دكتۆر باخان ئازاد: وریا حەمەكەریم گەندەڵی ئاشكرا كردووە و هەڕەشەی كوشتنی لێ كراوە، بۆیە مردنەكەی گوماناوییە
خانمە پزیشكێكی هەڵەبجە گومان دەخاتە سەر هۆكاری مردنی رۆژنامەنووس وریا حەمەكەریم و ئاشكرای دەكات كە بەهۆی ئاشكراكردنی گەندەڵییەكانەوە لە ماوەی رابردوودا هەڕەشەی كوشتنی لەسەر بووە.
بەیانیی ئەمڕۆ پێنجشەممە 6ی 2ی 2025، هەواڵی گیان لەدەستدانی رۆژنامەنووس وریا حەمەكەریم بڵاو كرایەوە كە لە كەناڵی (NRT) كار دەكات و راگەیاندرا كە بەهۆی پێكدادانی ئۆتۆمبێلەكەی لەگەڵ بارهەڵگرێك لە ڕێگەی نێوان عەربەت – سلێمانی، گیانی لەدەست داوە.
لەمبارەیەوە دكتۆر باخان ئازاد، خانمە پزیشك لە هەڵەبجە و چالاكی سیاسی لە دەڤەری سلێمانی، لە پێگەی خۆی لە تۆڕی كۆمەڵایەتیی (فەیسبووك) بڵاوی كردەوە: پێویستە لێكۆڵینەوەی ورد بكرێ لەسەر هۆكاری مردنی كاك وریا و سەرجەم كامێراكان بۆ خەڵكی كوردستان لێ بدرێنەوە، چونكە وریا حەمەكەریم ڕۆڵی گرنگی هەبوو لە ئاشكراكردنی گەندەڵی و كارەساتەكانی ئەمڕۆی هەڵەبجە.
هەروەك ئەوەی ئاشكرا كردووە كە پێشتر هەڕەشەی كوشتن لەو رۆژنامەنووسە كراوە و نووسیویەتی: ئەو كەسەی هەڕەشەی كوشتنی لێكردبوو، لە لە مانگی 12ی 2024، لە ڕێگەی تیڤییەكانەوە بینیمان كە چۆن ماوەی چوار ساڵە وەك بەرزەكی بانان بۆی دەرچووە.
هەروەك جەختی كردۆتەوە: مردنی براكەم و هاوڕێم كاك وریا جێی پرسیارە، دەبێ بە وردی كامێراكان بۆ رای گشتی لێ بدرێ و پشكنین بۆ ئۆتۆمبێلەكەی بكرێت.
ئەوەش ئاشكرا دەكات كە پێشتر بەم جۆرە ڕووداوە هەڕەشەیان لێ كراوە و نووسیویەتی: چەندین جار پێمان گوتراوە دانیشتە بە دەردی خۆتەوە با تڕێلە و لۆرییەك رانەسپێرین بتكوژێ و دوایی بڵێن مردنی خوایی و قەزا و قەدەر بوو.
