ئەفسەرێكی پێشمەرگە : دوو خولی گرنگى سەربازی لە ئەمریكا تەواو كرد

2021-05-21

ئەفسەرێكی پێشمەرگە به‌ناوى ڕائيد ئه‌يوب حه‌مه‌ده‌مين بەشداری لە دوو خولی سەربازیی گرنگ له‌ ئه‌مريكا كرد، كە بۆ ماوەی هەشت مانگ لە ئەمریكا بەردەوام بوو.

له‌ ڕاگەیەندراوێكدا وەزارەتی پێشمەرگە ئه‌مرۆ هه‌ينى رايگه‌ياند:” لە چوارچێوەی خشتەی مەشق و راهێنانی هاوپەیمانان بۆ پێشمەرگە لە شەڕی دژی تیرۆریستانی داعش كە خولەكانی دەرەوەی وڵاتیش لەخۆ دەگرێت، بەپێی چەند مەرج و رێنماییەك وەك تاقیكردنەوەی زمانی ئینگلیزی و سەركەوتن، ڕائید ئەیووب حەمەدەمین لە رشتەی گەیاندن وەرگیرا بۆ بەشداریكردن لە هەردوو خولی گەیاندن و فەرماندەیی سەربازی كە لە ئەمریكا بۆ ماوەی هەشت مانگ بەڕێوە چوو.

وه‌زاره‌تى پێشمه‌رگه‌ راشيگه‌ياندووه‌ :” دوای تەواوكردنی ماوەی هەردوو خولەكە كە لە دوو ویلایەتی جیای ئەمریكا بەڕێوەچوو، ئەفسەرە كوردەكە بڕوانامەی زمانی سەربازی و بڕوانامەی سەركردایەتی گەیاندنی سەربازی بەدەست هێنا بۆ ئەوەی لە یەكە سەربازییەكانی هێزی پێشمەرگە خزمەت بە پێشمەرگە و كوردستان بكات.

لەمبارەیەوە ڕائید ئەیوب حەمەدەمین ئه‌فسه‌رى بەشدار بوو له‌ خولەكە ڕای گەیاند:”من یەكەمین و تەنها ئەفسەرم لە هەموو عێراق و كوردستان، كەبەشداریم كردووە لە خوولى ( Signal Captain Career course ) (سەركردایەتى و فەرماندەیى گەیاندنى سەربازى )، یەكێكە لە خوولە هەرە بەهێزەكان، كە ئەفسەرانى ووڵاتانى هاوپەیمانى ئەمەریكا و ناتۆ تێدا بەشدار دەبن.

وه‌ك ئه‌و ئه‌فسه‌ر ده‌شلێت :” لە پەیمانگای (DLI)ی ئەمریکا ئەفسەرانی 150 وڵات بەشدار بوون لەو خولەدا، دەرفەتێكى باش بوو بۆ ناساندنى پێشمەرگە و كوردستان، ئاڵاى كوردستان لەسەر سنگ و جلەکانم ببووە جێگاى سەرنجى ئەفسەرانى ووڵاتانى جیهان، لەو ماوەیە دەرفەت رەخسا، بۆئەوەی باسى كوردستان و مێژوو و خەباتى گەلى كورد و فیدراڵیزمى عێراق و كوردستان بکەم بۆ قوتابیان و ئەفسەرانی بەشداربوو لەخولەکە.

لەدرێژەی لێدوانەکەيدا رائد ئەیوب زياتر گوتى:” دواى تەواو كردنى خوولى زمانى بەرگرى و وەرگرتنى بڕوانامە، سەردانی سەربازگەى فۆرتگۆردنم کرد لە ویلایەتی جۆرجیا، بۆ بەشداریکردن لە خوولى دووەم (فەرماندەیی و خوێندنى یاساكانى سەربازى ئەمەریكا)، کە بابەتەکان پێکهاتبوون لە (ئەدا كردن، ئەتەكێتى سەربازى، چۆنیەتى بەرێوەبردن و رەفتار كردن لەناو یەكەو بارەگاى سەربازى، سەرپەرشتى كردنى ئۆپەراسیۆن، فەرماندەیى، دانانى پلانى جەنگ و دواتر پلانى گەیاندنى سەربازى كە زۆربەى لاپەرەى یاساكانى سەربازى ئەمەریكا لە خۆدەگرێت).

گووتیشی: لە خولی دووەمدا زۆربەى ئەفسەرانى ناو خوولەكە ئەمەریكى بوون، بەهەمان شێوەی خولی یەکەم دەرفەتێك بوو بۆ ناساندنى گەلى كورد و مێژووەكەى و ئالوگۆرى كەلتوری لە نێوانماند، لە سەر ئەم بابەتانە لە نووسینگەى ئەفسەرانى بیانى، کە تایبەتە بە شارەزا کردن بە كەلتورى سەربازى و دامەزراوە رامیارى و سەربازیەكانى وڵاتە یەكگرتووەكانى ئەمەریكا، لەراپۆرتێکدا بە شیوەی پاوەرپۆینت، كە 80 سلاید بوو، لە ماوەى كاتژمێر ونیوێک، (مێژووى گەلى كورد لە رووخانى عوسمانیەكان تاكو شۆرشەكانى كورد 1961- 1974، كۆمارى مەهاباد، كارەساتى هەڵەبجە، ئەنفال، راپەڕینى 1991، دامەزراندنى پەرلەمان و حكومەتى هەرێم، شەڕى كوێت، روخانى رژێمى بەعس، هەڵبژاردن و شەرى داعش)م پێشكەش بە ئامادەبوان كرد، جێگاى سەرنج و دەستخۆشى بەشداربوان بوو، بینم فرمێسك بە چاوى یەكێك لە ئەندامانى ئۆفیسەكەدا دەهاتە خوار.

لەکۆتایی لێدوانەکەيدا رائد ئەیوب باسی هەڵوێستێکی خۆی دەکات، دەڵێت کاتێک سەردانى مۆزەخانەى هۆلۆكۆستمان كرد، کە دەربارەی شێوازى جینۆسایدى یەهودیەكانە لەلایەن نازیەكانى ئەڵمانیا و ئەوروپا، دواى بینینى مۆزەخانەكە بۆ ماوەى 2 كاتژمێر لە هۆڵی مۆزەخانەکەدا مامۆستای مۆزەخانەكە باسی جینۆسایدی جوەکان كرا، لەلایەن ئەفسەرانى ووڵاتان گفتوگۆی لەبارەوە کرا، منیش بە ئاماژەدان بە هەڵەبجە و گازى كیمیایى و شێوازى جینۆسایدەكە، كە یەهودیەكان بەگاز لە ژوورەكان دەخنكێنران، گەلى كورد بە فرۆكە و بۆمباباران دەکوژران و زیندەبەچاڵ دەکران بەشداری گفتوگۆیەکەم کرد، دوو لە ئەفسەرانى عەرەب، کە لەوێ ئامادە بوون رەخنەیان لێگرتم، كە چۆن باسى عەرەب و بەعس دەكەم، بەڵام من بەبەڵگە و ناردنى لینكى یوتوب بۆ سەر شاشەى هۆڵەكە هەڵوێستى ئەوانم گۆڕى و لەكۆتاییدا داواى لێبوردنیان لەمن کرد، دەربارەی ئەو ستەم و هەڵە تێگەیشتنەی بەرامبەر بە گەلی کورد هەیانبووە.