هەولێر و بەغدا لەسەر هەناردەکردنەوەی نەوتی کوردستان ڕێککەوتن

بەفەرمی هەولێر و بەغدا لەسەر هەناردەکردنەوەی نەوتی کوردستان گەیشتنە ڕێککەوتن و لیژنەیەک بۆ پشکنینی بۆرییەکان پێک هێنرا.

لە راگەیاندراوێکدا شاندی دانوستانکاری حکومەتی هەرێمی کوردستان رایگەیاند “ئەمڕۆ یەکشەممە، 23-02-2025، دوای پەیوەندی و هەماهەنگی نێوان هەردوو وەزارەتی نەوتی فیدراڵی و وەزارەتی سامانە سروشتییەکانی حکومەتی هەرێمی کوردستان، ڕێککەوتن لەسەر دەستپێکردنەوەی هەناردەی نەوتی هەرێم بەپێی بڕی بەردەست، کرا.”

هەروەها بە گوێرەی ڕاگەیەنراوەکەی شاندی دانوستانکاری حکومەتی هەرێمی کوردستان، هەر ئەمڕۆ یەکشەممە، تیمێکی تەکنیکیی هاوبەش بەمەبەستی پشکنینی بۆرییەکانی هەناردەکردنی نەوتی کوردستان لەنێوان هەردوولادا پێک هێنراوە.”

لە ڕاگەیەنراوەکەدا هاتووە “لەم ڕووەوە پابەندبوونی خۆمان بە جێبەجێکردنی بڕگەکانی یاسای بودجەی گشتیی فیدراڵی دووپات دەکەینەوە.”