وەزارەتی پێشمەرگە دەنگۆی بەشداریی لە هێرشی سەر بارەگایەکی حەشدی شەعبی ڕەت کردەوە
لە ڕاگەیاندراوێکدا وەزارەتی کاروبارى پێشمەرگەی حکومەتی هەرێمی کوردستان ، کە ئەمڕۆ شەممە بڵاو کردووەتەوە و تێیدا هاتووە: ئەمڕۆ لە چەند کەناڵ و پەیجێکی ڕاگەیاندندا، هەواڵێکی ناڕاست بڵاو کراوەتەوە کە گوایە هێزەکانی پێشمەرگە دەستیان هەبووە لە هێرشکردنە سەر بارەگایەکی حەشدی شەعبی لە سنووری پارێزگای سەلاحەدین.
ڕاشیگەیاندووە: تەواوی ئەم دەنگۆ و هەواڵانە بەتوندی ڕەت دەکەینەوە. ڕایدەگەیەنین کە هێزی پێشمەرگە بە هیچ شێوەیەک بەشێک نییە لەو گرژی و ململانێ سەربازییانەی لە ناوچەکەدا هەن، پێشمەرگە بەشداریی هیچ جۆرە کردەیەکی سەربازیی دژ بە هیچ لایەنێک نەکردووە.
لە کۆتایشدا دەڵێ: ئەرکی سەرەکیی هێزەکانمان پاراستنی ئاسایش و سەقامگیرییە و پابەندین بە هەماهەنگی و کاری هاوبەش لە گەڵ هێزە ئەمنییە عێراقییەکاندا.