نووسه‌رێك: رێگری كردن له عه‌بادی بۆ دووباره‌ی بوونه‌وه‌ی به‌سه‌رۆكوه‌زیرانی عێراق سه‌ركه‌وتنێكی گه‌وره‌یه بۆ كورد
نووسه‌ر و توێژه‌ری سیاسی عادل باخه‌وان، له وتارێكی دا به‌ناوی (هه‌ڵه‌ی ستراتیژیی کورد له ئێستادا) كه له تۆڕی كۆمه‌ڵایه‌تی فیسبووك بڵاو كراوه‌ته‌وه، ده‌نووسێـ”من وشیارم به‌وه‌ی که له ئێستا و ئێره‌دا ماڵی سیاسی کوردی وه‌ک لاپه‌ڕه‌یه‌ک دڕاوه و سه‌دان ناکۆی له‌نێوان گروپه سیاسیه‌کاندا هه‌یه، به‌ڵام سه‌ره‌ڕای هه‌موو لێکترازانه‌کان، سه‌ره‌ڕای هه‌موو دڕانه‌کان، سه‌ره‌ڕای هه‌موو ناپاکیه‌کان، سه‌ره‌ڕای هه‌موو ئه‌و غه‌درانه‌ی له یه‌کتری و له کۆمه‌ڵگای کوردیان کرد،گه‌ر لایه‌نی هه‌ره‌که‌می به‌رپرسیاریی له‌به‌رامبه‌ر “کوردبوون”دا لای گروپه سیاسیه‌کان مابێت، ده‌بێت هه‌موو تواناکانیان بخه‌نه کار، بۆئه‌وه‌ی جارێکی دیکه عه‌بادی نه‌بێته‌وه به سه‌رۆک وه‌زیرانی عێراق.
هه‌ر له نووسینه‌كه‌ی عادل باخه‌واندا هاتووه”که‌وتنی که‌رکوک له 16ی ئۆکتۆبه‌ر دا، له‌ڕوی سایکۆلۆژیه‌وه چه‌ند برینێکی سه‌خت و قوڵی له یاده‌وه‌ریی ده‌سته‌جه‌معیی کوردیدا به‌جێهێشت، بوونه‌وه به سه‌رۆک وه‌زیرانی عه‌بادی، ئه‌وه‌نده و له‌هه‌مان ئاستدا، برینێکی دیکه‌ی سه‌خت و قوڵ له هه‌مان یاده‌وه‌ریدا به‌جێده‌هێڵێت. سیاسه‌ت بریتیه له ئیداره‌کردنی ستراتیژیه‌کان له کورته مه‌وداو نزیکه مه‌ودا و دوره مه‌ودادا. ستراتیژیه‌کانیش له‌سه‌ر په‌یوه‌ندیه‌کانی هێز له‌نێوان ئه‌کته‌ره‌کاندا دروستده‌کرێن.
