سەركردەیەكی گۆڕان له‌باره‌ى رێكه‌وتنيان له‌گه‌ڵ يه‌كێتى: گومان دەكەین ژێربه‌ژێر گۆڕان به یه‌کێتی فرۆشرابێت و پاره‌یه‌کی زۆر وه‌رگیرابێت
ئەندامێكی جڤاتی گشتیی گۆڕان انيارى نوێ له‌باره‌ى رێككه‌وتنى حيزبه‌كه‌يان له‌گه‌ڵ يه‌كێتى ئاشكرا ده‌كات و ده‌لێ، گومانی ئەوەمان بۆ دروست بووە حزبەكەمان ”ژێر بە ژێر بە یەكێتیی نیشتمانیی كوردستان فرۆشرابێت و پارەیەكی زۆریش وەرگیرابێت“. ئەوەش ناشارێتەوە كە ئامادەكاری بۆ تەزویرێكی رێكخراو دەكرێت و گۆڕانیش بێدەنگ دەكرێت.
زەید سەعید شێخە، ئەندامی جڤاتی گشتیی گۆڕان رايگەیاند: ”کاتی خۆی به کاک نه‌وشیروانم گوت، بۆ گه‌لی کوردستان پێویسته له هه‌موو شته‌کانی پێشووتر لێک خۆش بین و له‌سه‌ر مێزی گفتوگۆ قسه بکه‌ین، به‌ڵام ئه‌وه‌ی له کوردستان ده‌کرێت بۆ شکاندنی یه‌کتره، ده‌نا با هه‌موویان له‌سه‌ر یه‌ک مێز دابنیشن و ناوماڵی کوردستان رێک بخه‌ن“.
ئه‌و ئەندامه‌ی جڤاتی گشتیی گۆڕان راشيگه‌ياندووه: ”ئێستا گۆڕان بووه‌ته سێ پارچه، هه‌مووی باڵ باڵێنه، خۆزگه له‌سه‌ر گۆڕی کاک نه‌وشیروان بوویتایه، ده‌تتوانی بزانی قورسایی گۆڕان چه‌نده؟ له‌سه‌ر گۆڕەکەی کوڕی فه‌قیرم نه‌بینی، کاسبکارم نه‌بینی، لە خوار 25 ساڵەم نه‌بینی، خێره؟ ده‌بێت ده‌رس له‌و شتانه وه‌ربگرین. گۆڕان بۆ خۆی ئه‌گه‌ر به‌ته‌نیا دابه‌زیبایه کێ ده‌ڵێت کورسی له هه‌ولێر نه‌ده‌هێنا؟ له سلێمانی نه‌یده‌هێنا؟ بۆیه ده‌یانه‌وێت له‌گه‌ڵ یه‌کێتی به ته‌زویر و به شت کورسی بهێنن، ده‌نا گۆڕان کورسی بۆ نایه‌ت. ته‌حه‌دا ده‌که‌م گۆڕان کورسی ناهێنێ، مه‌گه‌ر ژێر به ژێر رێککه‌وتنیان کردبێ ئه‌وه نازانم. ئێستاش ئه‌وه‌ی ئێمه ده‌یانه‌وێت، ئەو کورسییەی پێ نایه‌ت“.
ئەوەشی روون كردەوە كە ئەوان رازی نین و پێشتریش لە بەشداریكردنی بزووتنەوەكەیان لە حكوومەتیش رازی نەبوون، بەڵام ”گۆڕان بۆ ئەو شتانه‌ی ده‌یکات پرس به ئێمه ناکه‌ن، بۆ رێککه‌وتنی ئێستاش له‌گه‌ڵ یه‌کێتی به‌هه‌مان شێوە. به‌داخه‌وه هەمووی بۆ گیرفان پڕکردنی خۆیانه و نایه‌نه سه‌ر واقیعی کوردستان، کوا پرۆژه‌یان پێیه بۆ گه‌لی کوردستان؟“.
