بزووتنەوەی گۆڕان بەبۆنەی جەژنی رەمەزان پەیامێكی بڵاوكردەوە داوادەكات پەلەبكرێت لە پێكهێنانی حكومەت
![](https://xwakurk.com/wp-content/uploads/2018/05/goran.jpg)
بەبۆنەی هاتنەوەی جەژنی رەمەزانی پیرۆز بزووتنەوەی گۆڕان پەیامێكی بڵاوكردەوە داوا دەكات پەلەبكرێ لە پێكهێنانی كابینەی نوێی حكومەتی هەرێمی كوردستان و ئەو پرسە “بەهیچ بیانووێك دوانەخرێت”.
لەپەیامێكدا بەبۆنی هاتنی جەژنی رەمەزان، بزووتنەوەی گۆڕان بەئەركی حكومەت و لایەنەكانە سیاسییەكانی دەزانێت، بە “لەخۆبردەیی و دوركەوتنەوە لە خۆپەرستی بناغەی كۆمەڵگەیەكی سەقامگیر و ئارام دابمەزرێنن”. هەروەها رایدەگەیێنێت “جەژنی رەمەزانی پیرۆز، بكرێتە دەرفەتێك بۆ یەكخستنی توانا و هەڵوێستەكان بۆ چارەسەركردنی ئەو دۆخە ناهەموارەی روبەڕووی كەركووك و ناوچە دابڕێنراوەكان بووەتەوە، كە ئەمەش تەنیا بە لەخۆبردوویی و چاوخستنەسەر بەرژەوەندییە باڵاكان بەدیدەهێنرێت”.
دەقی پەیامەكەی بزووتنەوەی گۆڕان
بەبۆنەی جەژنی رەمەزانی پیرۆزەوە، پیرۆزبایی لە خەڵكی كوردستان و هەمو موسڵمانانی جیهان دەكەین. هیواخوازین ئەم جەژنە جەژنی ئاشتەوایی نیشتمانی و رێزگرتن لە ویست و خواست و داواكارییەكانی خەڵكی كوردستان بێت.
لەم بۆنەیەدا، بەئەركی حكومەت و لایەنەكانە سیاسییەكانی دەزانین، بە لەخۆبردەیی و دوركەوتنەوە لە خۆپەرستی بناغەی كۆمەڵگایەكی سەقامگیر و ئارام دابمەزرێنن، تا ئایندەیەكی گەشتر بۆ هاوڵاتیانمان دەستەبەر بكرێ.لەم دۆخە ناوخۆییە ناهەموارەدا كە لەئاست داواكاریی هاوڵاتییاندا نییە، عێراق و ناوچەكەش بە بارگرژیدا تێپەڕدەبێت، كە دەشێت لە سایەی نەبونی هاوهەڵوێستی و نەبونی دامەزراوە نیشتمانییەكان و ململانێ حزبییەكاندا لەهەر ئەگەرێكدا زەرەرمەندی گەورە خەڵكی كوردستانبن، پێویستە هەرچی زوە كێشەكان بەلادا بخرێن و پەلەبكرێ لە پێكهێنانی كابینەی نوێی حكومەتی هەرێم و چیتر ئەم پرسە بەهیچ بیانووێك دوانەخرێت و نائومێدییەكان بڕەوێنرێنەوە.
جەژنی رەمەزانی پیرۆز، بكرێتە دەرفەتێك بۆ یەكخستنی توانا و هەڵوێستەكان بۆ چارەسەركردنی ئەو دۆخە ناهەموارەی روبەڕوی كەركوك و ناوچە دابڕێنراوەكان بۆتەوە، كە ئەمەش تەنیا بە لەخۆبردویی و چاوخستنە سەر بەرژەوەندییە باڵاكان بەدیدەهێنرێت.
هەمیشە لە خۆشی و ئارامی و ئاسودەییدابن.
بزوتنەوەی گۆڕان
3/6/2019