دابینكردنی بەنزین بەنرخی پاڵپشتیكراو بەردەوام دەبێت
وەزارەتی سامانە سروشتیەكان ئاشكرای كرد، بۆ پاڵپشتیكردنی كەرتی گواستنەوەی گشتی دابینکردنی بەنزینی 690 دیناریی، بەردەوام دەبێت.
لە راگەیاندراوێكدا كه ئه‌مرۆ سێشه‌ممه، وەزارەتی سامانە سروشتییەكان، بڵاوی كردەوە تێدا رايگه‌ياندووه:” بەمەبەستی جێبەجێكردنی بڕیارو راسپاردەكانی سەرۆكوەزیرانی كوردستان، كەمال محەمەد ساڵح و وەزیری سامانە سروشتییەكان سەرپەرشتی كۆبوونەوەیەكی فراوانی كرد، لەو كۆبوونەوەیەدا كە بەڕێوەبەرانی نەوت و كانزاكانی پارێزگاكانی كوردستان ئامادەی بوون، بڕیاردرا رۆژانە سێ ملیۆن بۆ سێ ملیۆن و 500 هەزار لیتر بەنزین دابین بکرێت بە كوالێتی و مواسەفاتێكی باش”.
لە راگەیاندراوەكەى وەزارەتی سامانە سروشتیەكان ئاماژە بەوەش كراوە: “تەوەرێکی کۆبوونەوەکە تایبەت بوو بە پاڵپشتیكردنی كەرتی گواستنەوەی گشتی بۆ ئەم مەبەستە وەزارەت بەنرخێکی پاڵپشتیکراو بەردەوام دەبێت بۆ دابینکردنی بەنزینی 690 دیناریی”.
هاوكات لەو کۆبوونەوەیەدا وەزیری سامانە سروشتییەکان سوپاسی ئەنجوومەنی وەزیرانی کرد كە لەماوەی چوار رۆژی رابردوودا نۆ ملیۆن لیتر بەنزینی بەشێوەیەكی دادپەروەرانە بەسەر پارێزگاکانی کوردستاندا دابینكردووە و رۆڵی لەكۆنترۆڵكردنی نرخی بەنزین هەبوو.
له كۆتايى راگه‌يێندراوه‌كه‌ش هاتووه: “وەزیری سامانە سروشتییەکان داوای لە لێژنەی باڵای چاودێری و بەدواداچوونی كوالێتی و مواسەفاتی بەنزینی کرد هەوڵەکانیان چڕبکەنەوەو دەستنیشان و سزای توندی هەر بەنزینخانەیەکیش بکەن کەبەدەر لە ڕێنماییەکانی وەزارەت سەرپێچی دەکەن.
