ئازاد جندیانی: موتڵەقەن لەسەر بەرژەوەندی شەخسی وازم لە یەكێتی نەهێناوە
خواكوڕك
ئازاد جندیانی ئەندامی پێشووی مەكتەبی سیاسی یەكێتی، لەدیمانەیەكی دا لەگەڵ رۆژنامەی رووداو لەبارەی وازهێنانی لەیەكێتی و پرسی ریفراندۆم دەلێت”نابێ هیچ قەیرانێك رێگر بێ لەبەردەم ریفراندۆم و سەربەخۆیی” جوندیانی كە رۆژی 9/2/2017 نامەی وازهێنانی لە یەكێتی ئاراستەی مەكتەبی سیاسی حیزبەكەی كرد، ئاشكرای كرد دوای وازهێنانی لە یەكێتی چاوی بە مەسعود بارزانی كەوتووە و دەڵێت بڕیاری داوە ئیشی حیزبی ناكات، بەڵام لەپێناوی سەربەخۆیی ئەگەر ئەو كارە پێویستی بەو بێت، ئامادەیە بچێتە ناو پارتی.
هەروەها ئازاد جوندیانی دەلێت بۆ سەربەخۆیی كوردستان، سەرۆكی هەرێمی كوردستان تێزەكەی دیاری كردووە كە رێگایەكی ئاشتیانە و نەرمە، بە دوو ئاراستە ئیش لەسەر ئەو مافە دەكرێت: بە ریفراندۆم، بە ئاراستەی دەرەوەش كە ئێمە لەگەڵ بەغدا نامانەوێ ببینە دراوسێیەكی دوژمن و ناكۆك. هەروەها لەگەڵ وڵاتانی دراوسێش دەمانەوێ بە گفتوگۆ و لێكتێگەیشتن بەو مافە رەوایەی خۆمان بگەین.
ئازاد جوندیانی هەروەها لەسەر پاساو هێنانەوە بۆ ریفراندۆم دەشلێـ، هەر لایەنێك دەتوانێت پاساوی نەبوونی زەمینە بۆ ریفراندۆم و سەربەخۆیی بهێنێتەوە، بەڵام نابێ هیچ قەیرانێك رێگر بێت لە بەردەم ریفراندۆم و سەربەخۆیی، چونكە سەربەخۆیی بەشێك لەو كێشە و قەیرانانە چارەسەر دەكات. زەمەن و مێژوو لەسەر من و تۆ ناوەستێ، لە 100 ساڵی رابردوودا چ كاتێك هەلومەرج وەكو ئەوەی ئەمڕۆ لەبار بووە بۆ سەربەخۆیی تاوەكو ئێمە بەهۆی قەیران و كەموكوڕیی ناوخۆیی ئەم دەرفەتەی ئێستا هاتووەتە پێش، وازی لێبهێنین؟ كێ دڵنیایی دەداتە من وەكو هاونیشتمانییەك كە ئەو هەلومەرجە ئیقلیمی و نێودەوڵەتییەی ئێستا هەیە دوای 10 ساڵی دیكە بەردەوام دەبێت ئازاد جوندیانی دەشلێت، پەكخستنی، پەكخرانی و پەككەوتنی پەرلەمانی كوردستان بە هەر سێ ماناكە، ناكرێ بكەینە بیانوو بۆ خۆدزینەوە لە ریفراندۆم، بەكارهێنانی ریفراندۆم وەكو كارتێكی گوشار لەلایەن حیزب و لایەنێك دژی لایەنێكی دیكە، بۆ سازشپێكردنی لە بابەتێكی دیاریكراو بۆ سەرخستنی بەرژەوەندییە حیزبی و شەخسییەكان، لە بەرژەوەندیی گەلی كوردستاندا نییە.
