م لایه بووه و سه‌ر به فڵانه‌كه‌س بووه‌و هه‌میشه به ئاشكرا ئاهی حه‌سره‌ت بۆ ئه‌وه هه‌ڵده‌كێشێت كه نه‌یكوشتووم و له چه‌ندین شوێن به‌ئاشكرا ئه‌وه‌ی به نووسین و به وتن ده‌ربڕیوه.
ئه‌و ساڵانێك مێردم بووه و ده‌زانێت من ناو و ناوبانگی خۆمم بۆ گرنگه و حه‌ز ناكه‌م ببم به ده‌نگوباسی خه‌ڵك. بەشێكی ئه‌و زیاده‌ڕۆییه‌ی ئه‌و، ڕەنگە بۆ ئەو بێدەنگبوونەی من بگەڕێتەوە، بەڵام ئەو بێدەنگییەی من لەبەر ئەوە نەبووە كە وەڵامم پێ نییە، لەبەر ئەوە نەبووە كە قسە و هێرشەكانی ئەو ڕاستن و ڕەوان و لەبەر ئەوەش نییە كە لێی دەترسم یان شەرمم بە ڕابردوو و ئێستام هەیە… نەخێر لەبەر هیچ یەكێك لەوانە نییە.
بێدەنگبوونی ژنێك بەرامبەر ئەو بوختان و تۆمەتانەی دەخرێنە پاڵی، بەر لە هەر شتێك لەبەر ژنبوونیەتی… تەنیا ژنەكانن دەزانن ژنبوون لەم كۆمەڵگەیەدا چ ئەركێكی قورسە، بەتایبەت گەر بتەوێ بێ ئه‌وه‌ی بكه‌ویته‌به‌ر قسه‌وباس، كار بكه‌یت و ئه‌ركی دوو منداڵت له‌سه‌رشان بێت كه له قوتابخانه و زانكۆی ئه‌هلی ده‌خوێنن.
جیا لەوە بێدەنگبوونی من لەبەر ڕێزگرتنی خودی د. فەرهاد بووە كه‌دوو منداڵم لێی هه‌یه كه ئه‌وان له هه‌موو شتێك و كه‌سێك بۆم گرنگترن و به‌رهه‌می ژیان و خۆشەویستی و تاڵی و پێكەنین و ئازاری ساڵانێكی ژیانی من و د. فەرهادن و هەر بێڕێزیكردنێكی من و دكتۆر فەرهاد بە یەكتری، برینێكی قوڵ دەبێ بۆ دەروون و هەستی (تنۆك و ڕۆدان)، كە من هەرگیز نەمویستووە ئەو برینە دروست بكەم، یان به‌شێك بم له هۆكاره‌كانی، بۆیە بێدەنگ بووم. جگە لەوەش من لە خانەوادەیەكی وادا پەروەردە بووم كە هەمیشە خۆم بە گەورەتر بزانم لە بوختان و تۆمەتەكان و هەمیشەش باوەڕی پتەوم بەوە بووە ڕۆژێك ڕاستییەكان ڕوون دەبنەوە.
هەموو گوناهی من ئەوەیە لە پیاوێك جیابوومەتەوە و ئەوەندەی توانیبێتم لەگەڵی ژیاوم، لە شوێنێكدا كە زانیومە ژیانی من ئەو پیاوە وەك دوو هاوسەر كۆتایی پێ هاتووە، كۆتاییم پێ هێناوە، كە ئەوە مافی سەرەتایی هەر ژن و مێردێكە. دواتریش بە تەنیاباڵی شانم داوەتە بەر ئەركی بەڕێوەبردنی ماڵ و بەخێوكردنی دوو منداڵ، ئەوانەی لێمەوە نزیكن ئاگادارن بە چ ماندووبوونێكی جەستەیی و هزری توانیومە زاڵ بم بەسەر ئەو ئەركە قوورسەدا، بێ ئەوەی هیچ كاتێك تەنازول بۆ هیچ كەسێك یان بەرپرسێك بكەم، ڕۆژانە چەندین سەعات كارم كردووە و كار دەكەم. سەرەڕای ئەوەی ئاگادار بووم لەولاوە د. فەرهاد چۆن سەرقاڵی كەیف و خۆشیی خۆیەتی و پارە و موڵك و ماڵی خستووەتە خزمەتی كێ و چۆن سەرفی دەكات، بەڵام هەر بێدەنگ بووم و خۆم لەوە بە گەورەتر زانیوە قسە لەوە بكەم .
ئەو باش دەزانێ تۆمەتی (خیانەت) خستنە پاڵ ژنێك لەم كۆمەڵگەیەدا چ هێزێكی گەورەیە بۆ ناشیرینكردن و قێزەونكردن و ڕیسواكردنی ئەو ژنه و تەنانەت ده‌بێته مه‌ترسی به‌سه‌ر ژیانیشی، بەڵام من هەمیشە بێمنەت بووم لەو تۆمەتە، چونكە منداڵەكانم، كەسوكارم، دەوروبەر و هاوڕێكانم باش دەمناسن لەو ڕووەوە و ئەگەر هێندەی تۆزقاڵێك گومان لە ڕاستیی ئەو قسەیە ببوایە، ئێستا بەو بێمنەتییە و وا بێباكانە قسەم نەدەكرد و نەدەهاتم و نەدەچووم… دڵنیاشم بەر لە هەموان خودی فەرهاد خۆی باوەڕی بەو قسەیەی نییە، ئەگەرنا هێندە هەوڵی نەدەدا بگەڕێمەوە لای و وەك جاران پێكەوە بژیین! ئه‌و (جاران)ه‌ی من به خه‌ونیش ناتوانم بیری لێ بكه‌مه‌وه،
جارێكی تر خەمباری ئەوەم ناچاركرام بێمە دەنگ و دەربارەی بابەتێك بدوێم، كە هەمیشە خۆمم لێی پاراستووە و نەمویستووە ڕوونكردنەوەی لەبارەوە بدەم… ئومێدمە لێرەدا كۆتایی بەو بابەتە بێت و چیدی خەڵكانێك سەرقاڵ نەكەین بە خۆمانەوە و كەسانێكی تریش لێرەولەوی نان و پیازمان پێوە نەخۆن و مەجلیسمان پێ گەرم نەكەن. دیسان هیوادارم ناچاری قسەكردنی تر نەكرێم .
لێره‌وه داواكارم له سه‌رۆكایه‌تی هه‌رێم و خودی جه‌نابی سه‌رۆك بارزانی كه هه‌مان ئه‌و لیژنه‌یه‌ی به‌دواداچوون بۆ كه‌یسی هێرشه‌كه‌ی دژی د.فه‌رهاد ده‌كات، له هه‌مان كاتیشدا به‌دواچوون و لێكۆڵینه‌وه له‌و بوختان و ته‌شهیرانه‌ش بكات كه له‌باره‌ی منه‌وه ده‌یانكات. هەر كێشەیەك، یان هەر هەقێك لەسەر من هەیە، لەڕێی یاسا و دەزگا پەیوەندیدارەكانەوە چارەسەر بكرێ و بۆی بگه‌ڕێنرێتەوە، هەر هەقێكیشم كە خوراوە، ئەوان بۆم وەرگرنەوە.
تكایە با ئیتر كۆتایی بەو باسە بێت، چونكە هەموومان ماندووین…تنۆك و ڕۆدان له‌هه‌موومان ماندووتر.
