بەیاننامەیەک لە فراکسیۆنی پارتی لەبارەی قەیرانی غاز
دوای ئەوەی ژمارەیەک مافیا ڕێگریان لە هاتنی غازی شل لە سنوری گەرمیان بۆ هەولێر و دهۆک کرد و داوایانکردووە کە کۆمپانیاکە باج بەو گرووپە مافیایە بدەن ئەگینا ڕێگری لە هاتنی غاز بۆ هەولێر دەکەن، لەو بارەیەوە فراکسیۆنی پارتی لە پەلەمانی کوردستان بەیاننامەیەکی بڵاوکردەوە.
دەقی بەیاننامەکەی فراکسیۆنی پارتی لە پەرلەمانی کوردستان
بەیاننامەیەک لە فراکسیۆنی پارتی لەبارەی قەیرانی غاز
بەنیگەرانییەکی قوڵەوە کۆمەڵێک دەست ڕۆیشتوو لە سلێمانی لەپێناو بەرژەوەندی کەسی خۆیان هەستاون بە تەگەرە دروستکردن لە ناردنی غازی شل بۆ هەولێرو دهۆک بە ئامانجی دروستکردنی کێشەو گرفت بۆ هاوڵاتییان.
دوای ڕاگەیاندنی پرۆسەی چاکسازی لەهەرێمی کوردستان و پرسی شەفافبوون لەسەرجەم سێکتەرەکاندا پرسی غاز یش کەوتۆتە ئەو چوارچێوەیە و پێشتر بەبێ ڕەچاوکردنی مەرجە یاساییەکان دراوەتە کۆمپانیایەک کە بێ تەندەرو بە هەڕەمەکی بووە، بەڵام ئێستا لە ڕێی تەندەرەوە دراوەتە کۆمپانیایەکی دیکە بەشێوەیەکی یاسایی و ئامانجی ئەمەش نەهێشتنی قۆرغکاری و واستەکاری بووە،بەڵام کۆمەڵێک مافیا ڕەفتار ئەمەیان پێ قبوڵنەکرا.
دوێنێ لەکاتی گواستنەوەی غازەکە بۆ هەولێرو دهۆک ژمارەیەک چەکداری ناسراو هەڵیانکوتاوەتە سەر تانکەرەکان و چوونەتە سەر ئەو کۆمپانیایەی کە ئەرکی گواستنەوەی غازەکەیان لە ئەستۆبووەو توندو تیژییان بەرانبەر خاوەنی کۆمپانیا ئەنجامداوەو ئێستا کەوتۆتە نەخۆشخانەو داوای بەش و پشکیان لێی کردووە.
ئەوپەڕی نیگەرانی خۆمان لەم ڕووداوە ڕادەگەینین و بەتوندی ئیدانەی ئەم کارە دەکەین و پاڵپشتی هەموو ڕێکارێکی یاسایی دەکەین لەم پرسەداو داواکارین بەهۆی حەزو چاوچنۆکی کەسانێک بۆ دەستخستنی پارەی نایاسایی هاوڵاتییان باجەکەی نەدەن و غازی هاوڵاتییان بەڕۆژی ڕوون دەستی بەسەردا نەگیرێت.
فراکسیۆنی پارتی لە پەرلەمانی کوردستان
۲/۲/۲٠۲٠