ئازاد جوندیانی دەشلێت، یەكێتی لە چاو چوار مانگ پێش ئێستا دیدێكی رۆشنتری بۆ سەربەخۆیی هەیە، بۆ یەكێتی وا باشە كە ریفراندۆم بكرێت، چونكە یەكێك لە دروشمەكانی یەكێتی مافی چارەی خۆنووسین بووە، یەكێتی لەبارەی سەربەخۆیی موراجەعەیەكی خۆی كردووە، هیوادارم جدیتر و بوێرتر موراجەعە بكاتەوە هەروەها ئازاد جوندیانی دەلێت، پێموایە بەشێكی یەكێتی لە سەرەتاوە بۆ ریفرندۆم نایەت، دواتر ناچار دەبێت ئەویش بێت، پێشتر هەر كاتێك كاك مەسعود بارزانی باسی سەربەخۆیی و ریفراندۆم بكردایە وەڵامێكی خێرا لە لایەنەكانەوە دەبوو كە دەیانگوت موزایەدەیە، بەڵام دوای هاتنی سكرتێری گشتیی نەتەوەیەكگرتووەكان بۆ هەولێر، ئیدی ئەو وەڵامە گۆڕاوە، ئێستا دەڵێن بەبێ پەرلەمان ناكرێت، یاخود بنەماڵەی بارزانی دەیانەوێ شانشین دروستبكەن، بێگومان پارتی و ئەو بەشەی یەكێتی لەگەڵ یەكگرتوو، هەروەها لایەنەكانی دیكە بچنە پاڵ یەكدی و هەنگاو بنێن، پێموایە ئەو بەشەی یەكێتی ناچارە رابكات و بگاتەوە بەوان، دەشلێت، پارتی ئەگەر چاوەڕێی چارەسەر دەكات ئەوە گرنگ و پێویستە، بەڵام ئەگەر پارتی وای دەبینن ئەم گفتوگۆیانە زیاتر بۆ پەكخستن و رێگرییە لە چوونەپێشەوەی ریفراندۆم ، پێموایە پێویست ناكات چاوەڕێ بكات.
ئازاد جوندیانی لەبارەی بۆچوونی بارزانی لەسەر ریفراندۆم دەلێت، بەبێ ئەوەی وردەكارییەكەت بلێم، كاك مەسعود بارزانی لە ریفراندۆم و سەربەخۆیی راستگۆیە، مەبەستێتی بە بەشداریی كارای ئەو، یان رۆڵی هەبێت لەوەی كورد بگاتە ئەو مافە رەوایەی خۆی، بە نەفەسێكی درێژ لەگەڵ لایەنەكان ئیش دەكات بۆ ئەوەی زۆرترین لایەن و ئاراستەی سیاسی لەو پرسە كۆبكاتەوە، پێموایە لە یەك دوو مانگی داهاتوودا كاك مەسعود بارزانی هەنگاوی باش بۆ ریفراندۆم دەنێت.
ئازاد جوندیانی لەبارەی رێكەوتنی یەكێتی و گۆڕان دەلێ”. تێبینیم لەسەر رێككەوتنی یەكێتی و گۆڕان هەبوو، كاتی خۆیشی بە راشكاوانە ئەو تێبینیانەم گوتووە، ئەو رێككەوتنە ئەوەندەی پەیوەستە بە جوگرافیایەكی دیاریكراوەوە، ئەوەندە پەیوەست نییە بە سەرتاسەری كوردستان، هەر لایەك لە شوێنی یەكێتی بووایە رێككەوتنی لەگەڵ گۆڕان دەكرد، چونكە هەردووكیان خاوەنی نفوز و جەماوەرن لە یەك ناوچە، ئەوكاتیش گوتم كە چۆن یەكێتی رێككەوتنی ستراتیژی لەگەڵ پارتی هەیە، دەبێ پەیوەندییەكی زۆر باشی لەگەڵ گۆڕانیش هەبێت هەروها ئازاد جوندیانی دەلێت، پەیوەندی بە كێشە نێوخۆییەكانی یەكێتییەوە هەبوو، بەشێكی دیكەشی پەیوەندی بەو مێژووە كورتە پڕ لە تەشەنوج و ناكۆكییەی نێوان گۆڕان و یەكێتییەوە هەبوو، ئەگەرچی دڵنیاییەك درابووە پارتی كە ئەم رێككەوتنە لە دژی ئەوان نییە، بەڵام وەكو سلێمانی دەڵێن، هەرچی سەرە واوێكی لەسكدابێت، دەیزانی ئەم رێككەوتنە بۆ پەراوێزخستنی پارتی بوو. رێككەوتنی گۆڕان و یەكێتی جۆرێك بوو لە زیندووكردنەوە و بەردەوامی ئەو مەدرەسە سیاسییەی كە لە سلێمانی هەبووە بۆ دژایەتی پارتی، هەندێك نووسەر و رۆشنبیریش نووسیویانە كە ئەمە جۆرێكە لە زیندووكردنەوەی ناكۆكییەكانی ساڵی 1964.
