هەڵگورد نەجیب: لە سۆران پەڵەی پڕۆژەی داوە
هەڵگورد نەجیب، سەرپەرشتیاری ئیدارەی سەربەخۆی سۆران، باسی پڕۆژه بارانی له سۆران كرد و گوتی، ئەو پڕۆژانەی ئێستا کاریان لەسەر دەکرێت و کارکردن تێیاندا بەردەوامە و لە زستانیش بەردەوام دەبن، پێکھاتوون لەم پڕۆژانە خوارەوە.
– دروستکردنی شەقامە ناوخۆییەکانی گوندەکانی (بادلیان، دێلزیان، باڵەکیان و برادۆست) لە سنووری ناحیەی دیانا لە قەزای ناوەندی سۆران.
– تەواوکردنی پڕۆژەی ئاوەڕۆ و شەقامەکانی (گەڕەکی بەختیاری، گەڕەکی وەستا ڕەجەب و گەڕەکی برادۆست لە قەزای ناوەندی سۆران). ھەروەھا دروستکردن و قیرتاوکردنی شەقامی 20 مەتریی (گەڕەکی کۆڕەک).
– پڕۆژەی گەیاندنی ئاوی خواردنەوە بۆ 18 گوندی دۆڵی خەلان و بیاو لە سنووری ناحیەی سرێشمە لە قەزای خەلیفان و پڕۆژەی دروستکردنی ڕێگە و شەقامە ناوخۆییەکانی گوندی ئالانە.
– پڕۆژەی دروستکردنی ئاوەڕۆ و چەند شەقامێک لە سەنتەری قەزای سیدەکان و دروستکردنی ڕێگەی گوندی بۆڵی، کە ڕێگەی چەندین گوندی لەسەرە بە درێژیی 11 کم.
– دروستکردنی چەند قوتابخانەیەک لە سەنتەری قەزای سیدەکان و گوندەکانی دەوروبەری قەزاکە.
– دروستکردنی چەند شەقامێکی ناوخۆیی لە ناحیەی پیران لە قەزای مێرگەسۆر.
– دروستکردنی پڕۆژەی شەقامی 40 مەتریی سۆران.
– بەردەوامیی پڕۆژەکانی ماستەرپلانی گەشتیاری لە گەلی عەلی بەگ.
– بەردەوامی پڕۆژەکانی چاککردنەوە و پاراستنی ڕێگەوبانەکانی سۆران.
– پڕۆژەی قیرتاوکردنی ڕێگەی گوندی پیرسوان لە سنووری قەزای ڕواندز.
گوتیشی، “بەشێکی زۆری پڕۆژەکان لە قۆناغی تەواوبووندان و بڕیارمان داوە زۆربەی پڕۆژەکان پێش سەری ساڵ تەواو بکەین.
باسی لەوەشکرد:” بەھۆی گرفتی داراییەوە بەشێکی پڕۆژەکان وەستابوون، بەڵام بە پاڵپشتیی جەنابی سەرۆکوەزیران بەڕێز مەسرور بارزانی و وەزارەتە پەیوەندیدارەکان، بڕیاری دابینکردنی بودجەی پێویست بۆ بەردەوامیدان و تەواوکردنی پڕۆژە وەستاوەکان دراوە و خۆشبەختانە ئێستا بەردەوامین لە کارکردن.”
لەبارەی پڕۆژە تەواوکراوەکانیش زانیاری خستەڕوو، “ئەو پڕۆژانەی پێشتر تەواو کراون، بریتین لە: پڕۆژە ستراتیژییەکانی کاڤین گرووپ (بەرزەپردی دەروازەی سۆران، دووسایدی سپیلک – خەلیفان، فلکەی دیانا، دووسایدی 30 مەتری).
ھەروەھا دووسایدی حاجی ئۆمەران لە لایەن کۆمپانیای نۆرپ لایت تەواو کراوە. ھاوکات پردی چەمێ کە رێگەیەکەی دووسایدە ٪95ی کارەکانی لەلایەن کۆمپانیای ھێمن گرووپ تەواو کراون.