ژنە نووسەرێكی عەرەب: لەبەر ئەم سێ‌ هۆكارانە پشتیوانی سەربەخۆیی كوردستان دەكەم

ژنە نووسەر و چالاكی بواری سیاسی و كۆمەڵایەتی عەرەب لە میسر و لوبنان، نیرڤانا مەحموود وتارێكی بە هەردوو زمانی عەرەبی و ئینگلیزی بڵاوكردووەتەوە و تێیدا پشتیوانی بۆ سەربەخۆیی كوردستان دەربڕیوە و رایگەیاندووە، لەبەر سێ هۆكار پشتگیری لە سەربەخۆیی كوردستان دەكەم.

لە وتارەكەی نیرڤانادا هاتووە:

لە ساڵی 838ی كۆچی، فەرماندەیەكی كورد بە ناوی میر جەعفەر داسنی لە مووسڵ لە دژی خەلیفە موعتەسەم راپەڕی. دوای زنجیرەیەك رووبەڕووبوونەوە لە نێوان عەرەب و كورددا، ئیتاخی فەرماندەی خەلیفە كە ئەویش عەرەب نەبوو، سەركەوتنی بەدەستهێناو زۆرێك لە كوردەكانی لە سێدارە دا، بەڵام میر جەعفەر داسنی خۆی كوشت، بۆ ئەوەی نەكەوێتە دەست فەرماندەكەی خەلیفە.

هەروەها نووسیویەتی:

رەنگە زۆرێك لەوانەی نەیاری راپرسی كوردستانی عێراقن شتێكی ئەوتۆ لە بارەی ململانێی مێژوویی بە درێژایی سەدەكانی ناوەڕاست نەزانن. بەڵام هیوا دەخوازن مێژوو خۆی دووبارە بكاتەوە و جارێكیدیكە كورد تێكبشكێنن، بەڵام ئەوه روونادات و دوورە. نەیارانی كوردی عێراق زۆرن و تەنیان لە پشتیوانی راپرسییەكەیان. ئەوانە بە درێژایی مێژوویان هیچ كات هێندەی ئەمڕۆ تەركیز و سووربوونیان بە خۆوە نەبینیوە.

سانا بوو بۆم پەیوەندی بكەم بە گرووپگەلی نەیاری راپرسی كوردەوە، لەگەڵ ئەوەشدا بڕیارمدا بە خۆبەكەمگرییەوە بچمە پاڵ كوردە ئازاكان، ئەوانەی هەوڵی درووستكردنی دەوڵەتەكەیان دەدەن، لەبەر چەند هۆكارێك لەوانە:

یەكەم: چونكە پرسێكی رەواو و دادوەرانەیە:

سەرەڕای ئەوەی لە میسر بوومە. لە تەمەنێكی زووەوە دەستمداوەتە چاودێریكردنی پێشهاتە سیاسی و هەرێمایەتییەكان، بەڵام هەرگیز وشەی “أكراد”م نەبیستبوو، مەگەر ئەو كاتەی لە 1988 سەرپێی دەهاتە بەر گوێم كە سەدام حوسێن بە چەكی كیمیایی لە هەڵەبجە كۆمەڵكوژی كردن. لەگەڵ ئەوەشدا زۆرێك لە عەرەبەكان رووی كوردیان دەبێزراند و وا وێنایان دەكێشان گوایە بەكرێگیراوی هێزی بیانین.

لە میانی سەردانەكانی ئەم دواییەم بۆ سووریا و ئێران و توركیا تووشی شۆك بووم كاتێك قەبارەی كارەسات و مەرگەسات، بەڵكو ئەو رەگەزپەرستییەم بینی كە دژی كورد بەڕێوەدەبرێت. هێزە هەرێمایەتییەكان پەردەی ئاكاریان لە روو داماڵراوە بە هۆی چەوساندنەوەی بەردەوامی كورد. هەربۆیە مافی ئەوەم نییە ئامۆژگاری و پەنددادەرزی كورد بكەم و بڵێم ئەوە بكەن و ئەوە مەكەن.