هەروها ئازاد جوندیانی لەبارەی نەمانەوەیی لەناو یەكێتی ئەوەشی گوت: ئەگەر ئومێدم هەبووایە دەمامەوە، بەڵام ئومێدم نەبوو یەكێتی بخەینەوە سەر سكەی خۆی، پێموانەبوو لەنێو یەكێتی بەو میكانیزمی ئیشكردنە بتوانم هیچ رۆڵێكم هەبێت، من بەدوای رۆڵی سفر ناگەڕێم، نامەوێ رۆڵم 100 بێ، بەڵام لەو شوێنە نابم كە رۆڵم سفر بێت، دەمەوێ ئەوەش بڵێم، موتڵەقەن لەسەر بەرژەوەندی شەخسی وازم لە یەكێتی نەهێناوە. هەروها دەلێت، بڕوا ناكەم جێگرانی سكرتێری گشتی ئەوەی دەیانەوێ بتوانن لەنێو یەكێتی جێبەجێی بكەن، من خۆم پێموایە ژمارەیەك لە رەفیقەكانیشم لە سەركردایەتی و مەكتەبی سیاسی ئێستا رۆڵی سفر لەنێو یەكێتی دەبینن.
ئازاد جوندیانی لەبارەی بۆچوونی مام جەلال بۆ سەربەخۆی كوردستان دەلێت، من سەرپشك نیم بە ناوی مام جەلالەوە قسە بكەم، دەستم بە نووسینەوەی یاداشتەكانم كردووە و ناویشم بۆ داناوە: (ژوورە شێدارەكانی سیاسەت)، لەوێ زۆر شت باس دەكەم، مام جەلال لایەنگری سەربەخۆیی كوردستان بوو، كتێبێكی هەیە كە وەڵامی شیوعییەكانی داوەتەوە بە ناوی (أغد ودیمقراگی وحرمان شعب حتی من حق الحلم؟) لەوێ روانگە و ستراتیژی مام جەلال بۆ سەربەخۆیی خراوەتەڕوو، من حەقم بە لێدوانی لابەلا بۆ مامەڵەكردنی رۆژانە لەگەڵ وڵاتانی ئیقلیمی نییە، ئەمە شتێكی تاكتیكیە، بەڵام روانگەی ستراتیژیی مام جەلال لەگەڵ سەربەخۆیی كوردستانە.
ئازاد جوندیانی لەبارەی كتێبەكەی سەڵاح رەشید دەلێت، زۆر جاران كاك سەڵاح رەشیدم دەبینی كە دەهاتە لای مام جەلال بۆ تۆماركردنی ئەو یاداشتە، پتر لە دووجار گوێم لێبووە مام جەلال دەیگوت كاكە سەڵاح ئەم شتانە بە ئەمری خۆم نەبێت یان لە دوای خۆم، بڵاوناكرێنەوە.
هەروەها جندیانی لەبارەی بۆچوونی مام لەسەر كێشەو ناكۆكیەكانی نێوان پارتی و یەكێتی دەلێت، ئامۆژگارییەكانی ئەوە بوو كە نابێ لەگەڵ پارتی تێكیبدەین، بەو پێییەی من بەرپرسی مەكتەبی راگەیاندن بووم، دەیگوت ئەگەر پێویست بكات، قسە لەسەر پارتی بكەن، بەڵام نابێ لەسەر ماڵی مەلا مستەفا قسە بكەن، مام جەلال پیاوێكی تێگەیشتوو بوو، دەیزانی كە بە ناكۆكییەكی 50 ساڵی نەتوانرا هیچ لایەك ئەوەكەی دیكە بسڕێتەوە، بۆیە دەبێ رێكبكەوین.
