ئەفسەرانی وەزارەتی ناوخۆ پلەیان بەرز دەکرێتەوە
بە فەرمانی وەزیری ناوخۆى حكوومه‌تى هه‌رێمى كوردستان، 258 ئەفسەری فەرمانگە جیاوازەکانی وەزارەتی ناوخۆ پلەیان بەرز دەکرێتەوە
بەپێی فەرمانێکی وەزارەتی ناوخۆی حكوومه‌تى هەرێمی کوردستان، كه ئەمڕۆ 16/3/2021 دەرچووە، ئاماژە بە پلەبەرزکردنەوەی کارمەندانی ناوخۆ کراوە، كه 258 ئەفسەری فەرمانگە جیاوازەکانی وەزارەتی ناوخۆ پلەیان بەرز کراوەتەوە.
وەکوو لە فەرمانەکە ئاماژەی بۆ کراوە،بڕیارى پلەبەرزکردنەوەی ئەو ئەفسەرانە لە 14/7/2020وە جێبەجێ دەکرێ.
هه‌ر له‌مباره‌یه‌وه سامی جەلال، بەرێوەبەری گشتیی دیوانی وەزارەتی ناوخۆی حكوومه‌نى هەرێمی کوردستان ڕايگەیاند: “ئەمڕۆ فەرمانی پلەبەرزکردنەوەی ئەفسەرانی ناوخۆ دەرکراوە و بەپێی ڕێنوێنییه‌كان جێبەجێ کراوە”.
ڕوونیشی کردەوە، بەهۆی چەند ڕێکارێک دەرچوونی فەرمانکە دوا کەوتووە، گوتیشی: “پاش ئەوەی ناوەکانیان بۆ ئەنجوومەنی وەزیرانى هه‌رێمى كوردستان نێردرا، لەوێ وردبینی لە ناوەکانیان کراوە و پاشان بۆ سەرۆکایەتیی هەرێمى كوردستان نێردراوه، بۆیه کاتێکی زۆری پێچووە، بەڵام هەر ئەفسەرێک بەپێی شایستەبوونی خۆی، مافەکەی پێدراوە”.
س: باسنيوز