لەبارەی دیوی پشتەوەی هاوپەیمانێتییەكەی یەكێتی و گۆڕان، ئەو سەركردەیەی بزووتنەوەكە دەڵێت: ”ئه‌گه‌ر ژێربه‌ژێر بەڵێنیان به گۆڕان دابێت ئێمه نازانین، بێ گومان گۆڕانیش له‌و ته‌زویره بێ ده‌نگ ده‌بێت. ئه‌وه ماوه‌یه‌که ئه‌وان له‌سه‌ر خه‌تن و باوه‌ڕم وایه گۆڕان بۆ دواڕۆژ ده‌گه‌ڕێته‌وه ناو یه‌کێتی، له‌گه‌ڵ ئه‌وه‌شدا نیم و ئه‌وه فێڵکردنه له ده‌نگه ناڕازییه‌کان و ده‌نگه پاکه‌کان، ئه‌سڵه‌ن گۆڕان و یه‌کێتی حیسابیان بۆ خه‌ڵکی هه‌ولێر و بۆ کاندیده‌که‌ش نه‌کردووه، ته‌حه‌دا ده‌که‌م ئاگادار نه‌بووم کێ له سنووری هه‌ولێر به‌ربژێرە و چۆن دانراوه، ئێمە لە ته‌له‌فزیۆن زانیمان، دواتر پرسیارمان کرد بۆ واتان کرد و بۆ پرستان به خه‌ڵکی هه‌ولێر نه‌کرد؟ هه‌ولێر و هه‌ولێرییه‌کان بە تەواوی فه‌رامۆش و بایکۆت کراون، منه‌تم نییه و ده‌ست به چاویاندا ده‌که‌م، ئێمه نیگه‌رانین، ته‌واو نیگه‌رانین، من ته‌نیا نیم و کۆمه‌ڵێکی زۆر لە هه‌ڤاڵ و دۆستان نیگه‌رانین لەوەی گۆڕان ئه‌مه ده‌کات. به‌ش به حاڵی خۆم نیگه‌رانم له‌و رێککه‌وتنه و سەرکردایەتیی گۆڕان، نازانم دواتر لێکەوتە نەرێنییەکانی ئەو رێککەوتنە چی دەبن، هه‌ندێک شت هه‌یه ناگوترێت“.
زه‌ید سه‌عید شێخه بۆ باسنيوز گوتووشيه‌تى: ”كاتی خۆی 25 ده‌فته‌ر دۆلار مانگانه دراوه به گۆڕان، گۆڕان ده‌یگوت هیچم نییه. دوای دوو ساڵ ئه‌و پرسه گه‌یشته ئێمه، له کۆبوونه‌وه گوتمان ئه‌و پاره‌یە وه‌رگیراوه یان نا؟ قادری حاجی عه‌لی هه‌ڵسایه‌وه و گوتی کاک عومه‌ر ئێوه ئه‌و پاره‌تان وەرگرتووه بۆ به که‌ستان نه‌گوتووه؟ ئه‌گه‌ر به ئێمه‌تان بگوتایه ده‌مان گوت وه‌ری مه‌گرن، به‌ڵام ئێوه وه‌رتان گرتووه و به که‌ستان نه‌گوتووه. ئێستاش پارە له ئاستی 25 ده‌فته‌ر وەرده‌گیرێت و گوتمان ئه‌و پاره بۆ وه‌رده‌گرن؟ ئه‌و پاره‌یە پاره‌ی دزراوه، ئێمه خۆبه‌خشانه کارمان کردووه، ته‌حه‌دا ده‌که‌م دینارێک خه‌رج کرابێت. پێشووتر مقابه‌له‌یه‌کی ئه‌ندامێکی جڤاتی گشتییان کرد، گوتی گومان ده‌که‌م گۆڕان پاره‌ی له یه‌کێتی وه‌رگرتووه، منیش ده‌ڵێم راسته و ئه‌گه‌ر پاره وه‌رنه‌گیرابێت چۆن گۆڕان کار ده‌کات؟“.