ئەو ئەندامەی پێشووی مەكتەبی سیاسی یەكێتی لەبارەی پەكەكە و شنگال دەلێ، بۆ بەس لە شنگال، لە زۆربەی ناوچەكانی كوردستان هەیە، وجودی پەكەكە بەم تەشەنوجە لێرە نابێت، ئەم بوونە زەرەری لە هەرێمی كوردستان داوە، نابێ بەبێ رێككەوتن لەگەڵ حكومەتی هەرێمی كوردستان پەكەكە لێرە هەبێت، چۆن ئێمە بۆمان نییە لە كوردستانی توركیا خۆمان بسەپێنین ئەوانیش لێرە ناتوانن وا بكەن. مەترسییەكە لێرەیە كە روانگەی پەكەكە بۆ چارەسەركردنی كێشەی كوردستان لەگەڵ هەرێمی كوردستان جیاوازە، بە تایبەتی لەدوای دەرچوونی تێزەكەی ئۆجەلان كە بڕوای بە دەوڵەتی نەتەوەیی نییە، بەڵكو خۆسەری دیموكراتی كە ئێستا لە رۆژئاوا جێبەجێ كراوە، بە چارەسەر دەزانێ. ئەگەر ئەوە لە شنگال جێبەجێ بكرێت، مەترسی پێكدادانی دوو فەلسەفە هەیە، هەورەها دەلێ پەكەكە لە كوردستانی عێراق زۆر پەرەی سەندووە، رەنگە لە بواری سەربازی پەرەی نەسەندبێ، بەڵام لە بواری پروپاگەندە و راكێشانی خەڵكێكی تەمەن دیاریكراو بۆ لای خۆی، چالاكە”.
جندیانی لەبارەی روونكردنەوەكەی سەرۆكی هەرێم لەسەری گوتی” ئەو كاتەی دەستم لەكاركێشایەوە هەڵمەتێكی توندی چەواشەكارانە كرایە سەر من. روونكردنەوەی سەرۆكایەتی هەرێمی كوردستان پشتگیرییەكی مەعنەویی گەورە بوو بۆ من. ئەوانیش ئامادەیی خۆیان دەربڕی لە هەر شوێنێك بتوانم خزمەت بكەم، بۆیە ئەوەم وەكو پێشنیازێك وەرگرت و سوپاسی سەرۆكی هەرێمی كوردستان دەكەم هەروەها دەلێت دوای ئەوەی دەستم لەكاركێشایەوە چوومە خزمەتی و میوانداری كردم، زۆر بابەتمان پێكەوە باس كردووە، بەڵام تەركیزمان لەسەر چۆنیەتی سەرخستنی ستراتیژی سەربەخۆیی بوو.
ئەو ئەندامەی پێشووی مەكتەبی سیاسی یەكێتی دەلێت، لە نامەكەدا بە روونی باسم كردووە كە لەپێناوی ستراتیژی سەربەخۆیی كاردەكەم، بڕوا ناكەم ئێستا پێویستی بەوە هەبێت لەپێناوی سەربەخۆیی ببمە پارتی، بەڵام ئەگەر رۆژگارێك رۆڵی من ئەوە بوو لە پارتییەوە بچم كار بۆ سەربەخۆیی بكەم، ئامادەم بچم بیكەم، ئەگەر لەنێو یەكگرتووش بێت دەچم دەیكەم هەروەكو پێشتر لەنێو یەكێتی كردوومە. نە پارتی داوای لێكردووم ببمە پارتی، نەخۆشم دەمەوێ بچمەوە نێو مەعەممای حیزبی. لەبەر ئەوە نییە پارتیبوون عەیب بێت. هەزاران تێكۆشەری گەورە لەنێو پارتی هەن و هەزار تێكۆشەری گەورەش لە نێو پارتی سەریان نایەوە، لەوانە باوكم. بەڵام لەوانەیە ئەو خزمەتەی لە دەرەوەی حیزب دەتوانم بیكەم بۆ سەربەخۆیی، لەنێو حیزب نەتوانم بیكەم.
جندیانی لەبارەی وازهێنانی كەسەكانی لەناو یەكێتی دەلێ” نزیكەی 500 خزمم لەنێو هێزەكانی یەكێتیدان، ئەوانە زۆریان حەزدەكەن شوێنیان بگوازنەوە، بە كورتییەكەی سیستەمی حیزبایەتی وایە، ئەوانە لە رێگای منەوە بوونەتە یەكێتی و پێشمەرگە و چەكداری یەكێتی، كە من لەنێو یەكێتی نەماوم، ئەوانیش حەز دەكەن بێنە شوێنێك لە منەوە نزیك بن.
