عه‌لی حه‌مه‌ساڵح: یه‌كێتی له‌گه‌ڵ نالیا هاوبەشن و %20ی پڕۆژەکانی شاسوار عەبدولواحید پشكی یەكێتییە.
ئه‌ندامێکی په‌رله‌مانی كوردستان، بە بەڵگە وه‌ڵامی شاسوار عه‌بدولواحید، سه‌رۆكی جووڵانه‌وه‌ی نه‌وه‌ی نوێی دایه‌وه‌و رای گەیاند: ئیداره‌ی گشتیی یه‌كێتی نیشتمانی كوردستان له‌گه‌ڵ كۆمپانیای نالیا هاوبه‌شن و 20%ی گوندی ئه‌ڵمانی موڵكی ئیداره‌ی گشتیی یه‌كێتییه.
پەرلەمانتار عه‌لی حه‌مه‌ساڵح له كۆنگره‌یه‌كی رۆژنامه‌وانی رای گەیاند، دادگاكان بۆ شاسوار كۆنترۆڵ كراون و 20%ی گوندی ئه‌ڵمانی موڵكی ئیداره‌ی گشتیی یه‌كێتییه.
گوتیشی:” 14 سكاڵا له‌سه‌ر كۆمپانیای نالیا تۆمار كراون، به‌ڵام داخراون و ده‌ستوه‌ردانی سیاسیی لەلایەن یەکێتییەوە بۆ كراوه.
لە کۆنگرەرۆژنامەوانییەکە عه‌لی حه‌مه‌ساڵح داوای له مه‌سرور بارزانی سه‌رۆك وه‌زیرانی كوردستان كه 82 ملیار دینار قه‌رز لای شاسوار هه‌یه و پێویسته لێی داوا بكرێته‌وه و بیداته‌وه، جگه له‌وه‌ی دوو ملیار دیناری پاره‌ی كاره‌بای لایه و نایداته‌وه.
دووپاتی كرده‌وه كه شاسوار ده‌نگی به ساخته هێناوه و سه‌تان به‌ڵگه‌یش له‌وباره‌یه‌وه له به‌رده‌ستن.
باسی لەوەشکرد، له سنووری سلێمانی شه‌قامی گشتیی به‌ناوی شاسواره‌وه تاپۆ كراوه، زه‌وی سه‌وزایی بۆ كراوه به ڕه‌هن تا قه‌رز وه‌ربگرێ.
هه‌روه‌ها وتی: سه‌یرترین نوكته ئه‌مه‌یه، له هیچ شوێنێكی دنیا ئه‌مه بۆ ئۆپۆزیسیۆن ناكرێت، بۆ زانیاریتان له بنكه‌ی پۆلیسی ئه‌زمڕ سكاڵا له دژی سه‌رۆكی جووڵانه‌وه‌ی نه‌وه‌ی نوێ وه‌رناگیرێت. كۆمپانیایه‌ك له كۆیه سكاڵای تۆمار كردووه، ده‌ڵێت زیانی زۆری لێداوین، چووه‌ته بنكه‌ی پۆلیسی ئه‌زمڕ و زۆر به روونی وتوویانه له سه‌ره‌وه فه‌رمانمان پێكراوه و سكاڵا له دژی ئه‌و كه‌سه وه‌رناگرین.
ئاشكراشیكرد، پێرێ ته‌ندرووستی سلێمانی چوون سكاڵای له دژ تۆمار بكه‌ن له‌سه‌ر تۆمه‌تانه‌ی خستوویه‌تییه پاڵیان، به روونی پێیان وتوون له سه‌ره‌وه پێمان وتراوه سكاڵای له‌سه‌ر تۆمار نه‌كرێت.
ئه‌و په‌رله‌مانتاره، ئاشكرای كرد، به‌ڕێوبه‌ری پێشووی بنكه‌ی ئه‌زمڕ، ناوی كاك سه‌ربه‌ست بووه و له‌سه‌ر ئه‌وه‌ی ویستوویه‌تی كه‌سێكی نزیكی شاسوار عه‌بدولواحید له‌سه‌ر فه‌رمانی دادگا ده‌ستگیر بكات و مه‌فره‌زه‌ی ناردووه، مه‌فره‌زه‌كه نێردراوه‌ته‌وه و سزادراوه و ئه‌و به‌ڕێوبه‌ره‌ش ده‌ركراوه.