سەركردەكەی گۆڕان دووپاتی كردەوە، ئه‌گه‌ر زووتنەوەكە ژێربه‌ژێر رێککه‌وتنی نه‌کردبێتو چۆن ده‌چێته ئه‌و هاوپه‌یمانێتییه‌وه؟ زۆربه‌ی زۆری خەڵکی گۆڕان نیگه‌رانه له‌و رێککه‌وتنه، ئێمە چه‌ند سەرکردەیەکی گه‌وره‌ی هه‌ولێر، کە 6 که‌سین له ئاستی جڤات، کەچی ئاگاداریان نه‌کردووینه‌ته‌وه و پرسیان پێ نه‌کردووین، ئێمە هیچ کاممان ئاگادار نین و نازانین رێککه‌وتن له‌سه‌ر چی کراوه، ورده‌کارییەکەی نازانین و بۆیان روون نه‌کردووینەتەوە له‌سه‌ر چی پێکهاتوون؟ ده‌ڵێن له‌سه‌ر کاندیدی په‌رله‌مان پێکهاتووین، به‌ڵام ”جیاوازیی ئێمه و دزه‌کان ئێستا چییه؟ هیچ! ئێمه ئێستا شه‌ریکی دزی و قاچاغچین و خه‌ڵک له‌وه نیگه‌رانه و شتێکی هه‌ڵه بووه و گۆڕان ئیدی تواوه‌ته‌وه“.
ئەوەشی ئاشكرا كرد كە ”زۆربه‌ی زۆری لایەنگرانی گۆڕان ده‌نگ به‌و لیسته ناده‌ن، جەماوەر نه‌ماوه، ته‌حه‌دا ده‌که‌م بۆ ئه‌و قسه‌‌یە، حزبه‌کان هه‌موویان له که‌مییان داوه، به‌ڵام پشکی شێر لەو کەمییە به‌ر گۆڕان که‌وتووه“.
ئەوەشی نەشاردەوە كە بزووتنەوەكەی لە هەولێر هیچ كورسییەك ناهێنێت، ”نازانم ئه‌گه‌ر ژێربه‌ژێر ته‌زیورات و رێککه‌وتن له نێوان گۆڕان و یه‌کێتیدا کرابێت، ئه‌گه‌رنا گۆڕان تەنیا یه‌ک کورسی دێنێ. پێشتر گۆڕان به هه‌موو هێز و توانای خۆی 5 کورسی هێنا بۆ به‌غدا، ئه‌مڕۆ بووە بە چوار پارچه، تەنیا یه‌ک کورسی دێنێت. پێشتر جڤات پڕ بوو له دکتۆرا و ماسته‌ر، ئێستا تاکه دکتۆرایه‌کیش نه‌ماوه، هەموویان له ماڵه‌وه دانیشتوون. بەڵام ئەگەر ژێربه‌ژێر له‌گه‌ڵ یه‌کێتی رێککه‌وتن بۆ ته‌زویراتی رێکخراو کرابێت، ئه‌وه حیسابێکی دیکه‌یه و هەندێ کەس دەنێرنە بەغدا. ئه‌گه‌رنا یه‌کێتی قازانجی کردووه، بۆ نموونه له سنووری هه‌ولێر بازنه‌ی لای ئازادی، گۆڕان کاندیدی نییه، گۆڕان ده‌نگ به کێ بدات؟ یه‌کێتی کاندیدی داناوه، ئه‌وه‌یه زه‌ره‌ری گۆڕان. له کۆیه گۆڕان و یه‌کێتی هه‌یانه، یه‌کێتی ده‌نگ به خۆی ده‌دات و بە گۆڕانی نادات، یانی گۆڕان زۆر زه‌ره‌رمه‌ند بووه“.
لە كۆتاییشدا گوتی: ”باوه‌ڕم وایه گۆڕان به‌تەواوی ده‌چێته‌وه ناو یه‌کێتی و باوه‌ڕیشم وایه پاره‌یه‌کی زۆر وه‌رگیراوه و ئەوەش بازرگانییه‌که‌یە“.
