ئاری نانەكەلی بۆ شاڵاو كۆسرەت ڕەسووڵ: دەتانەوێ هەولێر بۆچی وەربگرنەوە، بۆ تاڵانی و سەرانە سەندن؟
ئەندامێكی كۆمیتەی ناوەندی پارتی دیموكراتی كوردستان، وەڵامی ئەندامێكی مەكتەبی سیاسی یەكێتی دەداتەوە و دەڵێت: ”بە خەونیش هەولێر ناكەوێتەوە دەستتان، چونكە خەڵكی هەولێر رێگە نادات.“
دوای ئەوەی شاڵاو كۆسرەت رەسوول، ئەندامی مەكتەبی سیاسی یەكێتی لە یادی راپەڕینی خەڵکی هەولێر لە نووسینێکدا بانگەشەی ئەوەی كرد گوایە رۆژێك دێ وەك یەكێتی هەولێر وەربگرنەوە! لە بەرامبەردا ئاری نانەکەلی ئەندامی كۆمیتەی ناوەندی پارتی و بەرپرسی لقی 16ی پارتی لە سنووری پارێزگای هەولێر وەڵامی دایەوە و راگەیاند: ئەم قسەیەی، ئەو پرسیارەی لای ئێمە دروست كردووە كە دەیانەوێ هەولێر بۆچی وەربگرنەوە؟ مەگەر خەڵكی هەولێر لەبیریان چووە یەكێتی چی بەرامبەر دەكردن؟“
ئاماژەی بەوەشدا: ”هەولێر پایتەختی كوردستانە و هی هەموو كوردستانیانە، هەولێر لەژێر سایەی حكومەتی هەرێمی كوردستاندا بەردەوام گەشە دەكات، هەولێر میلشیا حوكمی ناكات تا ئێوە هەڕەشەی وەرگرتنەوەی بكەن.“
هەروەها دەشڵێت: ”ئەو كاتەی یەكێتی دەستی بەسەر هەولێردا گرتبوو، چەكدارانی یەكێتی، خەڵکی رەسەن و كەسایەتییە ناسراوەکان و دەوڵەمەندەكانی هەولێریان دەگرت، ئەگەر خاوە و سەرانەیان نەدایە، تیرۆریان دەكردن؟“
ئەوەشی خستەڕوو، “لە شاڵاو كۆسرەت دەپرسین، وەك یەكێتی دەتانەوێ بۆ چی هەولێر وەربگرنەوە؟ بۆ ئەوەی دیسان چەكدارانی یەكێتی ئۆتۆمبێلەكانی خەڵكی هەولێر بدزن؟ بۆ ئەوەی خەڵك ژیانی نەمێنێ و ناچار بن ئۆتۆمبێلەكانیان ببەنەوە سەربان؟ راستیەكە ئەوەیە هەولێر لەوەتەی ئێوەی تێدا دەركراون، زۆر سەلامەتە و زۆریش پێشكەوتووە و بووەتە شارێكی جیهانی و خەڵك بەئارامی كار و كەسابەتی خۆیان دەكەن. تا ئێوە لە هەولێر بوون، دەتانگوت ئەو شارە موقەدەس نییە و گوندێكی گەورەیە. یەكێتی ئەمانەی لەناو هەولێر دەكرد، بۆیە خەڵكی هەولێر هیچ دەسەڵاتێكی یەكێتی قەبووڵ نییە، چونكە زۆر بە خراپی تاڵاوی دەستی دەسەڵاتی یەكێتی چەشتووە.“
جەختیشی كردەوە كە خەڵكی هەولێر لەبیریشیانە چۆن یەكێتی لە رۆژانی خیانەتی 16ی ئۆكتۆبەردا، هەوڵی دەدا هەولێر بكەوێتە دەست ئەو میلیشیایانەی ماوەیەكی زۆرە دەیانەوێ دەرفەتیان بۆ هەڵبكەوێ و رێ لە كاروانی ئاوەدانی و پێشكەوتنی شاری هەولێر بگرن.
لە درێژەی لێدوانەكەیدا ئاری نانەكەلی دەڵێت : ”ئنجا پرسیارێكی تریش هەیە، خودی شاڵاو كۆسرەت رەسوول و ئەوان بۆ وەزعیان لە هەولێر خراپە؟ ئەوە نییە بە دڵی خۆیان بازرگانی گەورە گەورە دەكەن؟ بەڵام دیسان پێیان دەڵێین، ئێوە رۆژ بە رۆژ جەماوەرتان كەمتر دەبێتەوە و خەڵكتان لێ دەبێتەوە. سەیری رابردوویەكی نزیكی خۆتان بكەن، لە 2005 لە هەولێردا 244 هەزار دەنگتان هێناوە، بەڵام لە دوایین هەڵبژاردن، چارەگی ئەو دەنگانەتان نەهێناوەتەوە. جگە لەوەش، ئەگەر ئێوە ئەو ئیدارەیەی لە سلێمانی دەیكەن، نموونەیەكی جوان بێت، ئەوكات دەتوانن باسی وەرگرتنەوەی هەولێر بكەن. یەكێتی تا ئێستا لەبەر دزی و فزییەكانی نەیانهێشتووە شەقامێكی 100 مەتری لە سلێمانی تەواو بكرێت، تا ئێستا سەرانە لە خەڵك دەسەنن، ڕەشبگیری و كوشتوبڕ لەو ناوچەیە هەیە. كەی توانیتان نموونەیەكی جوانی ئیدارەدان پێشكەش بكەن، ئەوكات دەتوانن باسی وەرگرتنەوەی هەولێر بكەنەوە. بەڵام كاتێك خەڵك دەبینن كە رابردووی یەكێتی، كوشتوبڕ و سەرانە و دەستدرێژییە بۆ سەر خەڵكی هەولێر، ئیتر تا ئێوە مابن، بە خەونیش هەولێر وەرناگرنەوە.“
لە كۆتایی لێدوانەکەیدا نانەکەلی گوتی: ”ئاگادار بە، كاتێ سەرۆكی حیزبەكەت بە قەشمەرییاتەوە دەڵێ (جەمال لۆ مارێ!) ئەوەی عاقڵ بێ دەزانێ ئەوە لەگەڵ ئێوەیەتی! جارێ واز لە هەولێر بێننن، خەمی جێگە و پێكەی خۆتان بێت لەناو حیزبەكەتاندا.“
