سەرۆکی حکومەتی هەرێمی کوردستان پێشوازی لە نوێنەری تایبەتی ئەمریکا بۆ کاروباری سووریا و هاوپەیمانێتی نێودەوڵەتی دژی داعش دەکات
ئەمڕۆ سێشەممە 2020/9/22 مەسرور بارزانی، سەرۆکی حکومەتی هەرێمی کوردستان پێشوازی لە شاندێکی ئەمەریکی کرد بە سەرۆکایەتی باڵیۆز جەیمس جێفری، نوێنەری تایبەتی ئەمەریکا بۆ کاروباری سووریا و هاوپەیمانێتی نێودەوڵەتی دژی داعش.
لە کۆبوونەوەکەدا گفتوگۆ دەربارەی گۆڕانکاری و پێشهاتەکانی عێراق و سووریا و گرینگی هاوکاریکردنی هێزی پێشمەرگە و سوپای عێراق کرا بۆ ڕووبەرووبوونەوەی هەڕەشەکانی داعش.
باڵیۆز جەیمس جێفری، رۆڵ و هەڵوێستی سەرۆک بارزانی و حکومەتی هەرێمی کوردستانی لەنزیککردنەوەی هێزەکانی رۆژئاوای کوردستان بەرزنرخاند و جەختی لە پشتیوانی ئەمەریکا بۆ هەرێمی کوردستان کردەوە، گوتی “هەرێمی کوردستان بەهۆی هەمەڕەنگی و زیندوویێتی و دۆستایەتییەکەی لەگەڵ ئەمەریکا و وڵاتانی رۆژئاوا، پێگەیەکی گرنگ و ستراتیژی لە رۆژهەڵاتی ناوەڕاستدا هەیە”.
هەروەها سەرۆکی حکومەت وێڕای سوپاسکردنی پشتیوانی ویلایەتە یەکگرتووەکانی ئەمەریکا، تیشکی خستە سەر دۆخی ئێستای عێراق و ناوچەکە و پەیوەندییەکانی نێوان هەرێمی کوردستان و حکومەتی فیدراڵی و ئاماژەی بەوەدا، کە پرۆسەی گفتوگۆ لەگەڵ بەغدا بەردەوامە بە ئامانجی گەیشتن بە چارەسەرێکی بنەڕەتییانەی کیشەکان لەسەر بنەمای دەستوور.
مەسرور بارزانی جەختیشی لە گرینگی بەردەوامبوونی هەماهەنگی ئەمنی نێوان هێزی پێشمەرگە و سوپای عێراق کردەوە، بەتایبەتی لە ناوچە کوردستانییەکانی دەرەوەی ئیدارەی هەرێم بۆ ڕووبەڕووبوونەوەی هەڕەشەکانی داعش.
سەرۆکی حکومەت نیگەرانی خۆشی بەرامبەر بەردەوامبوونی سیاسەتی تەعریب و دەستدرێژی و هەڵکوتانە سەر موڵک و زەوی دانیشتووانی کوردی ناوچە کوردستانییەکانی دەرەوەی هەرێم دەربڕی.
