خورماتوو : دەیان گوندی کورد نشین دیسان لە سەرخاکی باوباپیران ئاوارە دەبن
جمجۆڵ و هەڕەشەکانی نوێی داعش لە ناوچە کوردستانیەکانی دەرەوەی ئیدارەی هەرێمی کوردستان بۆتە هۆکاری ئەوەی بەدەیان گوندی کورد نشین بڕیاری چۆڵ کردنی زێد و خاکی خۆیان بدەن و ژیانی ئاوارەیی هەڵبژێرن .
هەر بەم هۆکارەش حکومەتی هەرێمی کوردستان لە هەوڵێکی چڕدا ، بۆ پاراستنی گیانی هاووڵاتیان و شکست پێهێنانی پلانی نوێبوونەوەی هێزەکانی داعش بە ڕەوانە کردنی هێزی پێشمەرگە بۆ ناوچەکانی داودەی نێوان کفری و خورماتوو، بە هەماهەنگی لە گەڵ هێزی هاوپەیمانان لەوناوچانە جێگیر بووەو چەند هێرشێکیشی بۆ سەر ئەم گرووپە تیرۆریستیە دەست پێکردووە .
لە دووای رووداوەکانی ١٦ ئۆکتۆبەر ، هێزەکانی داعش بە ناوی ئاڵا سپەکانەوە لەو ناوچانە جێگیر بوون و بۆشایی ئەمنی لە دووای کشانەوەی هێزی پێشمەرگەی کوردستان بۆ ئەوان هاتە ئاراوە تا خۆیان رێک بخەنەوەو وەک ئێستا ببنەوە مایەی هەڕەشە ، هۆکاری سەرەکیش نابەرپرسیارەتی هێزە عێراقیەکان بوو لەم ناوچانە .
