پەرلەمانتارێكی كورد : شەراكەت لە عێراق كۆتایی پێهات

دوای ئەوەی ئەمڕۆ پەرەلمانی عێراق بە بێ‌ رەچاوكردنی خواستی كورد لە بودجەی 2018ی عێراق, بودجەكەی تێپەڕاند, پەرلەمانتارێكی كورد لە پەرلەمانی عێراق رای دەگەیەنێت، حكوومەت و پەرلەمانی فیدڕاڵی سەلماندیان كە نایانەوێت كورد لەچوارچێوەی دەوڵەتی عێراقیدا بمێنێتەوە.
نەجیبە نەجیب، پەرلەمانتاری كورد و ئەندامی لیژنەی ئابووریی و وەبەرهێنان لە پەرلەمانی عێراق، لە دوای پەسەندكردنی یاسای بودجەی گشتیی عێراق بۆ ساڵی 2018 بە بی ئامادەبوونی فراكسیۆنە كوردستانییەكان، لە ڕاگەیاندراوێكدا ڕای گەیاند: “ئەو بودجەیەی پەرلەمان دەنگی لەسەر دا، بودجەی 15 پارێزگایە، نەك هەموو عێراق”.
جەختیشی كردەوە، كە سەلیم جبووری، سەرۆكی پەرلەمانی عێراق، بەرپرسیارێتی تیپەڕاندنی یاسای بودجە بەو هەموو پێشێلكارییەوە، لە ئەستۆ دەگرێت
ئەو پەرلەمانتارە كوردە ئاماژەی بەوەشدا، كە لەتێپەڕاندنی یاسای بودجەی 2018، مادەی 14ی دەستوور پێشێل كراوە، هەروەها یاسای 115ـەش كە باس لە دابەشكردنی سامان و داهات و قەرزەكان بە دادپەروەی دەكات، پێشێل كراوە، ئەمە جگە لەوەی پێشێلكاریی بەرامبەر مووچەی پێشمەرگە و شایستە داراییەكانی بەڵێندەران و كۆمپانیاكانی بواری دەرهێنانی نەوت كراوە.
باسی لەوەش كرد، كە فراكسیۆنە كوردستانییەكان بۆیە بایكۆتی دانیشتنەكەیان كرد، بۆ ئەوەی نەبنە شایەتی یاسایەك كە تێیدا بنەمای سازان و شەاكەت پێشێلكراوە، كە لەدوای ساڵی 2003ەوە، كورد بەو نیازەوە گەڕاوەتەوە بۆ بەغدا.
جەختیشی كردەوە، كە بە كەمكردنەوەی پشكی هرەێمی كوردستان لە 17%ەوە بۆ 12% بە بێ هیچ بیانوویەكی یاسایی و دەستووری، جێگەی قەبولكردنی لایەنە كوردستانییەكان نییە، گوتیشی: “بەگەلی عێراق و جیهان و كۆمەڵگەی نێودەوڵەتی دەڵێین، كورد لەم وڵاتەدا جێی خواستی لایەنەكانی تر نییە”.
لەكۆتایی ڕاگەیاندراوەكەدا، ئەوەشی وەبیرهێنایەوە، كە حكوومەتی بەغدا دەیەوێت كورد ناچار بكات بگەڕێتەوە بۆ سەردەمی سەدام و حكوومەتی مەركەزی، بۆیە داوای لەسەركردەكانی كوردستان كرد، ئەم هەڵوێستە تاوتوێ بكەن و ئەوە بزانن، دوای پەسەندكردنی یاسای بودجە، هاوبەشی لە عێراق كۆتایی پێهات، گوتیشی: “پێویستە سەركردەكانی كوردستان سنوورێك بۆ سووكایەتیكردن بە گەلی كوردستان دابنێن، كە ڕۆژانە بەهۆی سیاسیەتی بەغداوە ڕووبەڕووی دەبنەوە”.