نزار مه‌حمود :کێشەکانی ناو یەکێتی ھۆکارە بۆ دواخستنی کابینەی نوێی حکوومەتی ھەرێم
نزار مەحموود، ئەندامی جڤاتی نیشتمانی گۆڕان، ڕاگەیاند: “یەکێتی بەھۆی پۆستی پارێزگاری کەرکووک و پۆستەکانی عێراقەوە، دەیەوێ پرسی پێکھێنانی کابینەی داھاتووی حکوومەتی ھەرێمی کوردستان دوابخات، باڵام پارتی براوەی ھەڵبژاردنەکانە، بێگومان پارتی حکوومەت پێکدەھێنێت، بۆیە پیویستە پارتی پەلە بکات و چاوەڕێی یەکێتی نەکات و حکوومەت پێکبھێنێت”.
ئەندامه‌كه‌ی جڤاتی نیشتمانی گۆڕان گووتی :”یەکێتی کێشەی پۆستی پارێزگاری کەرکووکی ھەیە و هەروەها دەیەوێت کێشەی پۆستی سەرۆک کۆماری عێراق لەگەڵ پارتی دیموکراتی کوردستان چارەسەر بکات”.
نزار مه‌حمود ئەندامی جڤاتی نیشتمانیی گۆڕان گوتیشی: “ڕاستە یەکێتی بەردەوام کێشەی ناوخۆی ھەیە و کێشەشی دەبێت، بۆیە نازانم تاچەند کێشەکانی ناو یەکێتی ھۆکارە بۆ دواخستنی کابینەی نوێی حکوومەتی ھەرێمی کوردستان. لەگەڵ ئەوەشدا پۆستەکانی حکومەت ئەوەندە زۆرن، بەشی زۆربەی سەرکردەکانی یەکێتی دەکات”.
هه‌روه‌ها نزار مه‌حمود ده‌ڵێت :” یەکێتی داوای ئەوەی کردووە، لەهەر سێ سەرۆکایەتییەکەی هەرێمی کوردستاندا پشکی هەبێت، لە کاتێکدا گۆڕانیش داوای کردووە، بەڵام “حزبەکان لەکاتی دانوستانەکاندا داواکارییەکی زۆر دەکەن، بۆ ئەوەی کاتێک پۆستەکان دابەش دەکرێن، بە کەمیش ڕازی بن، یان ئەو پۆستە وەربگرن کە خۆیان دەیانەوێت”.
نزار مەحموود ئه‌ندامی جڤاتی نیشتیمانی گۆران ده‌شڵێت:” گۆڕان پۆستی جێگری سەرۆکی حکوومەتی هەرێمی کوردستان وەربگرێت، “بە جددی خزمەتی خەڵکی کوردستان” دەکات،به‌ڵام ئێمە بەپێی ئیستیحقاقی خۆمان داوای پۆست دەکەین و داوای شتی زیاتر ناکەین، بەڵام ئەگەر لە ھەقی خۆمان کەمترمان پێ بدەن، ئەوا بەشداری لە کابینەی داھاتووی حکوومەتی ھەرێمی کوردستاندا ناکەین”.
٣٠ی ئەیلوولی ئه‌مساڵ، لە ھەرێمی كوردستان ھەڵبژاردنی خولی پێنجەمی پەرلەمانی كوردستان بەڕێوە چوو، ئەنجامەكان ڕاگەیەنران و براوەی یەكەم پارتی دیموكراتی كوردستان بوو، كە ٤٥ كورسیی پەرلەمانی بە دەست ھێنا و، ٦ی تشرینی دووه‌میش یەكەم دانیشتنی پەرلەمانی كوردستان ئەنجام درا و ئەندامە نوێیەكانی خولی پێنجەمی سەرجەم لایەنە سیاسییەكان سوێندی یاساییان خوارد.
