ئەندامێکی جڤاتی گشتیی بزووتنەوەی گۆڕان ، سەرکەوتنی کابینەی ” نۆیەم” بە ئەرینی دەزانێت
لە لێدوانێکدا بۆ ڕاگەیاندنەکان ، دڵشاد ره‌شید میران، ئەندامی جڤاتی گشتیی گۆڕان ڕایگەیاند ، : ”وێڕای هه‌نگاوه خێراكان له‌م كابینه‌ی حكومه‌ت كه شتی باش كراوه، به‌ڵام كۆسپ و ته‌گه‌ره‌ش هه‌بووه، هەر له قۆناغی یه‌كه‌می وه‌رگرتنی كابینه‌ی حكومه‌ت له‌لایه‌ن مه‌سرور بارزانییه‌وه، نرخی نه‌وت به جۆرێك دابه‌زی كه هیچ به‌هایه‌كی نه‌ما، ئه‌مه بۆ حكومه‌ت قورس بوو، به تایبه‌تیش له بابه‌تی دابینكردنی مووچه بۆ فه‌رمانبه‌ران، هەروەها بابه‌تی داعش جارێكی دیكە هاته پێشه‌وه و كۆرۆناش سەری هەڵدا، به‌ڵام حكومه‌ت زۆر باش بوو له سه‌ركه‌وتنی به‌سه‌ر ئاڵنگارییەكان، ڤاكسینیان بۆ كۆرۆنا په‌یدا كرد و تیمی ته‌ندروستی له شاره‌كان به چالاكانه كاریان كرد، كۆنترۆڵی دۆخه‌كه‌یان كرد
هاوکات ڕەشید میران گوتی ”لە لایەك شەڕی حزبەكان و ئەگەری بەكارهێنانی چەك بۆ یەكلاكردنەوەیان، هەروەها نەگەڕانەوەی داهاتی سلێمانی و ده‌ست به‌سه‌راگرتنی، جگە لەوەی كۆنه‌كردنه‌وه‌ی باج لە سلێمانی هەبووە، چونكە خه‌ڵك كاتێك دڵنیا نه‌بێت له‌وه‌ی باج و سه‌رانه‌كه‌ی بۆ خه‌زێنه‌ی گشتی دەگەڕێتەوە و حزب مامه‌ڵه‌ی پێوه دەكات، لەوانەیە ئامادە نەبێت باج بدات“.
لە بەشێکی دیکەی قسەکانیدا ئاماژە بەوە دەکات ”له‌هه‌مان كاتدا كابینه‌ی نۆیەمی حكومەت بە سەرۆكایەتیی مه‌سرور بارزانی، له‌به‌رده‌م ئاڵنگارییەكی دیكەی جیهانیش بوو كە ئەویش پرسی ئێران و ئه‌مه‌ریكا و كشانه‌وه‌ی ئه‌مه‌ریكا له ناوچه‌كه‌یە، هه‌ر حكومه‌تێكی دیكه‌ش ئه‌م ئاڵگارییانه‌ی هه‌بوایه، گرفتی بۆ دروست ده‌بوو. جگە لەوەی به‌شێك له‌و حزبانه‌ی كه له حكومەت بەشدارن، لە ماوەی رابردوو سه‌نگه‌ریان له دژی حكومه‌ت گرتبوو، ئه‌مه‌ش شتێكی راست نییه، ویستیان له‌م رێگایه‌وه له حكومه‌ت بده‌ن و بیڕووخێنن، كه‌چی كابینەی نۆیەم ئەوەشی تێپەڕاند، وێڕای هەموو ئەمانە، بابەتی په‌كه‌كه‌ش كە به‌داخه‌وه بوه‌ته سه‌ر ئێشه‌یه‌كی گه‌وره بۆ باشووری كوردستان و بۆ كابینه‌ی حكومه‌ت، ئه‌سڵه‌ن په‌كه‌كه نامۆیه به باشووری كوردستان، 40 ساڵه شه‌ڕ ده‌كه‌ن، ده‌رئه‌نجامی نه‌بووه، له توركیا ئازادی هه‌یه و حزب ده‌توانێت كاری سیاسی بكات، با بڕۆن له‌وێ كاری سیاسیی خۆیان بكەن، تۆ له هه‌ڵه‌بجه و گه‌رمیان و چه‌مچه‌ماڵه‌وه چۆن ده‌توانی دژایه‌تیی توركیا بكه‌یت؟ هەرچەند من پێم وایه پەكەكە به‌رژه‌وه‌ندیی توركیا ئه‌مه ده‌كات“.
دڵشاد رەشید، ئەندامی جڤاتی گشتیی گۆڕان لە کۆتاییذا نایشارێتەوە ، ”لەگەڵ هەموو ئەم ئاڵنگارییانەدا، كابینه‌ی نۆیەمی حكومه‌ت ئەمساڵ لە كاتی خۆیدا مووچه دابه‌ش ده‌كات، پرسی رێگاوبان و بابه‌تی په‌یوه‌ندیی نێوده‌وڵه‌تی و پرسی برینی مووچه‌ی نایاسایی، ئه‌مانه هه‌نگاوی گرنگ بوون، لەبەر ئەوەی خه‌ڵك بژێویی ژیانی ده‌وێت، گرنگه بۆ داهاتوو، حكوومەت كار لەسەر بابەتی ده‌ستی كار و دۆزینه‌وه‌ی هه‌لی كاری زیاتر بۆ گه‌نجان بكات، هەروەها هەوڵی زیاتر بۆ بنبڕكردنی گەندەڵی بدرێت“.