دووەم: جێگەیەك بۆ دەستەواژەی “كاتی گونجاو” نەماوەتەوە:

سەربەخۆیی كوردستان چەند جارێك دواخراوە. ئەوان سەد ساڵە خەون بە سەربەخۆییەوە دەبینن. بەڵام ئایا سەدەیەك چاوەڕوانی بەس نییە، داوا لە كورد دەكرێت جارێكی دیكە دوای بخات، پێیان دەڵێن: كاتەكە گونجاو نییە، ئەمە بووەتە یەكێك لەو پاساوانەی كە بە هۆیەوە داوای هەڵوەشاندنەوەی راپرسی دەكرێت.

لەگەڵ هەموو ئەمانەشدا، كورد لە تێكۆشانی سەد ساڵەی بۆ سەربەخۆیی یەك وانەی وەرگرتووە، ئەویش ئەوەیە (هیچ كاتێكی گونجاو نییە)، نەتەوەی كورد هۆكاری فشەڵی رەوشی عێراق و سووریا نییە. بە چاوپۆشی لە خواستەكانی كورد، رەوشی ئەو وڵاتانە هەر وا ئەمێنێتەوە.

سێیەم: كوردستانی سەربەخۆ هۆكاری هاوسەنگییە:

لە سایەی ئەو رەوشەی خۆرهەڵاتی ناوەڕاستی گرتووەتەوە، هەریەك لە ئێران و توركیا و سعودیە كێبڕكێیانە لەسەر هێز و هەژموون، كوردستانێكی سەربەخۆ لەو نێوەندەدا دەتوانێت ببێتە بەربەستێك بۆ وەستانی خواستە ئاگرینەكانی هەریەك لە توركیا و ئێران كە بە توندی دژی سەربەخۆیی و راپرسی كوردن.

هەروەها عێراقییەكی لایەنگری ئێران وەك نوری مالكی كە جێگری سەرۆك كۆماری عێراقە، دەڵێت: “رێگە نادەین ئیسرائیلی دووەم لە باكووری عێراق درووست بێت”. كەناڵەكانی راگەیاندنی توركیای سەر بە ئەردۆغان هەواڵی درۆ و چەواشەكاری بڵاودەكەنەوە و باس لەوە دەكەن، بەرپرسانی كورد رێككەوتنێكی نهێنیان لەگەڵ ئیسرائیل كردووە، بۆ نیشتەجێكردنی جوولەكەكان لە هەرێم، بەڵام ئەوانە چەواشەكارن و راستییەكەی ئەوەیە ئیسرائیل پشتیوانی راپرسی دەكات. بەڵام كورد هۆكاری بەهێزتر و قوڵتریان هەیە بۆ بەدیهێنانی خواستەكانیان بەرەو سەربەخۆیی، سەرەڕای پشتیوانی ئیسرائیل.

لە خۆرهەڵاتی ناوەڕاستدا بە ئەرێنی سەیری كورد ناكرێت، مەگەر ئەوەی بووبێتە عەرەب، بەڵام كوردێكی نەتەوەیی بەردەوام بە شێوەی نەرێنی وێنا كراوە. شێواندنی وێنەی كورد هیچ نییە جگە لە دزێوی ئایدۆلۆژیای باوی ناوچەكە جا چ ئیسلامی بێت بە لقەكانی سوننە و شیعەوە، یان نەتەوەیی عەرەب بێت، هەربۆیە لەسەر ئەو هۆكارانە وەك لیبراڵییەك دژی ئەو هۆڤییەتەی ئایدۆلۆژیا دەوەستمەوە و پشتیوانی ریفراندۆم و سەربەخۆی كوردستان دەكەم.

هەروەها بە دوور لە رێچكەی راپرسیش، پشتیوانی مافی چارەی خۆنووسین بۆ كورد دەكەم. تەنیا یەك شت ماوە بیڵێم ئەوەیە كە ئەو پشتیوانییەم مەرجدارە بە مەرجی ئەوەی هیوای بۆ دەخوازم كە هەرێمی كوردستان بنەمای زۆرتری لیبراڵیبوون و پێشكەوتن لەبەر چاو بگرێت. دەسەڵاتێكی نا سەركوتكەر و نا سەراپاگیر لە كوردستان بنیاتبنێت. كە لە توانایدا هەبێت دۆستایەتی عەرەب و توركمانەكانی ژێر دەسەڵاتی بە لای خۆیدا راكیشێت. من متمانەی ئەوەشم بە كورد هەیە كە نموونەیەكی ئەرێنی لە چاو هەموو ناوچەكە بەدیدەهێنن، هیواداریشم ئەو متمانەیەم لەدەست نەدەن.